રામાયણ · અધ્યાય 3.020

સ પુનઃ પતિતાં દૃષ્ટ્વા ક્રોધાચ્ છૂર્પણખાં ખરઃ
ઉવાચ વ્યક્તતા વાચા તામ્ અનર્થાર્થમ્ આગતામ્

મયા ત્વ્ ઇદાનીં શૂરાસ્ તે રાક્ષસા રુધિરાશનાઃ
ત્વત્પ્રિયાર્થં વિનિર્દિષ્ટાઃ કિમર્થં રુદ્યતે પુનઃ

ભક્તાશ્ ચૈવાનુરક્તાશ્ ચ હિતાશ્ ચ મમ નિત્યશઃ
ઘ્નન્તો ઽપિ ન નિહન્તવ્યા ન ન કુર્યુર્ વચો મમ

કિમ્ એતચ્ છ્રોતુમ્ ઇચ્છામિ કારણં યત્કૃતે પુનઃ
હા નાથેતિ વિનર્દન્તી સર્પવદ્ વેષ્ટસે ક્ષિતૌ

અનાથવદ્ વિલપસિ કિં નુ નાથે મયિ સ્થિતે
ઉત્તિષ્ઠોત્તિષ્ઠ મા ભૈષીર્ વૈક્લવ્યં ત્યજ્યતામ્ ઇહ

ઇત્ય્ એવમ્ ઉક્તા દુર્ધર્ષા ખરેણ પરિસાન્ત્વિતા
વિમૃજ્ય નયને સાસ્રે ખરં ભ્રાતરમ્ અબ્રવીત્

પ્રેષિતાશ્ ચ ત્વયા શૂરા રાક્ષસાસ્ તે ચતુર્દશ
નિહન્તું રાઘવં ઘોરા મત્પ્રિયાર્થં સલક્ષ્મણમ્

તે તુ રામેણ સામર્ષાઃ શૂલપટ્ટિશપાણયઃ
સમરે નિહતાઃ સર્વે સાયકૈર્ મર્મભેદિભિઃ

તાન્ ભૂમૌ પતિતાન્ દૃષ્ટ્વા ક્ષણેનૈવ મહાબલાન્
રામસ્ય ચ મહત્ કર્મ મહાંસ્ ત્રાસો ઽભવન્ મમ

સાસ્મિ ભીતા સમુદ્વિગ્ના વિષણ્ણા ચ નિશાચર
શરણં ત્વાં પુનઃ પ્રાપ્તા સર્વતો ભયદર્શિની

વિષાદનક્રાધ્યુષિતે પરિત્રાસોર્મિમાલિનિ
કિં માં ન ત્રાયસે મગ્નાં વિપુલે શોકસાગરે

એતે ચ નિહતા ભૂમૌ રામેણ નિશિતૈઃ શરૈઃ
યે ચ મે પદવીં પ્રાપ્તા રાક્ષસાઃ પિશિતાશનાઃ

મયિ તે યદ્ય્ અનુક્રોશો યદિ રક્ષઃસુ તેષુ ચ
રામેણ યદિ શક્તિસ્ તે તેજો વાસ્તિ નિશાચર
દણ્ડકારણ્યનિલયં જહિ રાક્ષસકણ્ટકમ્

યદિ રામં મમામિત્રમ્ અદ્ય ત્વં ન વધિષ્યસિ
તવ ચૈવાગ્રતઃ પ્રાણાંસ્ ત્યક્ષ્યામિ નિરપત્રપા

બુદ્ધ્યાહમ્ અનુપશ્યામિ ન ત્વં રામસ્ય સંયુગે
સ્થાતું પ્રતિમુખે શક્તઃ સચાપસ્ય મહારણે

શૂરમાની ન શૂરસ્ ત્વં મિથ્યારોપિતવિક્રમઃ
માનુષૌ યન્ ન શક્નોષિ હન્તું તૌ રામલક્ષ્મણૌ

અપયાહિ જનસ્થાનાત્ ત્વરિતઃ સહબાન્ધવઃ
નિઃસત્ત્વસ્યાલ્પવીર્યસ્ય વાસસ્ તે કીદૃશસ્ ત્વ્ ઇહ

રામતેજોઽભિભૂતો હિ ત્વં ક્ષિપ્રં વિનશિષ્યસિ
સ હિ તેજઃસમાયુક્તો રામો દશરથાત્મજઃ
ભ્રાતા ચાસ્ય મહાવીર્યો યેન ચાસ્મિ વિરૂપિતા