રામાયણ · અધ્યાય 3.030

તતઃ શૂર્પણખા દૃષ્ટ્વા સહસ્રાણિ ચતુર્દશ
હતાન્ય્ એકેન રામેણ રક્ષસાં ભીમકર્મણામ્

દૂષણં ચ ખરં ચૈવ હતં ત્રિશિરસં રણે
દૃષ્ટ્વા પુનર્ મહાનાદં નનાદ જલદોપમા

સા દૃષ્ટ્વા કર્મ રામસ્ય કૃતમ્ અન્યૈઃ સુદુષ્કરમ્
જગામ પરમૌદ્વિગ્ના લઙ્કાં રાવણપાલિતામ્

સ દદર્શ વિમાનાગ્રે રાવણં દીપ્તતેજસં
ઉપોપવિષ્ટં સચિવૈર્ મરુદ્ભિર્ ઇવ વાસવમ્

આસીનં સૂર્યસંકાશે કાઞ્ચને પરમાસને
રુક્મવેદિગતં પ્રાજ્યં જ્વલન્તમ્ ઇવ પાવકમ્

દેવગન્ધર્વભૂતાનામ્ ઋષીણાં ચ મહાત્મનામ્
અજેયં સમરે શૂરં વ્યાત્તાનનમ્ ઇવાન્તકમ્

દેવાસુરવિમર્દેષુ વજ્રાશનિકૃતવ્રણમ્
ઐરાવતવિષાણાગ્રૈર્ ઉત્કૃષ્ટકિણવક્ષસં

વિંશદ્ભુજં દશગ્રીવં દર્શનીયપરિચ્છદમ્
વિશાલવક્ષસં વીરં રાજલક્ષ્મણલક્ષિતમ્

સ્નિગ્ધવૈદૂર્યસંકાશં તપ્તકાઞ્ચનકુણ્ડલમ્
સુભુજં શુક્લદશનં મહાસ્યં પર્વતોપમમ્

વિષ્ણુચક્રનિપાતૈશ્ ચ શતશો દેવસંયુગે
આહતાઙ્ગં સમસ્તૈશ્ ચ દેવપ્રહરણૈસ્ તથા

અક્ષોભ્યાણાં સમુદ્રાણાં ક્ષોભણં ક્ષિપ્રકારિણમ્
ક્ષેપ્તારં પર્વતાગ્રાણાં સુરાણાં ચ પ્રમર્દનમ્

ઉચ્છેત્તારં ચ ધર્માણાં પરદારાભિમર્શનમ્
સર્વદિવ્યાસ્ત્રયોક્તારં યજ્ઞવિઘ્નકરં સદા

પુરીં ભોગવતીં ગત્વા પરાજિત્ય ચ વાસુકિમ્
તક્ષકસ્ય પ્રિયાં ભાર્યાં પરાજિત્ય જહાર યઃ

કૈલાસં પર્વતં ગત્વા વિજિત્ય નરવાહનમ્
વિમાનં પુષ્પકં તસ્ય કામગં વૈ જહાર યઃ

વનં ચૈત્રરથં દિવ્યં નલિનીં નન્દનં વનમ્
વિનાશયતિ યઃ ક્રોધાદ્ દેવોદ્યાનાનિ વીર્યવાન્

ચન્દ્રસૂર્યૌ મહાભાગાવ્ ઉત્તિષ્ઠન્તૌ પરંતપૌ
નિવારયતિ બાહુભ્યાં યઃ શૈલશિખરોપમઃ

દશવર્ષસહસ્રાણિ તપસ્ તપ્ત્વા મહાવને
પુરા સ્વયમ્ભુવે ધીરઃ શિરાંસ્ય્ ઉપજહાર યઃ

દેવદાનવગન્ધર્વપિશાચપતગોરગૈઃ
અભયં યસ્ય સંગ્રામે મૃત્યુતો માનુષાદ્ ઋતે

મન્ત્રર્ અભિતુષ્ટં પુણ્યમ્ અધ્વરેષુ દ્વિજાતિભિઃ
હવિર્ધાનેષુ યઃ સોમમ્ ઉપહન્તિ મહાબલઃ

આપ્તયજ્ઞહરં ક્રૂરં બ્રહ્મઘ્નં દુષ્ટચારિણમ્
કર્કશં નિરનુક્રોશં પ્રજાનામ્ અહિતે રતમ્
રાવણં સર્વભૂતાનાં સર્વલોકભયાવહમ્

રાક્ષસી ભ્રાતરં ક્રૂરં સા દદર્શ મહાબલમ્
તં દિવ્યવસ્ત્રાભરણં દિવ્યમાલ્યોપશોભિતમ્
રાક્ષસેન્દ્રં મહાભાગં પૌલસ્ત્ય કુલનન્દનમ્

તમ્ અબ્રવીદ્ દીપ્તવિશાલલોચનં પ્રદર્શયિત્વા ભયમોહમૂર્છિતા
સુદારુણં વાક્યમ્ અભીતચારિણી મહાત્મના શૂર્પણખા વિરૂપિતા