રામાયણ · અધ્યાય 1.067

જનકેન સમાદિષ્ટા દૂતાસ્ તે ક્લાન્તવાહનાઃ
ત્રિરાત્રમ્ ઉષિત્વા માર્ગે તે ઽયોધ્યાં પ્રાવિશન્ પુરીમ્

તે રાજવચનાદ્ દૂતા રાજવેશ્મપ્રવેશિતાઃ
દદૃશુર્ દેવસંકાશં વૃદ્ધં દશરથં નૃપમ્

બદ્ધાઞ્જલિપુટાઃ સર્વે દૂતા વિગતસાધ્વસાઃ
રાજાનં પ્રયતા વાક્યમ્ અબ્રુવન્ મધુરાક્ષરમ્

મૈથિલો જનકો રાજા સાગ્નિહોત્રપુરસ્કૃતઃ
કુશલં ચાવ્યયં ચૈવ સોપાધ્યાયપુરોહિતમ્

મુહુર્ મુહુર્ મધુરયા સ્નેહસંયુક્તયા ગિરા
જનકસ્ ત્વાં મહારાજ પૃચ્છતે સપુરઃસરમ્

પૃષ્ટ્વા કુશલમ્ અવ્યગ્રં વૈદેહો મિથિલાધિપઃ
કૌશિકાનુમતે વાક્યં ભવન્તમ્ ઇદમ્ અબ્રવીત્

પૂર્વં પ્રતિજ્ઞા વિદિતા વીર્યશુલ્કા મમાત્મજા
રાજાનશ્ ચ કૃતામર્ષા નિર્વીર્યા વિમુખીકૃતાઃ

સેયં મમ સુતા રાજન્ વિશ્વામિત્ર પુરઃસરૈઃ
યદૃચ્છયાગતૈર્ વીરૈર્ નિર્જિતા તવ પુત્રકૈઃ

તચ્ ચ રાજન્ ધનુર્ દિવ્યં મધ્યે ભગ્નં મહાત્મના
રામેણ હિ મહારાજ મહત્યાં જનસંસદિ

અસ્મૈ દેયા મયા સીતા વીર્યશુલ્કા મહાત્મને
પ્રતિજ્ઞાં તર્તુમ્ ઇચ્છામિ તદ્ અનુજ્ઞાતુમ્ અર્હસિ

સોપાધ્યાયો મહારાજ પુરોહિતપુરસ્કૃતઃ
શીઘ્રમ્ આગચ્છ ભદ્રં તે દ્રષ્ટુમ્ અર્હસિ રાઘવૌ

પ્રીતિં ચ મમ રાજેન્દ્ર નિર્વર્તયિતુમ્ અર્હસિ
પુત્રયોર્ ઉભયોર્ એવ પ્રીતિં ત્વમ્ અપિ લપ્સ્યસે

એવં વિદેહાધિપતિર્ મધુરં વાક્યમ્ અબ્રવીત્
વિશ્વામિત્રાભ્યનુજ્ઞાતઃ શતાનન્દમતે સ્થિતઃ

દૂતવાક્યં તુ તચ્ છ્રુત્વા રાજા પરમહર્ષિતઃ
વસિષ્ઠં વામદેવં ચ મન્ત્રિણો ઽન્યાંશ્ ચ સો ઽબ્રવીત્

ગુપ્તઃ કુશિકપુત્રેણ કૌસલ્યાનન્દવર્ધનઃ
લક્ષ્મણેન સહ ભ્રાત્રા વિદેહેષુ વસત્ય્ અસૌ

દૃષ્ટવીર્યસ્ તુ કાકુત્સ્થો જનકેન મહાત્મના
સંપ્રદાનં સુતાયાસ્ તુ રાઘવે કર્તુમ્ ઇચ્છતિ

યદિ વો રોચતે વૃત્તં જનકસ્ય મહાત્મનઃ
પુરીં ગચ્છામહે શીઘ્રં મા ભૂત્ કાલસ્ય પર્યયઃ

મન્ત્રિણો બાઢમ્ ઇત્ય્ આહુઃ સહ સર્વૈર્ મહર્ષિભિઃ
સુપ્રીતશ્ ચાબ્રવીદ્ રાજા શ્વો યાત્રેતિ સ મન્ત્રિણઃ

મન્ત્રિણસ્ તુ નરેન્દ્રસ્ય રાત્રિં પરમસત્કૃતાઃ
ઊષુઃ પ્રમુદિતાઃ સર્વે ગુણૈઃ સર્વૈઃ સમન્વિતાઃ