રામાયણ · અધ્યાય 4.014

સર્વે તે ત્વરિતં ગત્વા કિષ્કિન્ધાં વાલિપાલિતામ્
વૃક્ષૈર્ આત્માનમ્ આવૃત્ય વ્યતિષ્ઠન્ ગહને વને

વિચાર્ય સર્વતો દૃષ્ટિં કાનને કાનનપ્રિયઃ
સુગ્રીવો વિપુલગ્રીવઃ ક્રોધમ્ આહારયદ્ ભૃશમ્

તતઃ સ નિનદં ઘોરં કૃત્વા યુદ્ધાય ચાહ્વયત્
પરિવારૈઃ પરિવૃતો નાદૈર્ ભિન્દન્ન્ ઇવામ્બરમ્

અથ બાલાર્કસદૃશો દૃપ્તસિંહગતિસ્ તદા
દૃષ્ટ્વા રામં ક્રિયાદક્ષં સુગ્રીવો વાક્યમ્ અબ્રવીત્

હરિવાગુરયા વ્યાપ્તં તપ્તકાઞ્ચનતોરણામ્
પ્રાપ્તાઃ સ્મ ધ્વજયન્ત્રાઢ્યાં કિષ્કિન્ધાં વાલિનઃ પુરીમ્

પ્રતિજ્ઞા યા ત્વયા વીર કૃતા વાલિવધે પુરા
સફલાં તાં કુરુ ક્ષિપ્રં લતાં કાલ ઇવાગતઃ

એવમ્ ઉક્તસ્ તુ ધર્માત્મા સુગ્રીવેણ સ રાઘવઃ
તમ્ અથોવાચ સુગ્રીવં વચનં શત્રુસૂદનઃ

કૃતાભિજ્ઞાન ચિહ્નસ્ ત્વમ્ અનયા ગજસાહ્વયા
વિપરીત ઇવાકાશે સૂર્યો નક્ષત્ર માલયા

અદ્ય વાલિસમુત્થં તે ભયં વૈરં ચ વાનર
એકેનાહં પ્રમોક્ષ્યામિ બાણમોક્ષેણ સંયુગે

મમ દર્શય સુગ્રીવવૈરિણં ભ્રાતૃરૂપિણમ્
વાલી વિનિહતો યાવદ્ વને પાંસુષુ વેષ્ટતે

યદિ દૃષ્ટિપથં પ્રાપ્તો જીવન્ સ વિનિવર્તતે
તતો દોષેણ મા ગચ્છેત્ સદ્યો ગર્હેચ્ ચ મા ભવાન્

પ્રત્યક્ષં સપ્ત તે સાલા મયા બાણેન દારિતાઃ
તતો વેત્સિ બલેનાદ્ય બાલિનં નિહતં મયા

અનૃતં નોક્તપૂર્વં મે વીર કૃચ્છ્રે ઽપિ તિષ્ઠતા
ધર્મલોભપરીતેન ન ચ વક્ષ્યે કથં ચન

સફલાં ચ કરિષ્યામિ પ્રતિજ્ઞાં જહિ સંભ્રમમ્
પ્રસૂતં કલમં ક્ષેત્રે વર્ષેણેવ શતક્રતુઃ

તદાહ્વાનનિમિત્તં ત્વં વાલિનો હેમમાલિનઃ
સુગ્રીવ કુરુ તં શબ્દં નિષ્પતેદ્ યેન વાનરઃ

જિતકાશી જયશ્લાઘી ત્વયા ચાધર્ષિતઃ પુરાત્
નિષ્પતિષ્યત્ય્ અસંગેન વાલી સ પ્રિયસંયુગઃ

રિપૂણાં ધર્ષણં શૂરા મર્ષયન્તિ ન સંયુગે
જાનન્તસ્ તુ સ્વકં વીર્યં સ્ત્રીસમક્ષં વિશેષતઃ

સ તુ રામવચઃ શ્રુત્વા સુગ્રીવો હેમપિઙ્ગલઃ
નનર્દ ક્રૂરનાદેન વિનિર્ભિન્દન્ન્ ઇવામ્બરમ્

તસ્ય શબ્દેન વિત્રસ્તા ગાવો યાન્તિ હતપ્રભાઃ
રાજદોષપરામૃષ્ટાઃ કુલસ્ત્રિય ઇવાકુલાઃ

દ્રવન્તિ ચ મૃગાઃ શીઘ્રં ભગ્ના ઇવ રણે હયાઃ
પતન્તિ ચ ખગા ભૂમૌ ક્ષીણપુણ્યા ઇવ ગ્રહાઃ

તતઃ સ જીમૂતગણપ્રણાદો નાદં વ્યમુઞ્ચત્ ત્વરયા પ્રતીતઃ
સૂર્યાત્મજઃ શૌર્યવિવૃદ્ધતેજાઃ સરિત્પતિર્ વાનિલચઞ્ચલોર્મિઃ