રામાયણ · અધ્યાય 2.083

વ્યુષ્ય રાત્રિં તુ તત્રૈવ ગઙ્ગાકૂલે સ રાઘવઃ
ભરતઃ કાલ્યમ્ ઉત્થાય શત્રુઘ્નમ્ ઇદમ્ અબ્રવીત્

શત્રુઘોત્તિષ્ઠ કિં શેષે નિષાદાધિપતિં ગુહમ્
શીઘ્રમ્ આનય ભદ્રં તે તારયિષ્યતિ વાહિનીમ્

જાગર્મિ નાહં સ્વપિમિ તથૈવાર્યં વિચિન્તયન્
ઇત્ય્ એવમ્ અબ્રવીદ્ ભ્રાત્રા શત્રુઘ્નો ઽપિ પ્રચોદિતઃ

ઇતિ સંવદતોર્ એવમ્ અન્યોન્યં નરસિંહયોઃ
આગમ્ય પ્રાઞ્જલિઃ કાલે ગુહો ભરતમ્ અબ્રવીત્

કચ્ચિત્ સુખં નદીતીરે ઽવાત્સીઃ કાકુત્સ્થ શર્વરીમ્
કચ્ચિચ્ ચ સહ સૈન્યસ્ય તવ સર્વમ્ અનામયમ્

ગુહસ્ય તત્ તુ વચનં શ્રુત્વા સ્નેહાદ્ ઉદીરિતમ્
રામસ્યાનુવશો વાક્યં ભરતો ઽપીદમ્ અબ્રવીત્

સુખા નઃ શર્વરી રાજન્ પૂજિતાશ્ ચાપિ તે વયમ્
ગઙ્ગાં તુ નૌભિર્ બહ્વીભિર્ દાશાઃ સંતારયન્તુ નઃ

તતો ગુહઃ સંત્વરિતઃ શ્રુત્વા ભરતશાસનમ્
પ્રતિપ્રવિશ્ય નગરં તં જ્ઞાતિજનમ્ અબ્રવીત્

ઉત્તિષ્ઠત પ્રબુધ્યધ્વં ભદ્રમ્ અસ્તુ હિ વઃ સદા
નાવઃ સમનુકર્ષધ્વં તારયિષ્યામ વાહિનીમ્

તે તથોક્તાઃ સમુત્થાય ત્વરિતા રાજશાસનાત્
પઞ્ચ નાવાં શતાન્ય્ એવ સમાનિન્યુઃ સમન્તતઃ

અન્યાઃ સ્વસ્તિકવિજ્ઞેયા મહાઘણ્ડા ધરા વરાઃ
શોભમાનાઃ પતાકિન્યો યુક્તવાતાઃ સુસંહતાઃ

તતઃ સ્વસ્તિકવિજ્ઞેયાં પાણ્ડુકમ્બલસંવૃતામ્
સનન્દિઘોષાં કલ્યાણીં ગુહો નાવમ્ ઉપાહરત્

તામ્ આરુરોહ ભરતઃ શત્રુઘ્નશ્ ચ મહાબલઃ
કૌસલ્યા ચ સુમિત્રા ચ યાશ્ ચાન્યા રાજયોષિતઃ

પુરોહિતશ્ ચ તત્ પૂર્વં ગુરવે બ્રાહ્મણાશ્ ચ યે
અનન્તરં રાજદારાસ્ તથૈવ શકટાપણાઃ

આવાસમ્ આદીપયતાં તીર્થં ચાપ્ય્ અવગાહતામ્
ભાણ્ડાનિ ચાદદાનાનાં ઘોષસ્ ત્રિદિવમ્ અસ્પૃશત્

પતાકિન્યસ્ તુ તા નાવઃ સ્વયં દાશૈર્ અધિષ્ઠિતાઃ
વહન્ત્યો જનમ્ આરૂઢં તદા સંપેતુર્ આશુગાઃ

નારીણામ્ અભિપૂર્ણાસ્ તુ કાશ્ ચિત્ કાશ્ ચિત્ તુ વાજિનામ્
કશ્ ચિત્ તત્ર વહન્તિ સ્મ યાનયુગ્યં મહાધનમ્

તાઃ સ્મ ગત્વા પરં તીરમ્ અવરોપ્ય ચ તં જનમ્
નિવૃત્તાઃ કાણ્ડચિત્રાણિ ક્રિયન્તે દાશબન્ધુભિઃ

સવૈજયન્તાસ્ તુ ગજા ગજારોહૈઃ પ્રચોદિતાઃ
તરન્તઃ સ્મ પ્રકાશન્તે સધ્વજા ઇવ પર્વતાઃ

નાવશ્ ચારુરુહુસ્ ત્વ્ અન્યે પ્લવૈસ્ તેરુસ્ તથાપરે
અન્યે કુમ્ભઘટૈસ્ તેરુર્ અન્યે તેરુશ્ ચ બાહુભિઃ

સા પુણ્યા ધ્વજિની ગઙ્ગાં દાશૈઃ સંતારિતા સ્વયમ્
મૈત્રે મુહૂર્તે પ્રયયૌ પ્રયાગવનમ્ ઉત્તમમ્

આશ્વાસયિત્વા ચ ચમૂં મહાત્મા નિવેશયિત્વા ચ યથોપજોષમ્
દ્રષ્ટું ભરદ્વાજમ્ ઋષિપ્રવર્યમ્ ઋત્વિગ્ વૃતઃ સન્ ભરતઃ પ્રતસ્થે