રામાયણ · અધ્યાય 1.071

તમ્ ઉક્તવન્તં વૈદેહં વિશ્વામિત્રો મહામુનિઃ
ઉવાચ વચનં વીરં વસિષ્ઠસહિતો નૃપમ્

અચિન્ત્યાન્ય્ અપ્રમેયાનિ કુલાનિ નરપુંગવ
ઇક્ષ્વાકૂણાં વિદેહાનાં નૈષાં તુલ્યો ઽસ્તિ કશ્ ચન

સદૃશો ધર્મસંબન્ધઃ સદૃશો રૂપસંપદા
રામલક્ષ્મણયો રાજન્ સીતા ચોર્મિલયા સહ

વક્તવ્યં ચ નરશ્રેષ્ઠ શ્રૂયતાં વચનં મમ

ભ્રાતા યવીયાન્ ધર્મજ્ઞ એષ રાજા કુશધ્વજઃ
અસ્ય ધર્માત્મનો રાજન્ રૂપેણાપ્રતિમં ભુવિ
સુતાદ્વયં નરશ્રેષ્ઠ પત્ન્યર્થં વરયામહે

ભરતસ્ય કુમારસ્ય શત્રુઘ્નસ્ય ચ ધીમતઃ
વરયેમ સુતે રાજંસ્ તયોર્ અર્થે મહાત્મનોઃ

પુત્રા દશરથસ્યેમે રૂપયૌવનશાલિનઃ
લોકપાલોપમાઃ સર્વે દેવતુલ્યપરાક્રમાઃ

ઉભયોર્ અપિ રાજેન્દ્ર સંબન્ધેનાનુબધ્યતામ્
ઇક્ષ્વાકુકુલમ્ અવ્યગ્રં ભવતઃ પુણ્યકર્મણઃ

વિશ્વામિત્રવચઃ શ્રુત્વા વસિષ્ઠસ્ય મતે તદા
જનકઃ પ્રાઞ્જલિર્ વાક્યમ્ ઉવાચ મુનિપુંગવૌ

સદૃશં કુલસંબન્ધં યદ્ આજ્ઞાપયથઃ સ્વયમ્
એવં ભવતુ ભદ્રં વઃ કુશધ્વજસુતે ઇમે
પત્ન્યૌ ભજેતાં સહિતૌ શત્રુઘ્નભરતાવ્ ઉભૌ

એકાહ્ના રાજપુત્રીણાં ચતસૃણાં મહામુને
પાણીન્ ગૃહ્ણન્તુ ચત્વારો રાજપુત્રા મહાબલાઃ

ઉત્તરે દિવસે બ્રહ્મન્ ફલ્ગુનીભ્યાં મનીષિણઃ
વૈવાહિકં પ્રશંસન્તિ ભગો યત્ર પ્રજાપતિઃ

એવમ્ ઉક્ત્વા વચઃ સૌમ્યં પ્રત્યુત્થાય કૃતાઞ્જલિઃ
ઉભૌ મુનિવરૌ રાજા જનકો વાક્યમ્ અબ્રવીત્

પરો ધર્મઃ કૃતો મહ્યં શિષ્યો ઽસ્મિ ભવતોઃ સદા
ઇમાન્ય્ આસનમુખ્યાનિ આસેતાં મુનિપુંગવૌ

યથા દશરથસ્યેયં તથાયોધ્યા પુરી મમ
પ્રભુત્વે નાસિત્ સંદેહો યથાર્હં કર્તુમ્ અર્હથઃ

તથા બ્રુવતિ વૈદેહે જનકે રઘુનન્દનઃ
રાજા દશરથો હૃષ્ટઃ પ્રત્યુવાચ મહીપતિમ્

યુવામ્ અસંખ્યેય ગુણૌ ભ્રાતરૌ મિથિલેશ્વરૌ
ઋષયો રાજસંઘાશ્ ચ ભવદ્ભ્યામ્ અભિપૂજિતાઃ

સ્વસ્તિ પ્રાપ્નુહિ ભદ્રં તે ગમિષ્યામિ સ્વમ્ આલયમ્
શ્રાદ્ધકર્માણિ સર્વાણિ વિધાસ્ય ઇતિ ચાબ્રવીત્

તમ્ આપૃષ્ટ્વા નરપતિં રાજા દશરથસ્ તદા
મુનીન્દ્રૌ તૌ પુરસ્કૃત્ય જગામાશુ મહાયશાઃ

સ ગત્વા નિલયં રાજા શ્રાદ્ધં કૃત્વા વિધાનતઃ
પ્રભાતે કાલ્યમ્ ઉત્થાય ચક્રે ગોદાનમ્ ઉત્તમમ્

ગવાં શતસહસ્રાણિ બ્રાહ્મણેભ્યો નરાધિપઃ
એકૈકશો દદૌ રાજા પુત્રાન્ ઉદ્ધિશ્ય ધર્મતઃ

સુવર્ણશૃઙ્ગાઃ સંપન્નાઃ સવત્સાઃ કાંસ્યદોહનાઃ
ગવાં શતસહસ્રાણિ ચત્વારિ પુરુષર્ષભઃ

વિત્તમ્ અન્યચ્ ચ સુબહુ દ્વિજેભ્યો રઘુનન્દનઃ
દદૌ ગોદાનમ્ ઉદ્દિશ્ય પુત્રાણાં પુત્રવત્સલઃ

સ સુતૈઃ કૃતગોદાનૈર્ વૃતશ્ ચ નૃપતિસ્ તદા
લોકપાલૈર્ ઇવાભાતિ વૃતઃ સૌમ્યઃ પ્રજાપતિઃ