રામાયણ · અધ્યાય 1.048

અફલસ્ તુ તતઃ શક્રો દેવાન્ અગ્નિપુરોગમાન્
અબ્રવીત્ ત્રસ્તવદનઃ સર્ષિસંઘાન્ સચારણાન્

કુર્વતા તપસો વિઘ્નં ગૌતમસ્ય મહાત્મનઃ
ક્રોધમ્ ઉત્પાદ્ય હિ મયા સુરકાર્યમ્ ઇદં કૃતમ્

અફલો ઽસ્મિ કૃતસ્ તેન ક્રોધાત્ સા ચ નિરાકૃતા
શાપમોક્ષેણ મહતા તપો ઽસ્યાપહૃતં મયા

તન્ માં સુરવરાઃ સર્વે સર્ષિસંઘાઃ સચારણાઃ
સુરસાહ્યકરં સર્વે સફલં કર્તુમ્ અર્હથ

શતક્રતોર્ વચઃ શ્રુત્વા દેવાઃ સાગ્નિપુરોગમાઃ
પિતૃદેવાન્ ઉપેત્યાહુઃ સહ સર્વૈર્ મરુદ્ગણૈઃ

અયં મેષઃ સવૃષણઃ શક્રો હ્ય્ અવૃષણઃ કૃતઃ
મેષસ્ય વૃષણૌ ગૃહ્ય શક્રાયાશુ પ્રયચ્છત

અફલસ્ તુ કૃતો મેષઃ પરાં તુષ્ટિં પ્રદાસ્યતિ
ભવતાં હર્ષણાર્થાય યે ચ દાસ્યન્તિ માનવાઃ

અગ્નેસ્ તુ વચનં શ્રુત્વા પિતૃદેવાઃ સમાગતાઃ
ઉત્પાટ્ય મેષવૃષણૌ સહસ્રાક્ષે ન્યવેદયન્

તદા પ્રભૃતિ કાકુત્સ્થ પિતૃદેવાઃ સમાગતાઃ
અફલાન્ ભુઞ્જતે મેષાન્ ફલૈસ્ તેષામ્ અયોજયન્

ઇન્દ્રસ્ તુ મેષવૃષણસ્ તદા પ્રભૃતિ રાઘવ
ગૌતમસ્ય પ્રભાવેન તપસશ્ ચ મહાત્મનઃ

તદાગચ્છ મહાતેજ આશ્રમં પુણ્યકર્મણઃ
તારયૈનાં મહાભાગામ્ અહલ્યાં દેવરૂપિણીમ્

વિશ્વામિત્રવચઃ શ્રુત્વા રાઘવઃ સહલક્ષ્મણઃ
વિશ્વામિત્રં પુરસ્કૃત્ય આશ્રમં પ્રવિવેશ હ

દદર્શ ચ મહાભાગાં તપસા દ્યોતિતપ્રભામ્
લોકૈર્ અપિ સમાગમ્ય દુર્નિરીક્ષ્યાં સુરાસુરૈઃ

પ્રયત્નાન્ નિર્મિતાં ધાત્રા દિવ્યાં માયામયીમ્ ઇવ
ધૂમેનાભિપરીતાઙ્ગીં પૂર્ણચન્દ્રપ્રભામ્ ઇવ

સતુષારાવૃતાં સાભ્રાં પૂર્ણચન્દ્રપ્રભામ્ ઇવ
મધ્યે ઽમ્ભસો દુરાધર્ષાં દીપ્તાં સૂર્યપ્રભામ્ ઇવ

સ હિ ગૌતમવાક્યેન દુર્નિરીક્ષ્યા બભૂવ હ
ત્રયાણામ્ અપિ લોકાનાં યાવદ્ રામસ્ય દર્શનમ્

રાઘવૌ તુ તતસ્ તસ્યાઃ પાદૌ જગૃહતુસ્ તદા
સ્મરન્તી ગૌતમવચઃ પ્રતિજગ્રાહ સા ચ તૌ

પાદ્યમ્ અર્ઘ્યં તથાતિથ્યં ચકાર સુસમાહિતા
પ્રતિજગ્રાહ કાકુત્સ્થો વિધિદૃષ્ટેન કર્મણા

પુષ્પવૃષ્ટિર્ મહત્ય્ આસીદ્ દેવદુન્દુભિનિસ્વનૈઃ
ગન્ધર્વાપ્સરસાં ચાપિ મહાન્ આસીત્ સમાગમઃ

સાધુ સાધ્વ્ ઇતિ દેવાસ્ તામ્ અહલ્યાં સમપૂજયન્
તપોબલવિશુદ્ધાઙ્ગીં ગૌતમસ્ય વશાનુગામ્

ગૌતમો ઽપિ મહાતેજા અહલ્યાસહિતઃ સુખી
રામં સંપૂજ્ય વિધિવત્ તપસ્ તેપે મહાતપાઃ

રામો ઽપિ પરમાં પૂજાં ગૌતમસ્ય મહામુનેઃ
સકાશાદ્ વિધિવત્ પ્રાપ્ય જગામ મિથિલાં તતઃ