રામાયણ · અધ્યાય 1.033

કૃતોદ્વાહે ગતે તસ્મિન્ બ્રહ્મદત્તે ચ રાઘવ
અપુત્રઃ પુત્રલાભાય પૌત્રીમ્ ઇષ્ટિમ્ અકલ્પયત્

ઇષ્ટ્યાં તુ વર્તમાનાયાં કુશનાભં મહીપતિમ્
ઉવાચ પરમપ્રીતઃ કુશો બ્રહ્મસુતસ્ તદા

પુત્રસ્ તે સદૃશઃ પુત્ર ભવિષ્યતિ સુધાર્મિકઃ
ગાધિં પ્રાપ્સ્યસિ તેન ત્વં કીર્તિં લોકે ચ શાશ્વતીમ્

એવમ્ ઉક્ત્વા કુશો રામ કુશનાભં મહીપતિમ્
જગામાકાશમ્ આવિશ્ય બ્રહ્મલોકં સનાતનમ્

કસ્ય ચિત્ ત્વ્ અથ કાલસ્ય કુશનાભસ્ય ધીમતઃ
જજ્ઞે પરમધર્મિષ્ઠો ગાધિર્ ઇત્ય્ એવ નામતઃ

સ પિતા મમ કાકુત્સ્થ ગાધિઃ પરમધાર્મિકઃ
કુશવંશપ્રસૂતો ઽસ્મિ કૌશિકો રઘુનન્દન

પૂર્વજા ભગિની ચાપિ મમ રાઘવ સુવ્રતા
નામ્ના સત્યવતી નામ ઋચીકે પ્રતિપાદિતા

સશરીરા ગતા સ્વર્ગં ભર્તારમ્ અનુવર્તિની
કૌશિકી પરમોદારા સા પ્રવૃત્તા મહાનદી

દિવ્યા પુણ્યોદકા રમ્યા હિમવન્તમ્ ઉપાશ્રિતા
લોકસ્ય હિતકામાર્થં પ્રવૃત્તા ભગિની મમ

તતો ઽહં હિમવત્પાર્શ્વે વસામિ નિયતઃ સુખમ્
ભગિન્યાઃ સ્નેહસંયુક્તઃ કૌશિક્યા રઘુનન્દન

સા તુ સત્યવતી પુણ્યા સત્યે ધર્મે પ્રતિષ્ઠિતા
પતિવ્રતા મહાભાગા કૌશિકી સરિતાં વરા

અહં હિ નિયમાદ્ રામ હિત્વા તાં સમુપાગતઃ
સિદ્ધાશ્રમમ્ અનુપ્રાપ્ય સિદ્ધો ઽસ્મિ તવ તેજસા

એષા રામ મમોત્પત્તિઃ સ્વસ્ય વંશસ્ય કીર્તિતા
દેશસ્ય ચ મહાબાહો યન્ માં ત્વં પરિપૃચ્છસિ

ગતો ઽર્ધરાત્રઃ કાકુત્સ્થ કથાઃ કથયતો મમ
નિદ્રામ્ અભ્યેહિ ભદ્રં તે મા ભૂદ્ વિઘ્નો ઽધ્વનીહ નઃ

નિષ્પન્દાસ્ તરવઃ સર્વે નિલીના મૃગપક્ષિણઃ
નૈશેન તમસા વ્યાપ્તા દિશશ્ ચ રઘુનન્દન

શનૈર્ વિયુજ્યતે સંધ્યા નભો નેત્રૈર્ ઇવાવૃતમ્
નક્ષત્રતારાગહનં જ્યોતિર્ભિર્ અવભાસતે

ઉત્તિષ્ઠતિ ચ શીતાંશુઃ શશી લોકતમોનુદઃ
હ્લાદયન્ પ્રાણિનાં લોકે મનાંસિ પ્રભયા વિભો

નૈશાનિ સર્વભૂતાનિ પ્રચરન્તિ તતસ્ તતઃ
યક્ષરાક્ષસસંઘાશ્ ચ રૌદ્રાશ્ ચ પિશિતાશનાઃ

એવમ્ ઉક્ત્વા મહાતેજા વિરરામ મહામુનિઃ
સાધુ સાધ્વ્ ઇતિ તં સર્વે મુનયો હ્ય્ અભ્યપૂજયન્

રામો ઽપિ સહ સૌમિત્રિઃ કિં ચિદ્ આગતવિસ્મયઃ
પ્રશસ્ય મુનિશાર્દૂલં નિદ્રાં સમુપસેવતે