રામાયણ · અધ્યાય 4.046

દર્શનાર્થં તુ વૈદેહ્યાઃ સર્વતઃ કપિયૂથપાઃ
વ્યાદિષ્ટાઃ કપિરાજેન યથોક્તં જગ્મુર્ અઞ્જસા

સરાંસિ સરિતઃ કક્ષાન્ આકાશં નગરાણિ ચ
નદીદુર્ગાંસ્ તથા શૈલાન્ વિચિન્વન્તિ સમન્તતઃ

સુગ્રીવેણ સમાખ્યાતાન્ સર્વે વાનરયૂથપાઃ
પ્રદેશાન્ પ્રવિચિન્વન્તિ સશૈલવનકાનનાન્

વિચિન્ત્ય દિવસં સર્વે સીતાધિગમને ધૃતાઃ
સમાયાન્તિ સ્મ મેદિન્યાં નિશાકાલેશુ વાનરાઃ

સર્વર્તુકાંશ્ ચ દેશેષુ વાનરાઃ સફલાન્ દ્રુમાન્
આસાદ્ય રજનીં શય્યાં ચક્રુઃ સર્વેષ્વ્ અહઃસુ તે

તદ્ અહઃ પ્રથમં કૃત્વા માસે પ્રસ્રવણં ગતાઃ
કપિરાજેન સંગમ્ય નિરાશાઃ કપિયૂથપાઃ

વિચિત્ય તુ દિશં પૂર્વાં યથોક્તાં સચિવૈઃ સહ
અદૃષ્ટ્વા વિનતઃ સીતામ્ આજગામ મહાબલઃ

ઉત્તરાં તુ દિશં સર્વાં વિચિત્ય સ મહાકપિઃ
આગતઃ સહ સૈન્યેન વીરઃ શતબલિસ્ તદા

સુષેણઃ પશ્ચિમામ્ આશાં વિચિત્ય સહ વાનરૈઃ
સમેત્ય માસે સંપૂર્ણે સુગ્રીવમ્ ઉપચક્રમે

તં પ્રસ્રવણપૃષ્ઠસ્થં સમાસાદ્યાભિવાદ્ય ચ
આસીનં સહ રામેણ સુગ્રીવમ્ ઇદમ્ અબ્રુવન્

વિચિતાઃ પર્વતાઃ સર્વે વનાનિ નગરાણિ ચ
નિમ્નગાઃ સાગરાન્તાશ્ ચ સર્વે જનપદાસ્ તથા

ગુહાશ્ ચ વિચિતાઃ સર્વા યાસ્ ત્વયા પરિકીર્તિતાઃ
વિચિતાશ્ ચ મહાગુલ્મા લતાવિતતસંતતાઃ

ગહનેષુ ચ દેશેષુ દુર્ગેષુ વિષમેષુ ચ
સત્ત્વાન્ય્ અતિપ્રમાણાનિ વિચિતાનિ હતાનિ ચ
યે ચૈવ ગહના દેશા વિચિતાસ્ તે પુનઃ પુનઃ

ઉદારસત્ત્વાભિજનો મહાત્મા સ મૈથિલીં દ્રક્ષ્યતિ વાનરેન્દ્રઃ
દિશં તુ યામ્ એવ ગતા તુ સીતા તામ્ આસ્થિતો વાયુસુતો હનૂમાન્