રામાયણ · અધ્યાય 4.050

ઇત્ય્ ઉક્ત્વા હનુમાંસ્ તત્ર પુનઃ કૃષ્ણાજિનામ્બરામ્
અબ્રવીત્ તાં મહાભાગાં તાપસીં ધર્મચારિણીમ્

ઇદં પ્રવિષ્ટાઃ સહસા બિલં તિમિરસંવૃતમ્
ક્ષુત્પિપાસા પરિશ્રાન્તાઃ પરિખિન્નાશ્ ચ સર્વશઃ

મહદ્ ધિરણ્યા વિવરં પ્રવિષ્ટાઃ સ્મ પિપાસિતાઃ
ઇમાંસ્ ત્વ્ એવં વિધાન્ ભાવાન્ વિવિધાન્ અદ્ભુતોપમાન્
દૃષ્ટ્વા વયં પ્રવ્યથિતાઃ સંભ્રાન્તા નષ્ટચેતસઃ

કસ્યેમે કાઞ્ચના વૃક્ષાસ્ તરુણાદિત્યસંનિભાઃ
શુચીન્ય્ અભ્યવહાર્યાણિ મૂલાનિ ચ ફલાનિ ચ

કાઞ્ચનાનિ વિમાનાનિ રાજતાનિ ગૃહાણિ ચ
તપનીય ગવાક્ષાણિ મણિજાલાવૃતાનિ ચ

પુષ્પિતાઃ ફાલવન્તશ્ ચ પુણ્યાઃ સુરભિગન્ધિનઃ
ઇમે જામ્બૂનદમયાઃ પાદપાઃ કસ્ય તેજસા

કાઞ્ચનાનિ ચ પદ્માનિ જાતાનિ વિમલે જલે
કથં મત્સ્યાશ્ ચ સૌવર્ણા ચરન્તિ સહ કચ્છપૈઃ

આત્માનમ્ અનુભાવં ચ કસ્ય ચૈતત્ તપોબલમ્
અજાનતાં નઃ સર્વેષાં સર્વમ્ આખ્યાતુમ્ અર્હસિ

એવમ્ ઉક્તા હનુમતા તાપસી ધર્મચારિણી
પ્રત્યુવાચ હનૂમન્તં સર્વભૂતહિતે રતા

મયો નામ મહાતેજા માયાવી દાનવર્ષભઃ
તેનેદં નિર્મિતં સર્વં માયયા કાઞ્ચનં વનમ્

પુરા દાનવમુખ્યાનાં વિશ્વકર્મા બભૂવ હ
યેનેદં કાઞ્ચનં દિવ્યં નિર્મિતં ભવનોત્તમમ્

સ તુ વર્ષસહસ્રાણિ તપસ્ તપ્ત્વા મહાવને
પિતામહાદ્ વરં લેભે સર્વમ્ ઔશસનં ધનમ્

વિધાય સર્વં બલવાન્ સર્વકામેશ્વરસ્ તદા
ઉવાસ સુખિતઃ કાલં કં ચિદ્ અસ્મિન્ મહાવને

તમ્ અપ્સરસિ હેમાયાં સક્તં દાનવપુંગવમ્
વિક્રમ્યૈવાશનિં ગૃહ્ય જઘાનેશઃ પુરંદરઃ

ઇદં ચ બ્રહ્મણા દત્તં હેમાયૈ વનમ્ ઉત્તમમ્
શાશ્વતઃ કામભોગશ્ ચ ગૃહં ચેદં હિરણ્મયમ્

દુહિતા મેરુસાવર્ણેર્ અહં તસ્યાઃ સ્વયં પ્રભા
ઇદં રક્ષામિ ભવનં હેમાયા વાનરોત્તમ

મમ પ્રિયસખી હેમા નૃત્તગીતવિશારદા
તયા દત્તવરા ચાસ્મિ રક્ષામિ ભવનોત્તમમ્

કિં કાર્યં કસ્ય વા હેતોઃ કાન્તારાણિ પ્રપદ્યથ
કથં ચેદં વનં દુર્ગં યુષ્માભિર્ ઉપલક્ષિતમ્

ઇમાન્ય્ અભ્યવહાર્યાણિ મૂલાનિ ચ ફલાનિ ચ
ભુક્ત્વા પીત્વા ચ પાનીયં સર્વં મે વક્તુમ્ અર્હથ