રામાયણ · અધ્યાય 1.069

તતઃ પ્રભાતે જનકઃ કૃતકર્મા મહર્ષિભિઃ
ઉવાચ વાક્યં વાક્યજ્ઞઃ શતાનન્દં પુરોહિતમ્

ભ્રાતા મમ મહાતેજા યવીયાન્ અતિધાર્મિકઃ
કુશધ્વજ ઇતિ ખ્યાતઃ પુરીમ્ અધ્યવસચ્ છુભામ્

વાર્યાફલકપર્યન્તાં પિબન્ન્ ઇક્ષુમતીં નદીમ્
સાંકાશ્યાં પુણ્યસંકાશાં વિમાનમ્ ઇવ પુષ્પકમ્

તમ્ અહં દ્રષ્ટુમ્ ઇચ્છામિ યજ્ઞગોપ્તા સ મે મતઃ
પ્રીતિં સો ઽપિ મહાતેજા ઇંમાં ભોક્તા મયા સહ

શાસનાત્ તુ નરેન્દ્રસ્ય પ્રયયુઃ શીઘ્રવાજિભિઃ
સમાનેતું નરવ્યાઘ્રં વિષ્ણુમ્ ઇન્દ્રાજ્ઞયા યથા

આજ્ઞયા તુ નરેન્દ્રસ્ય આજગામ કુશધ્વજઃ

સ દદર્શ મહાત્માનં જનકં ધર્મવત્સલમ્
સો ઽભિવાદ્ય શતાનન્દં રાજાનં ચાપિ ધાર્મિકમ્

રાજાર્હં પરમં દિવ્યમ્ આસનં ચાધ્યરોહત
ઉપવિષ્ટાવ્ ઉભૌ તૌ તુ ભ્રાતરાવ્ અમિતૌજસૌ

પ્રેષયામ્ આસતુર્ વીરૌ મન્ત્રિશ્રેષ્ઠં સુદામનમ્
ગચ્છ મન્ત્રિપતે શીઘ્રમ્ ઐક્ષ્વાકમ્ અમિતપ્રભમ્
આત્મજૈઃ સહ દુર્ધર્ષમ્ આનયસ્વ સમન્ત્રિણમ્

ઔપકાર્યાં સ ગત્વા તુ રઘૂણાં કુલવર્ધનમ્
દદર્શ શિરસા ચૈનમ્ અભિવાદ્યેદમ્ અબ્રવીત્

અયોધ્યાધિપતે વીર વૈદેહો મિથિલાધિપઃ
સ ત્વાં દ્રષ્ટું વ્યવસિતઃ સોપાધ્યાયપુરોહિતમ્

મન્ત્રિશ્રેષ્ઠવચઃ શ્રુત્વા રાજા સર્ષિગણસ્ તદા
સબન્ધુર્ અગમત્ તત્ર જનકો યત્ર વર્તતે

સ રાજા મન્ત્રિસહિતઃ સોપાધ્યાયઃ સબાન્ધવઃ
વાક્યં વાક્યવિદાં શ્રેષ્ઠો વૈદેહમ્ ઇદમ્ અબ્રવીત્

વિદિતં તે મહારાજ ઇક્ષ્વાકુકુલદૈવતમ્
વક્તા સર્વેષુ કૃત્યેષુ વસિષ્ઠો ભગવાન્ ઋષિઃ

વિશ્વામિત્રાભ્યનુજ્ઞાતઃ સહ સર્વૈર્ મહર્ષિભિઃ
એષ વક્ષ્યતિ ધર્માત્મા વસિષ્ઠો મે યથાક્રમમ્

તૂષ્ણીંભૂતે દશરથે વસિષ્ઠો ભગવાન્ ઋષિઃ
ઉવાચ વાક્યં વાક્યજ્ઞો વૈદેહં સપુરોહિતમ્

અવ્યક્તપ્રભવો બ્રહ્મા શાશ્વતો નિત્ય અવ્યયઃ
તસ્માન્ મરીચિઃ સંજજ્ઞે મરીચેઃ કશ્યપઃ સુતઃ

વિવસ્વાન્ કશ્યપાજ્ જજ્ઞે મનુર્ વૈવૈસ્વતઃ સ્મૃતઃ
મનુઃ પ્રજાપતિઃ પૂર્વમ્ ઇક્ષ્વાકુસ્ તુ મનોઃ સુતઃ

તમ્ ઇક્ષ્વાકુમ્ અયોધ્યાયાં રાજાનં વિદ્ધિ પૂર્વકમ્
ઇક્ષ્વાકોસ્ તુ સુતઃ શ્રીમાન્ વિકુક્ષિર્ ઉદપદ્યત

વિકુક્ષેસ્ તુ મહાતેજા બાણઃ પુત્રઃ પ્રતાપવાન્
બાણસ્ય તુ મહાતેજા અનરણ્યઃ પ્રતાપવાન્

અનરણ્યાત્ પૃથુર્ જજ્ઞે ત્રિશઙ્કુસ્ તુ પૃથોઃ સુતઃ
ત્રિશઙ્કોર્ અભવત્ પુત્રો ધુન્ધુમારો મહાયશાઃ

ધુન્ધુમારાન્ મહાતેજા યુવનાશ્વો મહારથઃ
યુવનાશ્વસુતઃ શ્રીમાન્ માન્ધાતા પૃથિવીપતિઃ

માન્ધાતુસ્ તુ સુતઃ શ્રીમાન્ સુસંધિર્ ઉદપદ્યત
સુસંધેર્ અપિ પુત્રૌ દ્વૌ ધ્રુવસંધિઃ પ્રસેનજિત્

યશસ્વી ધ્રુવસંધેસ્ તુ ભરતો નામ નામતઃ
ભરતાત્ તુ મહાતેજા અસિતો નામ જાયત

સહ તેન ગરેણૈવ જાતઃ સ સગરો ઽભવત્
સગરસ્યાસમઞ્જસ્ તુ અસમઞ્જાદ્ અથાંશુમાન્

દિલીપો ઽંશુમતઃ પુત્રો દિલીપસ્ય ભગીરથઃ
ભગીરથાત્ કકુત્સ્થશ્ ચ કકુત્સ્થસ્ય રઘુસ્ તથા

રઘોસ્ તુ પુત્રસ્ તેજસ્વી પ્રવૃદ્ધઃ પુરુષાદકઃ
કલ્માષપાદો હ્ય્ અભવત્ તસ્માજ્ જાતસ્ તુ શઙ્ખણઃ

સુદર્શનઃ શઙ્ખણસ્ય અગ્નિવર્ણઃ સુદર્શનાત્
શીઘ્રગસ્ ત્વ્ અગ્નિવર્ણસ્ય શીઘ્રગસ્ય મરુઃ સુતઃ

મરોઃ પ્રશુશ્રુકસ્ ત્વ્ આસીદ્ અમ્બરીષઃ પ્રશુશ્રુકાત્
અમ્બરીષસ્ય પુત્રો ઽભૂન્ નહુષઃ પૃથિવીપતિઃ

નહુષસ્ય યયાતિસ્ તુ નાભાગસ્ તુ યયાતિજઃ
નાભાગસ્ય બભૂવાજ અજાદ્ દશરથો ઽભવત્
તસ્માદ્ દશરથાજ્ જાતૌ ભ્રાતરૌ રામલક્ષ્મણૌ

આદિવંશવિશુદ્ધાનાં રાજ્ઞાં પરમધર્મિણામ્
ઇક્ષ્વાકુકુલજાતાનાં વીરાણાં સત્યવાદિનામ્

રામલક્ષ્મણયોર્ અર્થે ત્વત્સુતે વરયે નૃપ
સદૃશાભ્યાં નરશ્રેષ્ઠ સદૃશે દાતુમ્ અર્હસિ