રામાયણ · અધ્યાય 4.005

ઋશ્યમૂકાત્ તુ હનુમાન્ ગત્વા તં મલયં ગિરમ્
આચચક્ષે તદા વીરૌ કપિરાજાય રાઘવૌ

અયં રામો મહાપ્રાજ્ઞઃ સંપ્રાપ્તો દૃઢવિક્રમઃ
લક્ષ્મણેન સહ ભ્રાત્રા રામો ઽયં સત્યવિક્રમઃ

ઇક્ષ્વાકૂણાં કુલે જાતો રામો દશરથાત્મજઃ
ધર્મે નિગદિતશ્ ચૈવ પિતુર્ નિર્દેશપાલકઃ

તસ્યાસ્ય વસતો ઽરણ્યે નિયતસ્ય મહાત્મનઃ
રક્ષસાપહૃતા ભાર્યા સ ત્વાં શરણમ્ આગતઃ

રાજસૂયાશ્વમેધૈશ્ ચ વહ્નિર્ યેનાભિતર્પિતઃ
દક્ષિણાશ્ ચ તથોત્સૃષ્ટા ગાવઃ શતસહસ્રશઃ

તપસા સત્યવાક્યેન વસુધા યેન પાલિતા
સ્ત્રીહેતોસ્ તસ્ય પુત્રો ઽયં રામસ્ ત્વાં શરણં ગતઃ

ભવતા સખ્યકામૌ તૌ ભ્રાતરૌ રામલક્ષ્મણૌ
પ્રતિગૃહ્યાર્ચયસ્વેમૌ પૂજનીયતમાવ્ ઉભૌ

શ્રુત્વા હનુમતો વાક્યં સુગ્રીવો હૃષ્ટમાનસઃ
ભયં સ રાઘવાદ્ ઘોરં પ્રજહૌ વિગતજ્વરઃ

સ કૃત્વા માનુષં રૂપં સુગ્રીવઃ પ્લવગાધિપઃ
દર્શનીયતમો ભૂત્વા પ્રીત્યા પ્રોવાચ રાઘવમ્

ભવાન્ ધર્મવિનીતશ્ ચ વિક્રાન્તઃ સર્વવત્સલઃ
આખ્યાતા વાયુપુત્રેણ તત્ત્વતો મે ભવદ્ગુણાઃ

તન્ મમૈવૈષ સત્કારો લાભશ્ ચૈવોત્તમઃ પ્રભો
યત્ ત્વમ્ ઇચ્છસિ સૌહાર્દં વાનરેણ મયા સહ

રોચતે યદિ વા સખ્યં બાહુર્ એષ પ્રસારિતઃ
ગૃહ્યતાં પાણિના પાણિર્ મર્યાદા વધ્યતાં ધ્રુવા

એતત્ તુ વચનં શ્રુત્વા સુગ્રીવસ્ય સુભાષિતમ્
સંપ્રહૃષ્ટમના હસ્તં પીડયામ્ આસ પાણિના
હૃદ્યં સૌહૃદમ્ આલમ્બ્ય પર્યષ્વજત પીડિતમ્

તતો હનૂમાન્ સંત્યજ્ય ભિક્ષુરૂપમ્ અરિંદમઃ
કાષ્ઠયોઃ સ્વેન રૂપેણ જનયામ્ આસ પાવકમ્

દીપ્યમાનં તતો વહ્નિં પુષ્પૈર્ અભ્યર્ચ્ય સત્કૃતમ્
તયોર્ મધ્યે તુ સુપ્રીતો નિદધે સુસમાહિતઃ

તતો ઽગ્નિં દીપ્યમાનં તૌ ચક્રતુશ્ ચ પ્રદક્ષિણમ્
સુગ્રીવો રાઘવશ્ ચૈવ વયસ્યત્વમ્ ઉપાગતૌ

તતઃ સુપ્રીત મનસૌ તાવ્ ઉભૌ હરિરાઘવૌ
અન્યોન્યમ્ અભિવીક્ષન્તૌ ન તૃપ્તિમ્ ઉપજગ્મતુઃ

તતઃ સર્વાર્થવિદ્વાંસં રામં દશરથાત્મજમ્
સુગ્રીવઃ પ્રાહ તેજસ્વી વાક્યમ્ એકમનાસ્ તદા