રામાયણ · અધ્યાય 4.035

ઇત્ય્ ઉક્તસ્ તારયા વાક્યં પ્રશ્રિતં ધર્મસંહિતમ્
મૃદુસ્વભાવઃ સૌમિત્રિઃ પ્રતિજગ્રાહ તદ્ વચઃ

તસ્મિન્ પ્રતિગૃહીતે તુ વાક્યે હરિગણેશ્વરઃ
લક્ષ્મણાત્ સુમહત્ ત્રાસં વસ્ત્રં ક્લિન્નમ્ ઇવાત્યજત્

તતઃ કણ્ઠગતં માલ્યં ચિત્રં બહુગુણં મહત્
ચિચ્છેદ વિમદશ્ ચાસીત્ સુગ્રીવો વાનરેશ્વરઃ

સ લક્ષ્મણં ભીમબલં સર્વવાનરસત્તમઃ
અબ્રવીત્ પ્રશ્રિતં વાક્યં સુગ્રીવઃ સંપ્રહર્ષયન્

પ્રનષ્ટા શ્રીશ્ ચ કીર્તિશ્ ચ કપિરાજ્યં ચ શાશ્વતમ્
રામપ્રસાદાત્ સૌમિત્રે પુનઃ પ્રાપ્તમ્ ઇદં મયા

કઃ શક્તસ્ તસ્ય દેવસ્ય ખ્યાતસ્ય સ્વેન કર્મણા
તાદૃશં વિક્રમં વીર પ્રતિકર્તુમ્ અરિંદમ

સીતાં પ્રાપ્સ્યતિ ધર્માત્મા વધિષ્યતિ ચ રાવણમ્
સહાયમાત્રેણ મયા રાઘવઃ સ્વેન તેજસા

સહાયકૃત્યં હિ તસ્ય યેન સપ્ત મહાદ્રુમાઃ
શૈલશ્ ચ વસુધા ચૈવ બાણેનૈકેન દારિતાઃ

ધનુર્ વિસ્ફારમાણસ્ય યસ્ય શબ્દેન લક્ષ્મણ
સશૈલા કમ્પિતા ભૂમિઃ સહાયૈસ્ તસ્ય કિં નુ વૈ

અનુયાત્રાં નરેન્દ્રસ્ય કરિષ્યે ઽહં નરર્ષભ
ગચ્છતો રાવણં હન્તું વૈરિણં સપુરઃસરમ્

યદિ કિં ચિદ્ અતિક્રાન્તં વિશ્વાસાત્ પ્રણયેન વા
પ્રેષ્યસ્ય ક્ષમિતવ્યં મે ન કશ્ ચિન્ નાપરાધ્યતિ

ઇતિ તસ્ય બ્રુવાણસ્ય સુગ્રીવસ્ય મહાત્મનઃ
અભવલ્ લક્ષ્મણઃ પ્રીતઃ પ્રેંણા ચેદમ્ ઉવાચ હ

સર્વથા હિ મમ ભ્રાતા સનાથો વાનરેશ્વર
ત્વયા નાથેન સુગ્રીવ પ્રશ્રિતેન વિશેષતઃ

યસ્ તે પ્રભાવઃ સુગ્રીવ યચ્ ચ તે શૌચમ્ ઉત્તમમ્
અર્હસ્ તં કપિરાજ્યસ્ય શ્રિયં ભોક્તુમ્ અનુત્તમામ્

સહાયેન ચ સુગ્રીવ ત્વયા રામઃ પ્રતાપવાન્
વધિષ્યતિ રણે શત્રૂન્ અચિરાન્ નાત્ર સંશયઃ

ધર્મજ્ઞસ્ય કૃતજ્ઞસ્ય સંગ્રામેષ્વ્ અનિવર્તિનઃ
ઉપપન્નં ચ યુક્તં ચ સુગ્રીવ તવ ભાષિતમ્

દોષજ્ઞઃ સતિ સામર્થ્યે કો ઽન્યો ભાષિતુમ્ અર્હતિ
વર્જયિત્વા મમ જ્યેષ્ઠં ત્વાં ચ વાનરસત્તમ

સદૃશશ્ ચાસિ રામસ્ય વિક્રમેણ બલેન ચ
સહાયો દૈવતૈર્ દત્તશ્ ચિરાય હરિપુંગવ

કિં તુ શીઘ્રમ્ ઇતો વીર નિષ્ક્રામ ત્વં મયા સહ
સાન્ત્વયસ્વ વયસ્યં ચ ભાર્યાહરણદુઃખિતમ્

યચ્ ચ શોકાભિભૂતસ્ય શ્રુત્વા રામસ્ય ભાષિતમ્
મયા ત્વં પરુષાણ્ય્ ઉક્તસ્ તચ્ ચ ત્વં ક્ષન્તુમ્ અર્હસિ