રામાયણ · અધ્યાય 1.063

સુરકાર્યમ્ ઇદં રમ્ભે કર્તવ્યં સુમહત્ ત્વયા
લોભનં કૌશિકસ્યેહ કામમોહસમન્વિતમ્

તથોક્તા સાપ્સરા રામ સહસ્રાક્ષેણ ધીમતા
વ્રીડિતા પ્રાઞ્જલિર્ ભૂત્વા પ્રત્યુવાચ સુરેશ્વરમ્

અયં સુરપતે ઘોરો વિશ્વામિત્રો મહામુનિઃ
ક્રોધમ્ ઉત્સ્રક્ષ્યતે ઘોરં મયિ દેવ ન સંશયઃ
તતો હિ મે ભયં દેવ પ્રસાદં કર્તુમ્ અર્હસિ

તામ્ ઉવાચ સહસ્રાક્ષો વેપમાનાં કૃતાઞ્જલિમ્
મા ભૈષિ રમ્ભે ભદ્રં તે કુરુષ્વ મમ શાસનમ્

કોકિલો હૃદયગ્રાહી માધવે રુચિરદ્રુમે
અહં કન્દર્પસહિતઃ સ્થાસ્યામિ તવ પાર્શ્વતઃ

ત્વં હિ રૂપં બહુગુણં કૃત્વા પરમભાસ્વરમ્
તમ્ ઋષિં કૌશિકં રમ્ભે ભેદયસ્વ તપસ્વિનમ્

સા શ્રુત્વા વચનં તસ્ય કૃત્વા રૂપમ્ અનુત્તમમ્
લોભયામ્ આસ લલિતા વિશ્વામિત્રં શુચિસ્મિતા

કોકિલસ્ય તુ શુશ્રાવ વલ્ગુ વ્યાહરતઃ સ્વનમ્
સંપ્રહૃષ્ટેન મનસા તત એનામ્ ઉદૈક્ષત

અથ તસ્ય ચ શબ્દેન ગીતેનાપ્રતિમેન ચ
દર્શનેન ચ રમ્ભાયા મુનિઃ સંદેહમ્ આગતઃ

સહસ્રાક્ષસ્ય તત્ કર્મ વિજ્ઞાય મુનિપુંગવઃ
રમ્ભાં ક્રોધસમાવિષ્ટઃ શશાપ કુશિકાત્મજઃ

યન્ માં લોભયસે રમ્ભે કામક્રોધજયૈષિણમ્
દશવર્ષસહસ્રાણિ શૈલી સ્થાસ્યસિ દુર્ભગે

બ્રાહ્મણઃ સુમહાતેજાસ્ તપોબલસમન્વિતઃ
ઉદ્ધરિષ્યતિ રમ્ભે ત્વાં મત્ક્રોધકલુષીકૃતામ્

એવમ્ ઉક્ત્વા મહાતેજા વિશ્વામિત્રો મહામુનિઃ
અશક્નુવન્ ધારયિતું કોપં સંતાપમ્ આગતઃ

તસ્ય શાપેન મહતા રમ્ભા શૈલી તદાભવત્
વચઃ શ્રુત્વા ચ કન્દર્પો મહર્ષેઃ સ ચ નિર્ગતઃ

કોપેન સ મહાતેજાસ્ તપો ઽપહરણે કૃતે
ઇન્દ્રિયૈર્ અજિતૈ રામ ન લેભે શાન્તિમ્ આત્મનઃ