રામાયણ · અધ્યાય 1.068

તતો રાત્ર્યાં વ્યતીતાયાં સોપાધ્યાયઃ સબાન્ધવઃ
રાજા દશરથો હૃષ્ટઃ સુમન્ત્રમ્ ઇદમ્ અબ્રવીત્

અદ્ય સર્વે ધનાધ્યક્ષા ધનમ્ આદાય પુષ્કલમ્
વ્રજન્ત્વ્ અગ્રે સુવિહિતા નાનારત્નસમન્વિતાઃ

ચતુરઙ્ગબલં ચાપિ શીઘ્રં નિર્યાતુ સર્વશઃ
મમાજ્ઞાસમકાલં ચ યાનયુગ્યમ્ અનુત્તમમ્

વસિષ્ઠો વામદેવશ્ ચ જાબાલિર્ અથ કાશ્યપઃ
માર્કણ્ડેયશ્ ચ દીર્ઘાયુર્ ઋષિઃ કાત્યાયનસ્ તથા

એતે દ્વિજાઃ પ્રયાન્ત્વ્ અગ્રે સ્યન્દનં યોજયસ્વ મે
યથા કાલાત્યયો ન સ્યાદ્ દૂતા હિ ત્વરયન્તિ મામ્

વચનાચ્ ચ નરેન્દ્રસ્ય સા સેના ચતુરઙ્ગિણી
રાજાનમ્ ઋષિભિઃ સાર્ધં વ્રજન્તં પૃષ્ઠતો ઽન્વગાત્

ગત્વા ચતુરહં માર્ગં વિદેહાન્ અભ્યુપેયિવાન્
રાજા તુ જનકઃ શ્રીમાઞ્ શ્રુત્વા પૂજામ્ અકલ્પયત્

તતો રાજાનમ્ આસાદ્ય વૃદ્ધં દશરથં નૃપમ્
જનકો મુદિતો રાજા હર્ષં ચ પરમં યયૌ
ઉવાચ ચ નરશ્રેષ્ઠો નરશ્રેષ્ઠં મુદાન્વિતમ્

સ્વાગતં તે મહારાજ દિષ્ટ્યા પ્રાપ્તો ઽસિ રાઘવ
પુત્રયોર્ ઉભયોઃ પ્રીતિં લપ્સ્યસે વીર્યનિર્જિતામ્

દિષ્ટ્યા પ્રાપ્તો મહાતેજા વસિષ્ઠો ભગવાન્ ઋષિઃ
સહ સર્વૈર્ દ્વિજશ્રેષ્ઠૈર્ દેવૈર્ ઇવ શતક્રતુઃ

દિષ્ટ્યા મે નિર્જિતા વિઘ્ના દિષ્ટ્યા મે પૂજિતં કુલમ્
રાઘવૈઃ સહ સંબન્ધાદ્ વીર્યશ્રેષ્ઠૈર્ મહાત્મભિઃ

શ્વઃ પ્રભાતે નરેન્દ્રેન્દ્ર નિર્વર્તયિતુમ્ અર્હસિ
યજ્ઞસ્યાન્તે નરશ્રેષ્ઠ વિવાહમ્ ઋષિસંમતમ્

તસ્ય તદ્ વચનં શ્રુત્વા ઋષિમધ્યે નરાધિપઃ
વાક્યં વાક્યવિદાં શ્રેષ્ઠઃ પ્રત્યુવાચ મહીપતિમ્

પ્રતિગ્રહો દાતૃવશઃ શ્રુતમ્ એતન્ મયા પુરા
યથા વક્ષ્યસિ ધર્મજ્ઞ તત્ કરિષ્યામહે વયમ્

તદ્ ધર્મિષ્ઠં યશસ્યં ચ વચનં સત્યવાદિનઃ
શ્રુત્વા વિદેહાધિપતિઃ પરં વિસ્મયમ્ આગતઃ

તતઃ સર્વે મુનિગણાઃ પરસ્પરસમાગમે
હર્ષેણ મહતા યુક્તાસ્ તાં નિશામ્ અવસન્ સુખમ્

રાજા ચ રાઘવૌ પુત્રૌ નિશામ્ય પરિહર્ષિતઃ
ઉવાસ પરમપ્રીતો જનકેન સુપૂજિતઃ

જનકો ઽપિ મહાતેજાઃ ક્રિયા ધર્મેણ તત્ત્વવિત્
યજ્ઞસ્ય ચ સુતાભ્યાં ચ કૃત્વા રાત્રિમ્ ઉવાસ હ