રામાયણ · અધ્યાય 3.009

વાક્યમ્ એતત્ તુ વૈદેહ્યા વ્યાહૃતં ભર્તૃભક્તયા
શ્રુત્વા ધર્મે સ્થિતો રામઃ પ્રત્યુવાચાથ મૈથિલીમ્

હિતમ્ ઉક્તં ત્વયા દેવિ સ્નિગ્ધયા સદૃશં વચઃ
કુલં વ્યપદિશન્ત્યા ચ ધર્મજ્ઞે જનકાત્મજે

કિં તુ વક્ષ્યામ્ય્ અહં દેવિ ત્વયૈવોક્તમ્ ઇદં વચઃ
ક્ષત્રિયૈર્ ધાર્યતે ચાપો નાર્તશબ્દો ભવેદ્ ઇતિ

તે ચાર્તા દણ્ડકારણ્યે મુનયઃ સંશિતવ્રતાઃ
માં સીતે સ્વયમ્ આગમ્ય શરણ્યાઃ શરણં ગતાઃ

વસન્તો ધર્મનિરતા વને મૂલફલાશનાઃ
ન લભન્તે સુખં ભીતા રાક્ષસૈઃ ક્રૂરકર્મભિઃ

કાલે કાલે ચ નિરતા નિયમૈર્ વિવિધૈર્ વને
ભક્ષ્યન્તે રાક્ષસૈર્ ભીમૈર્ નરમાંસોપજીવિભિઃ

તે ભક્ષ્યમાણા મુનયો દણ્ડકારણ્યવાસિનઃ
અસ્માન્ અભ્યવપદ્યેતિ મામ્ ઊચુર્ દ્વિજસત્તમાઃ

મયા તુ વચનં શ્રુત્વા તેષામ્ એવં મુખાચ્ ચ્યુતમ્
કૃત્વા ચરણશુશ્રૂષાં વાક્યમ્ એતદ્ ઉદાહૃતમ્

પ્રસીદન્તુ ભવન્તો મે હ્રીર્ એષા હિ મમાતુલા
યદીદૃશૈર્ અહં વિપ્રૈર્ ઉપસ્થેયૈર્ ઉપસ્થિતઃ
કિં કરોમીતિ ચ મયા વ્યાહૃતં દ્વિજસંનિધૌ

સર્વૈર્ એવ સમાગમ્ય વાગ્ ઇયં સમુદાહૃતા
રાક્ષસૈર્ દણ્ડકારણ્યે બહુભિઃ કામરૂપિભિઃ
અર્દિતાઃ સ્મ ભૃશં રામ ભવાન્ નસ્ ત્રાતુમ્ અર્હતિ

હોમકાલે તુ સંપ્રાપ્તે પર્વકાલેષુ ચાનઘ
ધર્ષયન્તિ સ્મ દુર્ધર્ષા રાક્ષસાઃ પિશિતાશનાઃ

રાક્ષસૈર્ ધર્ષિતાનાં ચ તાપસાનાં તપસ્વિનામ્
ગતિં મૃગયમાણાનાં ભવાન્ નઃ પરમા ગતિઃ

કામં તપઃ પ્રભાવેન શક્તા હન્તું નિશાચરાન્
ચિરાર્જિતં તુ નેચ્છામસ્ તપઃ ખણ્ડયિતું વયમ્

બહુવિઘ્નં તપોનિત્યં દુશ્ચરં ચૈવ રાઘવ
તેન શાપં ન મુઞ્ચામો ભક્ષ્યમાણાશ્ ચ રાક્ષસૈઃ

તદ્ અર્દ્યમાનાન્ રક્ષોભિર્ દણ્ડકારણ્યવાસિભિઃ
રક્ષનસ્ ત્વં સહ ભ્રાત્રા ત્વન્નાથા હિ વયં વને

મયા ચૈતદ્ વચઃ શ્રુત્વા કાર્ત્સ્ન્યેન પરિપાલનમ્
ઋષીણાં દણ્ડકારણ્યે સંશ્રુતં જનકાત્મજે

સંશ્રુત્ય ચ ન શક્ષ્યામિ જીવમાનઃ પ્રતિશ્રવમ્
મુનીનામ્ અન્યથા કર્તું સત્યમ્ ઇષ્ટં હિ મે સદા

અપ્ય્ અહં જીવિતં જહ્યાં ત્વાં વા સીતે સલક્ષ્મણામ્
ન તુ પ્રતિજ્ઞાં સંશ્રુત્ય બ્રાહ્મણેભ્યો વિશેષતઃ

તદ્ અવશ્યં મયા કાર્યમ્ ઋષીણાં પરિપાલનમ્
અનુક્તેનાપિ વૈદેહિ પ્રતિજ્ઞાય તુ કિં પુનઃ

મમ સ્નેહાચ્ ચ સૌહાર્દાદ્ ઇદમ્ ઉક્તં ત્વયા વચઃ
પરિતુષ્ટો ઽસ્મ્ય્ અહં સીતે ન હ્ય્ અનિષ્ટો ઽનુશિષ્યતે
સદૃશં ચાનુરૂપં ચ કુલસ્ય તવ શોભને

ઇત્ય્ એવમ્ ઉક્ત્વા વચનં મહાત્મા સીતાં પ્રિયાં મૈથિલ રાજપુત્રીમ્
રામો ધનુષ્માન્ સહલક્ષ્મણેન જગામ રમ્યાણિ તપોવનાનિ