રામાયણ · અધ્યાય 3.005

શરભઙ્ગે દિવં પ્રાપ્તે મુનિસંઘાઃ સમાગતાઃ
અભ્યગચ્છન્ત કાકુત્સ્થં રામં જ્વલિતતેજસં

વૈખાનસા વાલખિલ્યાઃ સંપ્રક્ષાલા મરીચિપાઃ
અશ્મકુટ્ટાશ્ ચ બહવઃ પત્રાહારાશ્ ચ તાપસાઃ

દન્તોલૂખલિનશ્ ચૈવ તથૈવોન્મજ્જકાઃ પરે
મુનયઃ સલિલાહારા વાયુભક્ષાસ્ તથાપરે

આકાશનિલયાશ્ ચૈવ તથા સ્થણ્ડિલશાયિનઃ
તથોર્ધ્વવાસિનો દાન્તાસ્ તથાર્દ્રપટવાસસઃ

સજપાશ્ ચ તપોનિત્યાસ્ તથા પઞ્ચતપોઽન્વિતાઃ
સર્વે બ્રાહ્મ્યા શ્રિયા જુષ્ટા દૃઢયોગસમાહિતાઃ
શરભઙ્ગાશ્રમે રામમ્ અભિજગ્મુશ્ ચ તાપસાઃ

અભિગમ્ય ચ ધર્મજ્ઞા રામં ધર્મભૃતાં વરમ્
ઊચુઃ પરમધર્મજ્ઞમ્ ઋષિસંઘાઃ સમાહિતાઃ

ત્વમ્ ઇક્ષ્વાકુકુલસ્યાસ્ય પૃથિવ્યાશ્ ચ મહારથઃ
પ્રધાનશ્ ચાસિ નાથશ્ ચ દેવાનાં મઘવાન્ ઇવ

વિશ્રુતસ્ ત્રિષુ લોકેષુ યશસા વિક્રમેણ ચ
પિતૃવ્રતત્વં સત્યં ચ ત્વયિ ધર્મશ્ ચ પુષ્કલઃ

ત્વામ્ આસાદ્ય મહાત્માનં ધર્મજ્ઞં ધર્મવત્સલમ્
અર્થિત્વાન્ નાથ વક્ષ્યામસ્ તચ્ ચ નઃ ક્ષન્તુમ્ અર્હસિ

અધાર્મસ્ તુ મહાંસ્ તાત ભવેત્ તસ્ય મહીપતેઃ
યો હરેદ્ બલિષડ્ભાગં ન ચ રક્ષતિ પુત્રવત્

યુઞ્જાનઃ સ્વાન્ ઇવ પ્રાણાન્ પ્રાણૈર્ ઇષ્ટાન્ સુતાન્ ઇવ
નિત્યયુક્તઃ સદા રક્ષન્ સર્વાન્ વિષયવાસિનઃ

પ્રાપ્નોતિ શાશ્વતીં રામ કીર્તિં સ બહુવાર્ષિકીમ્
બ્રહ્મણઃ સ્થાનમ્ આસાદ્ય તત્ર ચાપિ મહીયતે

યત્ કરોતિ પરં ધર્મં મુનિર્ મૂલફલાશનઃ
તત્ર રાજ્ઞશ્ ચતુર્ભાગઃ પ્રજા ધર્મેણ રક્ષતઃ

સો ઽયં બ્રાહ્મણભૂયિષ્ઠો વાનપ્રસ્થગણો મહાન્
ત્વન્ નાથો ઽનાથવદ્ રામ રાક્ષસૈર્ વધ્યતે ભૃશમ્

એહિ પશ્ય શરીરાણિ મુનીનાં ભાવિતાત્મનામ્
હતાનાં રાક્ષસૈર્ ઘોરૈર્ બહૂનાં બહુધા વને

પમ્પાનદીનિવાસાનામ્ અનુમન્દાકિનીમ્ અપિ
ચિત્રકૂટાલયાનાં ચ ક્રિયતે કદનં મહત્

એવં વયં ન મૃષ્યામો વિપ્રકારં તપસ્વિનમ્
ક્રિયમાણં વને ઘોરં રક્ષોભિર્ ભીમકર્મભિઃ

તતસ્ ત્વાં શરણાર્થં ચ શરણ્યં સમુપસ્થિતાઃ
પરિપાલય નો રામ વધ્યમાનાન્ નિશાચરૈઃ

એતચ્ છ્રુત્વા તુ કાકુત્સ્થસ્ તાપસાનાં તપસ્વિનામ્
ઇદં પ્રોવાચ ધર્માત્મા સર્વાન્ એવ તપસ્વિનઃ
નૈવમ્ અર્હથ માં વક્તુમ્ આજ્ઞાપ્યો ઽહં તપસ્વિનમ્

ભવતામ્ અર્થસિદ્ધ્યર્થમ્ આગતો ઽહં યદૃચ્છયા
તસ્ય મે ઽયં વને વાસો ભવિષ્યતિ મહાફલઃ
તપસ્વિનાં રણે શત્રૂન્ હન્તુમ્ ઇચ્છામિ રાક્ષસાન્

દત્ત્વા વરં ચાપિ તપોધનાનાં ધર્મે ધૃતાત્મા સહલક્ષ્મણેન
તપોધનૈશ્ ચાપિ સહાર્ય વૃત્તઃ સુતીષ્ક્ણમ્ એવાભિજગામ વીરઃ