રામાયણ · અધ્યાય 1.076

ગતે રામે પ્રશાન્તાત્મા રામો દાશરથિર્ ધનુઃ
વરુણાયાપ્રમેયાય દદૌ હસ્તે સસાયકમ્

અભિવાદ્ય તતો રામો વસિષ્ઠ પ્રમુખાન્ ઋષીન્
પિતરં વિહ્વલં દૃષ્ટ્વા પ્રોવાચ રઘુનન્દનઃ

જામદગ્ન્યો ગતો રામઃ પ્રયાતુ ચતુરઙ્ગિણી
અયોધ્યાભિમુખી સેના ત્વયા નાથેન પાલિતા

રામસ્ય વચનં શ્રુત્વા રાજા દશરથઃ સુતમ્
બાહુભ્યાં સંપરિષ્વજ્ય મૂર્ધ્નિ ચાઘ્રાય રાઘવમ્

ગતો રામ ઇતિ શ્રુત્વા હૃષ્ટઃ પ્રમુદિતો નૃપઃ
ચોદયામ્ આસ તાં સેનાં જગામાશુ તતઃ પુરીમ્

પતાકાધ્વજિનીં રમ્યાં તૂર્યોદ્ઘુષ્ટનિનાદિતામ્
સિક્તરાજપથાં રમ્યાં પ્રકીર્ણકુસુમોત્કરામ્

રાજપ્રવેશસુમુખૈઃ પૌરૈર્ મઙ્ગલવાદિભિઃ
સંપૂર્ણાં પ્રાવિશદ્ રાજા જનૌઘૈઃ સમલંકૃતામ્

કૌસલ્યા ચ સુમિત્રા ચ કૈકેયી ચ સુમધ્યમા
વધૂપ્રતિગ્રહે યુક્તા યાશ્ ચાન્યા રાજયોષિતઃ

તતઃ સીતાં મહાભાગામ્ ઊર્મિલાં ચ યશસ્વિનીમ્
કુશધ્વજસુતે ચોભે જગૃહુર્ નૃપપત્નયઃ

મઙ્ગલાલાપનૈશ્ ચૈવ શોભિતાઃ ક્ષૌમવાસસઃ
દેવતાયતનાન્ય્ આશુ સર્વાસ્ તાઃ પ્રત્યપૂજયન્

અભિવાદ્યાભિવાદ્યાંશ્ ચ સર્વા રાજસુતાસ્ તદા
રેમિરે મુદિતાઃ સર્વા ભર્તૃભિઃ સહિતા રહઃ

કૃતદારાઃ કૃતાસ્ત્રાશ્ ચ સધનાઃ સસુહૃજ્જનાઃ
શુશ્રૂષમાણાઃ પિતરં વર્તયન્તિ નરર્ષભાઃ

તેષામ્ અતિયશા લોકે રામઃ સત્યપરાક્રમઃ
સ્વયમ્ભૂર્ ઇવ ભૂતાનાં બભૂવ ગુણવત્તરઃ

રામસ્ તુ સીતયા સાર્ધં વિજહાર બહૂન્ ઋતૂન્
મનસ્વી તદ્ગતસ્ તસ્યા નિત્યં હૃદિ સમર્પિતઃ

પ્રિયા તુ સીતા રામસ્ય દારાઃ પિતૃકૃતા ઇતિ
ગુણાદ્ રૂપગુણાચ્ ચાપિ પ્રીતિર્ ભૂયો વ્યવર્ધત

તસ્યાશ્ ચ ભર્તા દ્વિગુણં હૃદયે પરિવર્તતે
અન્તર્જાતમ્ અપિ વ્યક્તમ્ આખ્યાતિ હૃદયં હૃદા

તસ્ય ભૂયો વિશેષેણ મૈથિલી જનકાત્મજા
દેવતાભિઃ સમા રૂપે સીતા શ્રીર્ ઇવ રૂપિણી

તયા સ રાજર્ષિસુતો ઽભિરામયા સમેયિવાન્ ઉત્તમરાજકન્યયા
અતીવ રામઃ શુશુભે ઽતિકામયા વિભુઃ શ્રિયા વિષ્ણુર્ ઇવામરેશ્વરઃ