રામાયણ · અધ્યાય 4.021

તતો નિપતિતાં તારાં ચ્યુતાં તારામ્ ઇવામ્બરાત્
શનૈર્ આશ્વાસયામ્ આસ હનૂમાન્ હરિયૂથપઃ

ગુણદોષકૃતં જન્તુઃ સ્વકર્મફલહેતુકમ્
અવ્યગ્રસ્ તદ્ અવાપ્નોતિ સર્વં પ્રેત્ય શુભાશુભમ્

શોચ્યા શોચસિ કં શોચ્યં દીનં દીનાનુકમ્પસે
કશ્ ચ કસ્યાનુશોચ્યો ઽસ્તિ દેહે ઽસ્મિન્ બુદ્બુદોપમે

અઙ્ગદસ્ તુ કુમારો ઽયં દ્રષ્ટવ્યો જીવપુત્રયા
આયત્યા ચ વિધેયાનિ સમર્થાન્ય્ અસ્ય ચિન્તય

જાનાસ્ય્ અનિયતામ્ એવં ભૂતાનામ્ આગતિં ગતિમ્
તસ્માચ્ છુભં હિ કર્તવ્યં પણ્ડિતે નૈહલૌકિકમ્

યસ્મિન્ હરિસહસ્રાણિ પ્રયુતાન્ય્ અર્બુદાનિ ચ
વર્તયન્તિ કૃતાંશાનિ સો ઽયં દિષ્ટાન્તમ્ આગતઃ

યદ્ અયં ન્યાયદૃષ્ટાર્થઃ સામદાનક્ષમાપરઃ
ગતો ધર્મજિતાં ભૂમિં નૈનં શોચિતુમ્ અર્હસિ

સર્વે ચ હરિશાર્દૂલ પુત્રશ્ ચાયં તવાઙ્ગદઃ
હર્યૃષ્કપતિરાજ્યં ચ ત્વત્સનાથમ્ અનિન્દિતે

તાવ્ ઇમૌ શોકસંતપ્તૌ શનૈઃ પ્રેરય ભામિનિ
ત્વયા પરિગૃહીતો ઽયમ્ અઙ્ગદઃ શાસ્તુ મેદિનીમ્

સંતતિશ્ ચ યથાદૃષ્ટા કૃત્યં યચ્ ચાપિ સામ્પ્રતમ્
રાજ્ઞસ્ તત્ ક્રિયતાં સર્વમ્ એષ કાલસ્ય નિશ્ચયઃ

સંસ્કાર્યો હરિરાજસ્ તુ અઙ્ગદશ્ ચાભિષિચ્યતામ્
સિંહાસનગતં પુત્રં પશ્યન્તી શાન્તિમ્ એષ્યસિ

સા તસ્ય વચનં શ્રુત્વા ભર્તૃવ્યસનપીડિતા
અબ્રવીદ્ ઉત્તરં તારા હનૂમન્તમ્ અવસ્થિતમ્

અઙ્ગદ પ્રતિરૂપાણાં પુત્રાણામ્ એકતઃ શતમ્
હતસ્યાપ્ય્ અસ્ય વીરસ્ય ગાત્રસંશ્લેષણં વરમ્

ન ચાહં હરિરાજસ્ય પ્રભવામ્ય્ અઙ્ગદસ્ય વા
પિતૃવ્યસ્તસ્ય સુગ્રીવઃ સર્વકાર્યેષ્વ્ અનન્તરઃ

ન હ્ય્ એષા બુદ્ધિર્ આસ્થેયા હનૂમન્ન્ અઙ્ગદં પ્રતિ
પિતા હિ બન્ધુઃ પુત્રસ્ય ન માતા હરિસત્તમ

ન હિ મમ હરિરાજસંશ્રયાત્ ક્ષમતરમ્ અસ્તિ પરત્ર ચેહ વા
અભિમુખહતવીરસેવિતં શયનમ્ ઇદં મમ સેવિતું ક્ષમમ્