રામાયણ · અધ્યાય 1.035

ઉક્ત વાક્યે મુનૌ તસ્મિન્ન્ ઉભૌ રાઘવલક્ષ્મણૌ
પ્રતિનન્દ્ય કથાં વીરાવ્ ઊચતુર્ મુનિપુંગવમ્

ધર્મયુક્તમ્ ઇદં બ્રહ્મન્ કથિતં પરમં ત્વયા
દુહિતુઃ શૈલરાજસ્ય જ્યેષ્ઠાય વક્તુમ્ અર્હસિ

વિસ્તરં વિસ્તરજ્ઞો ઽસિ દિવ્યમાનુષસંભવમ્
ત્રીન્ પથો હેતુના કેન પાવયેલ્ લોકપાવની

કથં ગઙ્ગાં ત્રિપથગા વિશ્રુતા સરિદુત્તમા
ત્રિષુ લોકેષુ ધર્મજ્ઞ કર્મભિઃ કૈઃ સમન્વિતા

તથા બ્રુવતિ કાકુત્સ્થે વિશ્વામિત્રસ્ તપોધનઃ
નિખિલેન કથાં સર્વામ્ ઋષિમધ્યે ન્યવેદયત્

પુરા રામ કૃતોદ્વાહઃ શિતિકણ્ઠો મહાતપાઃ
દૃષ્ટ્વા ચ સ્પૃહયા દેવીં મૈથુનાયોપચક્રમે

શિતિકણ્ઠસ્ય દેવસ્ય દિવ્યં વર્ષશતં ગતમ્
ન ચાપિ તનયો રામ તસ્યામ્ આસીત્ પરંતપ

તતો દેવાઃ સમુદ્વિગ્નાઃ પિતામહપુરોગમાઃ
યદ્ ઇહોત્પદ્યતે ભૂતં કસ્ તત્ પ્રતિસહિષ્યતે

અભિગમ્ય સુરાઃ સર્વે પ્રણિપત્યેદમ્ અબ્રુવન્
દેવદેવ મહાદેવ લોકસ્યાસ્ય હિતે રત
સુરાણાં પ્રણિપાતેન પ્રસાદં કર્તુમ્ અર્હસિ

ન લોકા ધારયિષ્યન્તિ તવ તેજઃ સુરોત્તમ
બ્રાહ્મેણ તપસા યુક્તો દેવ્યા સહ તપશ્ ચર

ત્રૈલોક્યહિતકામાર્થં તેજસ્ તેજસિ ધારય
રક્ષ સર્વાન્ ઇમાંલ્ લોકાન્ નાલોકં કર્તુમ્ અર્હસિ

દેવતાનાં વચઃ શ્રુત્વા સર્વલોકમહેશ્વરઃ
બાઢમ્ ઇત્ય્ અબ્રવીત્ સર્વાન્ પુનશ્ ચેદમ્ ઉવાચ હ

ધારયિષ્યામ્ય્ અહં તેજસ્ તેજસ્ય્ એવ સહોમયા
ત્રિદશાઃ પૃથિવી ચૈવ નિર્વાણમ્ અધિગચ્છતુ

યદ્ ઇદં ક્ષુભિતં સ્થાનાન્ મમ તેજો હ્ય્ અનુત્તમમ્
ધારયિષ્યતિ કસ્ તન્ મે બ્રુવન્તુ સુરસત્તમાઃ

એવમ્ ઉક્તાસ્ તતો દેવાઃ પ્રત્યૂચુર્ વૃષભધ્વજમ્
યત્ તેજઃ ક્ષુભિતં હ્ય્ એતત્ તદ્ ધરા ધારયિષ્યતિ

એવમ્ ઉક્તઃ સુરપતિઃ પ્રમુમોચ મહીતલે
તેજસા પૃથિવી યેન વ્યાપ્તા સગિરિકાનના

તતો દેવાઃ પુનર્ ઇદમ્ ઊચુશ્ ચાથ હુતાશનમ્
પ્રવિશ ત્વં મહાતેજો રૌદ્રં વાયુસમન્વિતઃ

તદ્ અગ્નિના પુનર્ વ્યાપ્તં સંજાતઃ શ્વેતપર્વતઃ
દિવ્યં શરવણં ચૈવ પાવકાદિત્યસંનિભમ્
યત્ર જાતો મહાતેજાઃ કાર્તિકેયો ઽગ્નિસંભવઃ

અથોમાં ચ શિવં ચૈવ દેવાઃ સર્ષિ ગણાસ્ તદા
પૂજયામ્ આસુર્ અત્યર્થં સુપ્રીતમનસસ્ તતઃ

અથ શૈલ સુતા રામ ત્રિદશાન્ ઇદમ્ અબ્રવીત્
સમન્યુર્ અશપત્ સર્વાન્ ક્રોધસંરક્તલોચના

યસ્માન્ નિવારિતા ચૈવ સંગતા પુત્રકામ્યયા
અપત્યં સ્વેષુ દારેષુ નોત્પાદયિતુમ્ અર્હથ
અદ્ય પ્રભૃતિ યુષ્માકમ્ અપ્રજાઃ સન્તુ પત્નયઃ

એવમ્ ઉક્ત્વા સુરાન્ સર્વાઞ્ શશાપ પૃથિવીમ્ અપિ
અવને નૈકરૂપા ત્વં બહુભાર્યા ભવિષ્યસિ

ન ચ પુત્રકૃતાં પ્રીતિં મત્ક્રોધકલુષી કૃતા
પ્રાપ્સ્યસિ ત્વં સુદુર્મેધે મમ પુત્રમ્ અનિચ્છતી

તાન્ સર્વાન્ વ્રીડિતાન્ દૃષ્ટ્વા સુરાન્ સુરપતિસ્ તદા
ગમનાયોપચક્રામ દિશં વરુણપાલિતામ્

સ ગત્વા તપ આતિષ્ઠત્ પાર્શ્વે તસ્યોત્તરે ગિરેઃ
હિમવત્પ્રભવે શૃઙ્ગે સહ દેવ્યા મહેશ્વરઃ

એષ તે વિસ્તરો રામ શૈલપુત્ર્યા નિવેદિતઃ
ગઙ્ગાયાઃ પ્રભવં ચૈવ શૃણુ મે સહલક્ષ્મણઃ