રામાયણ · અધ્યાય 1.052

એવમ્ ઉક્તા વસિષ્ઠેન શબલા શત્રુસૂદન
વિદધે કામધુક્ કામાન્ યસ્ય યસ્ય યથેપ્સિતમ્

ઇક્ષૂન્ મધૂંસ્ તથા લાજાન્ મૈરેયાંશ્ ચ વરાસવાન્
પાનાનિ ચ મહાર્હાણિ ભક્ષ્યાંશ્ ચોચ્ચાવચાંસ્ તથા

ઉષ્ણાઢ્યસ્યૌદનસ્યાપિ રાશયઃ પર્વતોપમાઃ
મૃષ્ટાન્નાનિ ચ સૂપાશ્ ચ દધિકુલ્યાસ્ તથૈવ ચ

નાનાસ્વાદુરસાનાં ચ ષાડવાનાં તથૈવ ચ
ભાજનાનિ સુપૂર્ણાનિ ગૌડાનિ ચ સહસ્રશઃ

સર્વમ્ આસીત્ સુસંતુષ્ટં હૃષ્ટપુષ્ટજનાકુલમ્
વિશ્વામિત્રબલં રામ વસિષ્ઠેનાભિતર્પિતમ્

વિશ્વામિત્રો ઽપિ રાજર્ષિર્ હૃષ્ટપુષ્ટસ્ તદાભવત્
સાન્તઃ પુરવરો રાજા સબ્રાહ્મણપુરોહિતઃ

સામાત્યો મન્ત્રિસહિતઃ સભૃત્યઃ પૂજિતસ્ તદા
યુક્તઃ પરેણ હર્ષેણ વસિષ્ઠમ્ ઇદમ્ અબ્રવીત્

પૂજિતો ઽહં ત્વયા બ્રહ્મન્ પૂજાર્હેણ સુસત્કૃતઃ
શ્રૂયતામ્ અભિધાસ્યામિ વાક્યં વાક્યવિશારદ

ગવાં શતસહસ્રેણ દીયતાં શબલા મમ
રત્નં હિ ભગવન્ન્ એતદ્ રત્નહારી ચ પાર્થિવઃ
તસ્માન્ મે શબલાં દેહિ મમૈષા ધર્મતો દ્વિજ

એવમ્ ઉક્તસ્ તુ ભગવાન્ વસિષ્ઠો મુનિસત્તમઃ
વિશ્વામિત્રેણ ધર્માત્મા પ્રત્યુવાચ મહીપતિમ્

નાહં શતસહસ્રેણ નાપિ કોટિશતૈર્ ગવામ્
રાજન્ દાસ્યામિ શબલાં રાશિભી રજતસ્ય વા

ન પરિત્યાગમ્ અર્હેયં મત્સકાશાદ્ અરિંદમ
શાશ્વતી શબલા મહ્યં કીર્તિર્ આત્મવતો યથા

અસ્યાં હવ્યં ચ કવ્યં ચ પ્રાણયાત્રા તથૈવ ચ
આયત્તમ્ અગ્નિહોત્રં ચ બલિર્ હોમસ્ તથૈવ ચ

સ્વાહાકારવષટ્કારૌ વિદ્યાશ્ ચ વિવિધાસ્ તથા
આયત્તમ્ અત્ર રાજર્ષે સર્વમ્ એતન્ ન સંશયઃ

સર્વ સ્વમ્ એતત્ સત્યેન મમ તુષ્ટિકરી સદા
કારણૈર્ બહુભી રાજન્ ન દાસ્યે શબલાં તવ

વસિષ્ઠેનૈવમ્ ઉક્તસ્ તુ વિશ્વામિત્રો ઽબ્રવીત્ તતઃ
સંરબ્ધતરમ્ અત્યર્થં વાક્યં વાક્યવિશારદઃ

હૈરણ્યકક્ષ્યાગ્રૈવેયાન્ સુવર્ણાઙ્કુશભૂષિતાન્
દદામિ કુઞ્જરાણાં તે સહસ્રાણિ ચતુર્દશ

હૈરણ્યાનાં રથાનાં ચ શ્વેતાશ્વાનાં ચતુર્યુજામ્
દદામિ તે શતાન્ય્ અષ્ટૌ કિઙ્કિણીકવિભૂષિતાન્

હયાનાં દેશજાતાનાં કુલજાનાં મહૌજસામ્
સહસ્રમ્ એકં દશ ચ દદામિ તવ સુવ્રત

નાનાવર્ણવિભક્તાનાં વયઃસ્થાનાં તથૈવ ચ
દદામ્ય્ એકાં ગવાં કોટિં શબલા દીયતાં મમ

એવમ્ ઉક્તસ્ તુ ભગવાન્ વિશ્વામિત્રેણ ધીમતા
ન દાસ્યામીતિ શબલાં પ્રાહ રાજન્ કથં ચન

એતદ્ એવ હિ મે રત્નમ્ એતદ્ એવ હિ મે ધનમ્
એતદ્ એવ હિ સર્વસ્વમ્ એતદ્ એવ હિ જીવિતમ્

દર્શશ્ ચ પૂર્ણમાસશ્ ચ યજ્ઞાશ્ ચૈવાપ્તદક્ષિણાઃ
એતદ્ એવ હિ મે રાજન્ વિવિધાશ્ ચ ક્રિયાસ્ તથા

અદોમૂલાઃ ક્રિયાઃ સર્વા મમ રાજન્ ન સંશયઃ
બહૂનાં કિં પ્રલાપેન ન દાસ્યે કામદોહિનીમ્