રામાયણ · અધ્યાય 3.053

સંદિશ્ય રાક્ષસાન્ ઘોરાન્ રાવણો ઽષ્ટૌ મહાબલાન્
આત્માનં બુદ્ધિવૈક્લવ્યાત્ કૃતકૃત્યમ્ અમન્યત

સ ચિન્તયાનો વૈદેહીં કામબાણસમર્પિતઃ
પ્રવિવેશ ગૃહં રમ્યં સીતાં દ્રષ્ટુમ્ અભિત્વરન્

સ પ્રવિશ્ય તુ તદ્વેશ્મ રાવણો રાક્ષસાધિપઃ
અપશ્યદ્ રાક્ષસીમધ્યે સીતાં શોકપરાયણમ્

અશ્રુપૂર્ણમુખીં દીનાં શોકભારાવપીડિતામ્
વાયુવેગૈર્ ઇવાક્રાન્તાં મજ્જન્તીં નાવમ્ અર્ણવે

મૃગયૂથપરિભ્રષ્ટાં મૃગીં શ્વભિર્ ઇવાવૃતામ્
અધોમુખમુખીં દીનામ્ અભ્યેત્ય ચ નિશાચરઃ

તાં તુ શોકવશાં દીનામ્ અવશાં રાક્ષસાધિપઃ
સ બલાદ્ દર્શયામ્ આસ ગૃહં દેવગૃહોપમમ્

હર્મ્યપ્રાસાદસંબધં સ્ત્રીસહસ્રનિષેવિતમ્
નાનાપક્ષિગણૈર્ જુષ્ટં નાનારત્નસમન્વિતમ્

કાઞ્ચનૈસ્ તાપનીયૈશ્ ચ સ્ફાટિકૈ રાજતૈસ્ તથા
વજ્રવૈદૂર્યચિત્રૈશ્ ચ સ્તમ્ભૈર્ દૃષ્ટિમનોહરૈઃ

દિવ્યદુન્દુભિનિર્હ્રાદં તપ્તકાઞ્ચનતોરણમ્
સોપાનં કાઞ્ચનં ચિત્રમ્ આરુરોહ તયા સહ

દાન્તકા રાજતાશ્ ચૈવ ગવાક્ષાઃ પ્રિયદર્શનાઃ
હેમજાલાવૃતાશ્ ચાસંસ્ તત્ર પ્રાસાદપઙ્ક્તયઃ

સુધામણિવિચિત્રાણિ ભૂમિભાગાનિ સર્વશઃ
દશગ્રીવઃ સ્વભવને પ્રાદર્શયત મૈથિલીમ્

દીર્ઘિકાઃ પુષ્કરિણ્યશ્ ચ નાનાપુષ્પસમાવૃતાઃ
રાવણો દર્શયામ્ આસ સીતાં શોકપરાયણામ્

દર્શયિત્વા તુ વૈદેહીં કૃત્સ્નં તદ્ ભવનોત્તમમ્
ઉવાચ વાક્યં પાપાત્મા રાવણો જનકાત્મજામ્

દશરાક્ષસકોટ્યશ્ ચ દ્વાવિંશતિર્ અથાપરાઃ
વર્જયિત્વા જરા વૃદ્ધાન્ બાલાંશ્ ચ રજનીચરાન્

તેષાં પ્રભુર્ અહં સીતે સર્વેષાં ભીમકર્મણામ્
સહસ્રમ્ એકમ્ એકસ્ય મમ કાર્યપુરઃસરમ્

યદ્ ઇદં રાજ્યતન્ત્રં મે ત્વયિ સર્વં પ્રતિષ્ઠિતમ્
જીવિતં ચ વિશાલાક્ષિ ત્વં મે પ્રાણૈર્ ગરીયસી

બહૂનાં સ્ત્રીસહસ્રાણાં મમ યો ઽસૌ પરિગ્રહઃ
તાસાં ત્વમ્ ઈશ્વરી સીતે મમ ભાર્યા ભવ પ્રિયે

સાધુ કિં તે ઽન્યયા બુદ્ધ્યા રોચયસ્વ વચો મમ
ભજસ્વ માભિતપ્તસ્ય પ્રસાદં કર્તુમ્ અર્હસિ

પરિક્ષિપ્તા સમુદ્રેણ લઙ્કેયં શતયોજના
નેયં ધર્ષયિતું શક્યા સેન્દ્રૈર્ અપિ સુરાસુરૈઃ

ન દેવેષુ ન યક્ષેષુ ન ગન્ધર્વેષુ નર્ષિષુ
અહં પશ્યામિ લોકેષુ યો મે વીર્યસમો ભવેત્

રાજ્યભ્રષ્ટેન દીનેન તાપસેન ગતાયુષા
કિં કરિષ્યસિ રામેણ માનુષેણાલ્પતેજસા

ભજસ્વ સીતે મામ્ એવ ભર્તાહં સદૃશસ્ તવ
યૌવનં હ્ય્ અધ્રુવં ભીરુ રમસ્વેહ મયા સહ

દર્શને મા કૃથા બુદ્ધિં રાઘવસ્ય વરાનને
કાસ્ય શક્તિર્ ઇહાગન્તુમ્ અપિ સીતે મનોરથૈઃ

ન શક્યો વાયુર્ આકાશે પાશૈર્ બદ્ધં મહાજવઃ
દીપ્યમાનસ્ય વાપ્ય્ અગ્નેર્ ગ્રહીતું વિમલાં શિખામ્

ત્રયાણામ્ અપિ લોકાનાં ન તં પશ્યામિ શોભને
વિક્રમેણ નયેદ્ યસ્ ત્વાં મદ્બાહુપરિપાલિતામ્

લઙ્કાયાં સુમહદ્ રાજ્યમ્ ઇદં ત્વમ્ અનુપાલય
અભિષેકોદકક્લિન્ના તુષ્ટા ચ રમયસ્વ મામ્

દુષ્કૃતં યત્ પુરા કર્મ વનવાસેન તદ્ ગતમ્
યશ્ ચ તે સુકૃતો ધર્મસ્ તસ્યેહ ફલમ્ આપ્નુહિ

ઇહ સર્વાણિ માલ્યાનિ દિવ્યગન્ધાનિ મૈથિલિ
ભૂષણાનિ ચ મુખ્યાનિ તાનિ સેવ મયા સહ

પુષ્પકં નામ સુશ્રોણિ ભ્રાતુર્ વૈશ્રવણસ્ય મે
વિમાનં રમણીયં ચ તદ્ વિમાનં મનોજવમ્

તત્ર સીતે મયા સાર્ધં વિહરસ્વ યથાસુખમ્
વદનં પદ્મસંકાશં વિમલં ચારુદર્શનમ્

શોકાર્તં તુ વરારોહે ન ભ્રાજતિ વરાનને
અલં વ્રીડેન વૈદેહિ ધર્મલોપ કૃતેન તે

આર્ષો ઽયં દૈવનિષ્યન્દો યસ્ ત્વામ્ અભિગમિષ્યતિ
એતૌ પાદૌ મયા સ્નિગ્ધૌ શિરોભિઃ પરિપીડિતૌ

પ્રસાદં કુરુ મે ક્ષિપ્રં વશ્યો દાસો ઽહમ્ અસ્મિ તે
નેમાઃ શૂન્યા મયા વાચઃ શુષ્યમાણેન ભાષિતાઃ

ન ચાપિ રાવણઃ કાં ચિન્ મૂર્ધ્ના સ્ત્રીં પ્રણમેત હ
એવમ્ ઉક્ત્વા દશગ્રીવો મૈથિલીં જનકાત્મજામ્

કૃતાન્તવશમ્ આપન્નો મમેયમ્ ઇતિ મન્યતે