રામાયણ · અધ્યાય 3.007

રામસ્ તુ સહસૌમિત્રિઃ સુતીક્ષ્ણેનાભિપૂજિતઃ
પરિણમ્ય નિશાં તત્ર પ્રભાતે પ્રત્યબુધ્યત

ઉત્થાય તુ યથાકાલં રાઘવઃ સહ સીતયા
ઉપાસ્પૃશત્ સુશીતેન જલેનોત્પલગન્ધિના

અથ તે ઽગ્નિં સુરાંશ્ ચૈવ વૈદેહી રામલક્ષ્મણૌ
કાલ્યં વિધિવદ્ અભ્યર્ચ્ય તપસ્વિશરણે વને

ઉદયન્ન્તં દિનકરં દૃષ્ટ્વા વિગતકલ્મષાઃ
સુતીક્ષ્ણમ્ અભિગમ્યેદં શ્લક્ષ્ણં વચનમ્ અબ્રુવન્

સુખોષિતાઃ સ્મ ભગવંસ્ ત્વયા પૂજ્યેન પૂજિતાઃ
આપૃચ્છામઃ પ્રયાસ્યામો મુનયસ્ ત્વરયન્તિ નઃ

ત્વરામહે વયં દ્રષ્ટું કૃત્સ્નમ્ આશ્રમમણ્ડલમ્
ઋષીણાં પુણ્યશીલાનાં દણ્ડકારણ્યવાસિનામ્

અભ્યનુજ્ઞાતુમ્ ઇચ્છામઃ સહૈભિર્ મુનિપુઙ્ગવૈઃ
ધર્મનિત્યૈસ્ તપોદાન્તૈર્ વિશિખૈર્ ઇવ પાવકૈઃ

અવિષહ્યાતપો યાવત્ સૂર્યો નાતિવિરાજિતે
અમાર્ગેણાગતાં લક્ષ્મીં પ્રાપ્યેવાન્વયવર્જિતઃ

તાવદ્ ઇચ્છામહે ગન્તુમ્ ઇત્ય્ ઉક્ત્વા ચરણૌ મુનેઃ
વવન્દે સહસૌમિત્રિઃ સીતયા સહ રાઘવઃ

તૌ સંસ્પૃશન્તૌ ચરણાવ્ ઉત્થાપ્ય મુનિપુંગવઃ
ગાઢમ્ આલિઙ્ગ્ય સસ્નેહમ્ ઇદં વચનમ્ અબ્રવીત્

અરિષ્ટં ગચ્છ પન્થાનં રામ સૌમિત્રિણા સહ
સીતયા ચાનયા સાર્ધં છાયયેવાનુવૃત્તયા

પશ્યાશ્રમપદં રમ્યં દણ્ડકારણ્યવાસિનામ્
એષાં તપસ્વિનાં વીર તપસા ભાવિતાત્મનામ્

સુપ્રાજ્યફલમૂલાનિ પુષ્પિતાનિ વનાનિ ચ
પ્રશાન્તમૃગયૂથાનિ શાન્તપક્ષિગણાનિ ચ

ફુલ્લપઙ્કજષડાનિ પ્રસન્નસલિલાનિ ચ
કારણ્ડવવિકીર્ણાનિ તટાકાનિ સરાંસિ ચ

દ્રક્ષ્યસે દૃષ્ટિરમ્યાણિ ગિરિપ્રસ્રવણાનિ ચ
રમણીયાન્ય્ અરણ્યાનિ મયૂરાભિરુતાનિ ચ

ગમ્યતાં વત્સ સૌમિત્રે ભવાન્ અપિ ચ ગચ્છતુ
આગન્તવ્યં ચ તે દૃષ્ટ્વા પુનર્ એવાશ્રમં મમ

એવમ્ ઉક્તસ્ તથેત્ય્ ઉક્ત્વા કાકુત્સ્થઃ સહલક્ષ્મણઃ
પ્રદક્ષિણં મુનિં કૃતા પ્રસ્થાતુમ્ ઉપચક્રમે

તતઃ શુભતરે તૂણી ધનુષી ચાયતેક્ષણા
દદૌ સીતા તયોર્ ભ્રાત્રોઃ ખડ્ગૌ ચ વિમલૌ તતઃ

આબધ્ય ચ શુભે તૂણી ચાપે ચાદાય સસ્વને
નિષ્ક્રાન્તાવ્ આશ્રમાદ્ ગન્તુમ્ ઉભૌ તૌ રામલક્ષ્મણૌ