રામાયણ · અધ્યાય 1.070

એવં બ્રુવાણં જનકઃ પ્રત્યુવાચ કૃતાઞ્જલિઃ
શ્રોતુમ્ અર્હસિ ભદ્રં તે કુલં નઃ કીર્તિતં પરમ્

પ્રદાને હિ મુનિશ્રેષ્ઠ કુલં નિરવશેષતઃ
વક્તવ્યં કુલજાતેન તન્ નિબોધ મહામુને

રાજાભૂત્ ત્રિષુ લોકેષુ વિશ્રુતઃ સ્વેન કર્મણા
નિમિઃ પરમધર્માત્મા સર્વસત્ત્વવતાં વરઃ

તસ્ય પુત્રો મિથિર્ નામ જનકો મિથિ પુત્રકઃ
પ્રથમો જનકો નામ જનકાદ્ અપ્ય્ ઉદાવસુઃ

ઉદાવસોસ્ તુ ધર્માત્મા જાતો વૈ નન્દિવર્ધનઃ
નન્દિવર્ધન પુત્રસ્ તુ સુકેતુર્ નામ નામતઃ

સુકેતોર્ અપિ ધર્માત્મા દેવરાતો મહાબલઃ
દેવરાતસ્ય રાજર્ષેર્ બૃહદ્રથ ઇતિ શ્રુતઃ

બૃહદ્રથસ્ય શૂરો ઽભૂન્ મહાવીરઃ પ્રતાપવાન્
મહાવીરસ્ય ધૃતિમાન્ સુધૃતિઃ સત્યવિક્રમઃ

સુધૃતેર્ અપિ ધર્માત્મા ધૃષ્ટકેતુઃ સુધાર્મિકઃ
ધૃષ્ટકેતોસ્ તુ રાજર્ષેર્ હર્યશ્વ ઇતિ વિશ્રુતઃ

હર્યશ્વસ્ય મરુઃ પુત્રો મરોઃ પુત્રઃ પ્રતીન્ધકઃ
પ્રતીન્ધકસ્ય ધર્માત્મા રાજા કીર્તિરથઃ સુતઃ

પુત્રઃ કીર્તિરથસ્યાપિ દેવમીઢ ઇતિ સ્મૃતઃ
દેવમીઢસ્ય વિબુધો વિબુધસ્ય મહીધ્રકઃ

મહીધ્રકસુતો રાજા કીર્તિરાતો મહાબલઃ
કીર્તિરાતસ્ય રાજર્ષેર્ મહારોમા વ્યજાયત

મહારોંણસ્ તુ ધર્માત્મા સ્વર્ણરોમા વ્યજાયત
સ્વર્ણરોંણસ્ તુ રાજર્ષેર્ હ્રસ્વરોમા વ્યજાયત

તસ્ય પુત્રદ્વયં જજ્ઞે ધર્મજ્ઞસ્ય મહાત્મનઃ
જ્યેષ્ઠો ઽહમ્ અનુજો ભ્રાતા મમ વીરઃ કુશધ્વજઃ

માં તુ જ્યેષ્ઠં પિતા રાજ્યે સો ઽભિષિચ્ય નરાધિપઃ
કુશધ્વજં સમાવેશ્ય ભારં મયિ વનં ગતઃ

વૃદ્ધે પિતરિ સ્વર્યાતે ધર્મેણ ધુરમ્ આવહમ્
ભ્રાતરં દેવસંકાશં સ્નેહાત્ પશ્યન્ કુશધ્વજમ્

કસ્ય ચિત્ ત્વ્ અથ કાલસ્ય સાંકાશ્યાદ્ અગમત્ પુરાત્
સુધન્વા વીર્યવાન્ રાજા મિથિલામ્ અવરોધકઃ

સ ચ મે પ્રેષયામ્ આસ શૈવં ધનુર્ અનુત્તમમ્
સીતા કન્યા ચ પદ્માક્ષી મહ્યં વૈ દીયતામ્ ઇતિ

તસ્યાપ્રદાનાદ્ બ્રહ્મર્ષે યુદ્ધમ્ આસીન્ મયા સહ
સ હતો ઽભિમુખો રાજા સુધન્વા તુ મયા રણે

નિહત્ય તં મુનિશ્રેષ્ઠ સુધન્વાનં નરાધિપમ્
સાંકાશ્યે ભ્રાતરં શૂરમ્ અભ્યષિઞ્ચં કુશધ્વજમ્

કનીયાન્ એષ મે ભ્રાતા અહં જ્યેષ્ઠો મહામુને
દદામિ પરમપ્રીતો વધ્વૌ તે મુનિપુંગવ

સીતાં રામાય ભદ્રં તે ઊર્મિલાં લક્ષ્મણાય ચ
વીર્યશુલ્કાં મમ સુતાં સીતાં સુરસુતોપમામ્

દ્વિતીયામ્ ઊર્મિલાં ચૈવ ત્રિર્ વદામિ ન સંશયઃ
દદામિ પરમપ્રીતો વધ્વૌ તે રઘુનન્દન

રામલક્ષ્મણયો રાજન્ ગોદાનં કારયસ્વ હ
પિતૃકાર્યં ચ ભદ્રં તે તતો વૈવાહિકં કુરુ

મઘા હ્ય્ અદ્ય મહાબાહો તૃતીયે દિવસે પ્રભો
ફલ્ગુન્યામ્ ઉત્તરે રાજંસ્ તસ્મિન્ વૈવાહિકં કુરુ
રામલક્ષ્મણયોર્ અર્થે દાનં કાર્યં સુખોદયમ્