રામાયણ · અધ્યાય 4.006

અયમ્ આખ્યાતિ મે રામ સચિવો મન્ત્રિસત્તમઃ
હનુમાન્ યન્નિમિત્તં ત્વં નિર્જનં વનમ્ આગતઃ

લક્ષ્મણેન સહ ભ્રાત્રા વસતશ્ ચ વને તવ
રક્ષસાપહૃતા ભાર્યા મૈથિલી જનકાત્મજા

ત્વયા વિયુક્તા રુદતી લક્ષ્મણેન ચ ધીમતા
અન્તરં પ્રેપ્સુના તેન હત્વા ગૃધ્રં જટાયુષમ્

ભાર્યાવિયોગજં દુઃખં નચિરાત્ ત્વં વિમોક્ષ્યસે
અહં તામ્ આનયિષ્યામિ નષ્ટાં વેદશ્રુતિં યથા

રસાતલે વા વર્તન્તીં વર્તન્તીં વા નભસ્તલે
અહમ્ આનીય દાસ્યામિ તવ ભાર્યામ્ અરિંદમ

ઇદં તથ્યં મમ વચસ્ ત્વમ્ અવેહિ ચ રાઘવ
ત્યજ શોકં મહાબાહો તાં કાન્તામ્ આનયામિ તે

અનુમાનાત્ તુ જાનામિ મૈથિલી સા ન સંશયઃ
હ્રિયમાણા મયા દૃષ્ટા રક્ષસા ક્રૂરકર્મણા

ક્રોશન્તી રામ રામેતિ લક્ષ્મણેતિ ચ વિસ્વરમ્
સ્ફુરન્તી રાવણસ્યાઙ્કે પન્નગેન્દ્રવધૂર્ યથા

આત્મના પઞ્ચમં માં હિ દૃષ્ટ્વા શૈલતટે સ્થિતમ્
ઉત્તરીયં તયા ત્યક્તં શુભાન્ય્ આભરણાનિ ચ

તાન્ય્ અસ્માભિર્ ગૃહીતાનિ નિહિતાનિ ચ રાઘવ
આનયિષ્યામ્ય્ અહં તાનિ પ્રત્યભિજ્ઞાતુમ્ અર્હસિ

તમ્ અબ્રવીત્ તતો રામઃ સુગ્રીવં પ્રિયવાદિનમ્
આનયસ્વ સખે શીઘ્રં કિમર્થં પ્રવિલમ્બસે

એવમ્ ઉક્તસ્ તુ સુગ્રીવઃ શૈલસ્ય ગહનાં ગુહામ્
પ્રવિવેશ તતઃ શીઘ્રં રાઘવપ્રિયકામ્યયા

ઉત્તરીયં ગૃહીત્વા તુ શુભાન્ય્ આભરણાનિ ચ
ઇદં પશ્યેતિ રામાય દર્શયામ્ આસ વાનરઃ

તતો ગૃહીત્વા તદ્વાસઃ શુભાન્ય્ આભરણાનિ ચ
અભવદ્ બાષ્પસંરુદ્ધો નીહારેણેવ ચન્દ્રમાઃ

સીતાસ્નેહપ્રવૃત્તેન સ તુ બાષ્પેણ દૂષિતઃ
હા પ્રિયેતિ રુદન્ ધૈર્યમ્ ઉત્સૃજ્ય ન્યપતત્ ક્ષિતૌ

હૃદિ કૃત્વા સ બહુશસ્ તમ્ અલંકારમ્ ઉત્તમમ્
નિશશ્વાસ ભૃશં સર્પો બિલસ્થ ઇવ રોષિતઃ

અવિચ્છિન્નાશ્રુવેગસ્ તુ સૌમિત્રિં વીક્ષ્ય પાર્શ્વતઃ
પરિદેવયિતું દીનં રામઃ સમુપચક્રમે

પશ્ય લક્ષ્મણ વૈદેહ્યા સંત્યક્તં હ્રિયમાણયા
ઉત્તરીયમ્ ઇદં ભૂમૌ શરીરાદ્ ભૂષણાનિ ચ

શાદ્વલિન્યાં ધ્રુવં ભૂમ્યાં સીતયા હ્રિયમાણયા
ઉત્સૃષ્ટં ભૂષણમ્ ઇદં તથારૂપં હિ દૃશ્યતે

બ્રૂહિ સુગ્રીવ કં દેશં હ્રિયન્તી લક્ષિતા ત્વયા
રક્ષસા રૌદ્રરૂપેણ મમ પ્રાણસમા પ્રિયા

ક્વ વા વસતિ તદ્ રક્ષો મહદ્ વ્યસનદં મમ
યન્નિમિત્તમ્ અહં સર્વાન્ નાશયિષ્યામિ રાક્ષસાન્

હરતા મૈથિલીં યેન માં ચ રોષયતા ભૃશમ્
આત્મનો જીવિતાન્તાય મૃત્યુદ્વારમ્ અપાવૃતમ્

મમ દયિતતમા હૃતા વનાદ્ રજનિચરેણ વિમથ્ય યેન સા
કથય મમ રિપું તમ્ અદ્ય વૈ પ્રવગપતે યમસંનિધિં નયામિ