રામાયણ · અધ્યાય 1.055

એવમ્ ઉક્તો વસિષ્ઠેન વિશ્વામિત્રો મહાબલઃ
આગ્નેયમ્ અસ્ત્રમ્ ઉત્ક્ષિપ્ય તિષ્ઠ તિષ્ઠેતિ ચાબ્રવીત્

વસિષ્ઠો ભગવાન્ ક્રોધાદ્ ઇદં વચનમ્ અબ્રવીત્

ક્ષત્રબન્ધો સ્થિતો ઽસ્મ્ય્ એષ યદ્ બલં તદ્ વિદર્શય
નાશયામ્ય્ એષ તે દર્પં શસ્ત્રસ્ય તવ ગાધિજ

ક્વ ચ તે ક્ષત્રિયબલં ક્વ ચ બ્રહ્મબલં મહત્
પશ્ય બ્રહ્મબલં દિવ્યં મમ ક્ષત્રિયપાંસન

તસ્યાસ્ત્રં ગાધિપુત્રસ્ય ઘોરમ્ આગ્નેયમ્ ઉત્તમમ્
બ્રહ્મદણ્ડેન તચ્ છાન્તમ્ અગ્નેર્ વેગ ઇવામ્ભસા

વારુણં ચૈવ રૌદ્રં ચ ઐન્દ્રં પાશુપતં તથા
ઐષીકં ચાપિ ચિક્ષેપ રુષિતો ગાધિનન્દનઃ

માનવં મોહનં ચૈવ ગાન્ધર્વં સ્વાપનં તથા
જૃમ્ભણં મોહનં ચૈવ સંતાપનવિલાપને

શોષણં દારણં ચૈવ વજ્રમ્ અસ્ત્રં સુદુર્જયમ્
બ્રહ્મપાશં કાલપાશં વારુણં પાશમ્ એવ ચ

પિનાકાસ્ત્રં ચ દયિતં શુષ્કાર્દ્રે અશની તથા
દણ્ડાસ્ત્રમ્ અથ પૈશાચં ક્રૌઞ્ચમ્ અસ્ત્રં તથૈવ ચ

ધર્મચક્રં કાલચક્રં વિષ્ણુચક્રં તથૈવ ચ
વાયવ્યં મથનં ચૈવ અસ્ત્રં હયશિરસ્ તથા

શક્તિદ્વયં ચ ચિક્ષેપ કઙ્કાલં મુસલં તથા
વૈદ્યાધરં મહાસ્ત્રં ચ કાલાસ્ત્રમ્ અથ દારુણમ્

ત્રિશૂલમ્ અસ્ત્રં ઘોરં ચ કાપાલમ્ અથ કઙ્કણમ્
એતાન્ય્ અસ્ત્રાણિ ચિક્ષેપ સર્વાણિ રઘુનન્દન

વસિષ્ઠે જપતાં શ્રેષ્ઠે તદ્ અદ્ભુતમ્ ઇવાભવત્
તાનિ સર્વાણિ દણ્ડેન ગ્રસતે બ્રહ્મણઃ સુતઃ

તેષુ શાન્તેષુ બ્રહ્માસ્ત્રં ક્ષિપ્તવાન્ ગાધિનન્દનઃ
તદ્ અસ્ત્રમ્ ઉદ્યતં દૃષ્ટ્વા દેવાઃ સાગ્નિપુરોગમાઃ

દેવર્ષયશ્ ચ સંભ્રાન્તા ગન્ધર્વાઃ સમહોરગાઃ
ત્રૈલોક્યમ્ આસીત્ સંત્રસ્તં બ્રહ્માસ્ત્રે સમુદીરિતે

તદ્ અપ્ય્ અસ્ત્રં મહાઘોરં બ્રાહ્મં બ્રાહ્મેણ તેજસા
વસિષ્ઠો ગ્રસતે સર્વં બ્રહ્મદણ્ડેન રાઘવ

બ્રહ્માસ્ત્રં ગ્રસમાનસ્ય વસિષ્ઠસ્ય મહાત્મનઃ
ત્રૈલોક્યમોહનં રૌદ્રં રૂપમ્ આસીત્ સુદારુણમ્

રોમકૂપેષુ સર્વેષુ વસિષ્ઠસ્ય મહાત્મનઃ
મરીચ્ય ઇવ નિષ્પેતુર્ અગ્નેર્ ધૂમાકુલાર્ચિષઃ

પ્રાજ્વલદ્ બ્રહ્મદણ્ડશ્ ચ વસિષ્ઠસ્ય કરોદ્યતઃ
વિધૂમ ઇવ કાલાગ્નિર્ યમદણ્ડ ઇવાપરઃ

તતો ઽસ્તુવન્ મુનિગણા વસિષ્ઠં જપતાં વરમ્
અમોઘં તે બલં બ્રહ્મંસ્ તેજો ધારય તેજસા

નિગૃહીતસ્ ત્વયા બ્રહ્મન્ વિશ્વામિત્રો મહાતપાઃ
પ્રસીદ જપતાં શ્રેષ્ઠ લોકાઃ સન્તુ ગતવ્યથાઃ

એવમ્ ઉક્તો મહાતેજાઃ શમં ચક્રે મહાતપાઃ
વિશ્વામિત્રો ઽપિ નિકૃતો વિનિઃશ્વસ્યેદમ્ અબ્રવીત્

ધિગ્ બલં ક્ષત્રિયબલં બ્રહ્મતેજોબલં બલમ્
એકેન બ્રહ્મદણ્ડેન સર્વાસ્ત્રાણિ હતાનિ મે

તદ્ એતત્ સમવેક્ષ્યાહં પ્રસન્નેન્દ્રિયમાનસઃ
તપો મહત્ સમાસ્થાસ્યે યદ્ વૈ બ્રહ્મત્વકારકમ્