રામાયણ · અધ્યાય 1.043

સ ગત્વા સાગરં રાજા ગઙ્ગયાનુગતસ્ તદા
પ્રવિવેશ તલં ભૂમેર્ યત્ર તે ભસ્મસાત્કૃતાઃ

ભસ્મન્ય્ અથાપ્લુતે રામ ગઙ્ગાયાઃ સલિલેન વૈ
સર્વ લોકપ્રભુર્ બ્રહ્મા રાજાનમ્ ઇદમ્ અબ્રવીત્

તારિતા નરશાર્દૂલ દિવં યાતાશ્ ચ દેવવત્
ષષ્ટિઃ પુત્રસહસ્રાણિ સગરસ્ય મહાત્મનઃ

સાગરસ્ય જલં લોકે યાવત્ સ્થાસ્યતિ પાર્થિવ
સગરસ્યાત્મજાસ્ તાવત્ સ્વર્ગે સ્થાસ્યન્તિ દેવવત્

ઇયં ચ દુહિતા જ્યેષ્ઠા તવ ગઙ્ગા ભવિષ્યતિ
ત્વત્કૃતેન ચ નામ્ના વૈ લોકે સ્થાસ્યતિ વિશ્રુતા

ગઙ્ગા ત્રિપથગા નામ દિવ્યા ભાગીરથીતિ ચ
ત્રિપથો ભાવયન્તીતિ તતસ્ ત્રિપથગા સ્મૃતા

પિતામહાનાં સર્વેષાં ત્વમ્ અત્ર મનુજાધિપ
કુરુષ્વ સલિલં રાજન્ પ્રતિજ્ઞામ્ અપવર્જય

પૂર્વકેણ હિ તે રાજંસ્ તેનાતિયશસા તદા
ધર્મિણાં પ્રવરેણાથ નૈષ પ્રાપ્તો મનોરથઃ

તથૈવાંશુમતા તાત લોકે ઽપ્રતિમતેજસા
ગઙ્ગાં પ્રાર્થયતા નેતું પ્રતિજ્ઞા નાપવર્જિતા

રાજર્ષિણા ગુણવતા મહર્ષિસમતેજસા
મત્તુલ્યતપસા ચૈવ ક્ષત્રધર્મસ્થિતેન ચ

દિલીપેન મહાભાગ તવ પિત્રાતિતેજસા
પુનર્ ન શઙ્કિતા નેતું ગઙ્ગાં પ્રાર્થયતાનઘ

સા ત્વયા સમતિક્રાન્તા પ્રતિજ્ઞા પુરુષર્ષભ
પ્રાપ્તો ઽસિ પરમં લોકે યશઃ પરમસંમતમ્

યચ્ ચ ગઙ્ગાવતરણં ત્વયા કૃતમ્ અરિંદમ
અનેન ચ ભવાન્ પ્રાપ્તો ધર્મસ્યાયતનં મહત્

પ્લાવયસ્વ ત્વમ્ આત્માનં નરોત્તમ સદોચિતે
સલિલે પુરુષવ્યાઘ્ર શુચિઃ પુણ્યફલો ભવ

પિતામહાનાં સર્વેષાં કુરુષ્વ સલિલક્રિયામ્
સ્વસ્તિ તે ઽસ્તુ ગમિષ્યામિ સ્વં લોકં ગમ્યતાં નૃપ

ઇત્ય્ એવમ્ ઉક્ત્વા દેવેશઃ સર્વલોકપિતામહઃ
યથાગતં તથાગચ્છદ્ દેવલોકં મહાયશાઃ

ભગીરથો ઽપિ રાજર્ષિઃ કૃત્વા સલિલમ્ ઉત્તમમ્
યથાક્રમં યથાન્યાયં સાગરાણાં મહાયશાઃ
કૃતોદકઃ શુચી રાજા સ્વપુરં પ્રવિવેશ હ

સમૃદ્ધાર્થો નરશ્રેષ્ઠ સ્વરાજ્યં પ્રશશાસ હ
પ્રમુમોદ ચ લોકસ્ તં નૃપમ્ આસાદ્ય રાઘવ
નષ્ટશોકઃ સમૃદ્ધાર્થો બભૂવ વિગતજ્વરઃ

એષ તે રામ ગઙ્ગાયા વિસ્તરો ઽભિહિતો મયા
સ્વસ્તિ પ્રાપ્નુહિ ભદ્રં તે સંધ્યાકાલો ઽતિવર્તતે

ધન્યં યશસ્યમ્ આયુષ્યં સ્વર્ગ્યં પુત્ર્યમ્ અથાપિ ચ
ઇદમ્ આખ્યાનમ્ આખ્યાતં ગઙ્ગાવતરણં મયા