રામાયણ · અધ્યાય 3.012

રામ પ્રીતો ઽસ્મિ ભદ્રં તે પરિતુષ્ટો ઽસ્મિ લક્ષ્મણ
અભિવાદયિતું યન્ માં પ્રાપ્તૌ સ્થઃ સહ સીતયા

અધ્વશ્રમેણ વાં ખેદો બાધતે પ્રચુરશ્રમઃ
વ્યક્તમ્ ઉત્કણ્ઠતે ચાપિ મૈથિલી જનકાત્મજા

એષા હિ સુકુમારી ચ દુઃખૈશ્ ચ ન વિમાનિતા
પ્રાજ્યદોષં વનં પ્રપ્તા ભર્તૃસ્નેહપ્રચોદિતા

યથૈષા રમતે રામ ઇહ સીતા તથા કુરુ
દુષ્કરં કૃતવત્ય્ એષા વને ત્વામ્ અનુગચ્છતી

એષા હિ પ્રકૃતિઃ સ્ત્રીણામ્ આસૃષ્ટે રઘુનન્દન
સમસ્થમ્ અનુરજ્યન્તે વિષમસ્થં ત્યજન્તિ ચ

શતહ્રદાનાં લોલત્વં શસ્ત્રાણાં તીક્ષ્ણતાં તથા
ગરુડાનિલયોઃ શૈઘ્ર્યમ્ અનુગચ્છન્તિ યોષિતઃ

ઇયં તુ ભવતો ભાર્યા દોષૈર્ એતૈર્ વિવર્જિતાઃ
શ્લાઘ્યા ચ વ્યપદેશ્યા ચ યથા દેવી હ્ય્ અરુન્ધતી

અલંકૃતો ઽયં દેશશ્ ચ યત્ર સૌમિત્રિણા સહ
વૈદેહ્યા ચાનયા રામ વત્સ્યસિ ત્વમ્ અરિંદમ

એવમ્ ઉક્તસ્ તુ મુનિના રાઘવઃ સંયતાઞ્જલિઃ
ઉવાચ પ્રશ્રિતં વાક્યમ્ ઋષિં દીપ્તમ્ ઇવાનલમ્

ધન્યો ઽસ્મ્ય્ અનુગૃહીતો ઽસ્મિ યસ્ય મે મુનિપુંગવઃ
ગુણૈઃ સભ્રાતૃભાર્યસ્ય વરદઃ પરિતુષ્યતિ

કિં તુ વ્યાદિશ મે દેશં સોદકં બહુકાનનમ્
યત્રાશ્રમપદં કૃત્વા વસેયં નિરતઃ સુખમ્

તતો ઽબ્રવીન્ મુનિ શ્રેષ્ઠઃ શ્રુત્વા રામસ્ય ભાષિતમ્
ધ્યાત્વા મુહૂર્તં ધર્માત્મા ધીરો ધીરતરં વચઃ

ઇતો દ્વિયોજને તાત બહુમૂલફલોદકઃ
દેશો બહુમૃગઃ શ્રીમાન્ પઞ્ચવટ્ય્ અભિવિશ્રુતઃ

તત્ર ગત્વાશ્રમપદં કૃત્વા સૌમિત્રિણા સહ
રમસ્વ ત્વં પિતુર્ વાક્યં યથોક્તમ્ અનુપાલયન્

વિદિતો હ્ય્ એષ વૃત્તાન્તો મમ સર્વસ્ તવાનઘ
તપસશ્ ચ પ્રભાવેન સ્નેહાદ્ દશરથસ્ય ચ

હૃદયસ્થશ્ ચ તે છન્દો વિજ્ઞાતસ્ તપસા મયા
ઇહ વાસં પ્રતિજ્ઞાય મયા સહ તપોવને

અતશ્ ચ ત્વામ્ અહં બ્રૂમિ ગચ્છ પઞ્ચવટીમ્ ઇતિ
સ હિ રમ્યો વનોદ્દેશો મૈથિલી તત્ર રંસ્યતે

સ દેશઃ શ્લાઘનીયશ્ ચ નાતિદૂરે ચ રાઘવ
ગોદાવર્યાઃ સમીપે ચ મૈથિલી તત્ર રંસ્યતે

પ્રાજ્યમૂલફલૈશ્ ચૈવ નાનાદ્વિજ ગણૈર્ યુતઃ
વિવિક્તશ્ ચ મહાબાહો પુણ્યો રમ્યસ્ તથૈવ ચ

ભવાન્ અપિ સદારશ્ ચ શક્તશ્ ચ પરિરક્ષણે
અપિ ચાત્ર વસન્ રામસ્ તાપસાન્ પાલયિષ્યસિ

એતદ્ આલક્ષ્યતે વીર મધુકાનાં મહદ્ વનમ્
ઉત્તરેણાસ્ય ગન્તવ્યં ન્યગ્રોધમ્ અભિગચ્છતા

તતઃ સ્થલમ્ ઉપારુહ્ય પર્વતસ્યાવિદૂરતઃ
ખ્યાતઃ પઞ્ચવટીત્ય્ એવ નિત્યપુષ્પિતકાનનઃ

અગસ્ત્યેનૈવમ્ ઉક્તસ્ તુ રામઃ સૌમિત્રિણા સહ
સાત્કૃત્યામન્ત્રયામ્ આસ તમ્ ઋષિં સત્યવાદિનમ્

તૌ તુ તેનાભ્યનુજ્ઞાતૌ કૃતપાદાભિવન્દનૌ
તદાશ્રમાત્ પઞ્ચવટીં જગ્મતુઃ સહ સીતયા

ગૃહીતચાપૌ તુ નરાધિપાત્મજૌ વિષક્તતૂણી સમરેષ્વ્ અકાતરૌ
યથોપદિષ્ટેન પથા મહર્ષિણા પ્રજગ્મતુઃ પઞ્ચવટીં સમાહિતૌ