રામાયણ · અધ્યાય 3.055

રાક્ષસં મૃગરૂપેણ ચરન્તં કામરૂપિણમ્
નિહત્ય રામો મારીચં તૂર્ણં પથિ ન્યવર્તત

તસ્ય સંત્વરમાણસ્ય દ્રષ્ટુકામસ્ય મૈથિલીમ્
ક્રૂરસ્વરો ઽથ ગોમાયુર્ વિનનાદાસ્ય પૃષ્ઠતઃ

સ તસ્ય સ્વરમ્ આજ્ઞાય દારુણં રોમહર્ષણમ્
ચિન્તયામ્ આસ ગોમાયોઃ સ્વરેણ પરિશઙ્કિતઃ

અશુભં બત મન્યે ઽહં ગોમાયુર્ વાશ્યતે યથા
સ્વસ્તિ સ્યાદ્ અપિ વૈદેહ્યા રાક્ષસૈર્ ભક્ષણં વિના

મારીચેન તુ વિજ્ઞાય સ્વરમ્ આલક્ષ્ય મામકમ્
વિક્રુષ્ટં મૃગરૂપેણ લક્ષ્મણઃ શૃણુયાદ્ યદિ

સ સૌમિત્રિઃ સ્વરં શ્રુત્વા તાં ચ હિત્વાથ મૈથિલીમ્
તયૈવ પ્રહિતઃ ક્ષિપ્રં મત્સકાશમ્ ઇહૈષ્યતિ

રાક્ષસૈઃ સહિતૈર્ નૂનં સીતાયા ઈપ્સિતો વધઃ
કાઞ્ચનશ્ ચ મૃગો ભૂત્વા વ્યપનીયાશ્રમાત્ તુ મામ્

દૂરં નીત્વા તુ મારીચો રાક્ષસો ઽભૂચ્ છરાહતઃ
હા લક્ષ્મણ હતો ઽસ્મીતિ યદ્ વાક્યં વ્યજહાર હ

અપિ સ્વસ્તિ ભવેદ્ દ્વાભ્યાં રહિતાભ્યાં મયા વને
જનસ્થાનનિમિત્તં હિ કૃતવૈરો ઽસ્મિ રાક્ષસૈઃ
નિમિત્તાનિ ચ ઘોરાણિ દૃશ્યન્તે ઽદ્ય બહૂનિ ચ

ઇત્ય્ એવં ચિન્તયન્ રામઃ શ્રુત્વા ગોમાયુનિઃસ્વનમ્
આત્મનશ્ ચાપનયનં મૃગરૂપેણ રક્ષસા
આજગામ જનસ્થાનં રાઘવઃ પરિશઙ્કિતઃ

તં દીનમાનસં દીનમ્ આસેદુર્ મૃગપક્ષિણઃ
સવ્યં કૃત્વા મહાત્માનં ઘોરાંશ્ ચ સસૃજુઃ સ્વરાન્

તાનિ દૃષ્ટ્વા નિમિત્તાનિ મહાઘોરાણિ રાઘવઃ
તતો લક્ષણમ્ આયાન્તં દદર્શ વિગતપ્રભમ્

તતો ઽવિદૂરે રામેણ સમીયાય સ લક્ષ્મણઃ
વિષણ્ણઃ સ વિષણ્ણેન દુઃખિતો દુઃખભાગિના

સંજગર્હે ઽથ તં ભ્રાતા જેષ્ઠો લક્ષ્મણમ્ આગતમ્
વિહાય સીતાં વિજને વને રાક્ષસસેવિતે

ગૃહીત્વા ચ કરં સવ્યં લક્ષ્મણં રઘુનન્દનઃ
ઉવાચ મધુરોદર્કમ્ ઇદં પરુષમ્ આર્તવત્

અહો લક્ષ્મણ ગર્હ્યં તે કૃતં યત્ ત્વં વિહાય તામ્
સીતામ્ ઇહાગતઃ સૌમ્ય કચ્ચિત્ સ્વસ્તિ ભવેદ્ ઇતિ

ન મે ઽસ્તિ સંશયો વીર સર્વથા જનકાત્મજા
વિનષ્ટા ભક્ષિતા વાપ રાક્ષસૈર્ વનચારિભિઃ

અશુભાન્ય્ એવ ભૂયિષ્ઠં યથા પ્રાદુર્ભવન્તિ મે
અપિ લક્ષ્મણ સીતાયાઃ સામગ્ર્યં પ્રાપ્નુયાવહે

ઇદં હિ રક્ષોમૃગસંનિકાશં પ્રલોભ્ય માં દૂરમ્ અનુપ્રયાતમ્
હતં કથં ચિન્ મહતા શ્રમેણ સ રાક્ષસો ઽભૂન્ મ્રિયમાણ એવ

મનશ્ ચ મે દીનમ્ ઇહાપ્રહૃષ્ટં ચક્ષુશ્ ચ સવ્યં કુરુતે વિકારમ્
અસંશયં લક્ષ્મણ નાસ્તિ સીતા હૃતા મૃતા વા પથિ વર્તતે વા