રામાયણ · અધ્યાય 1.029

અથ તૌ દેશકાલજ્ઞૌ રાજપુત્રાવ્ અરિંદમૌ
દેશે કાલે ચ વાક્યજ્ઞાવ્ અબ્રૂતાં કૌશિકં વચઃ

ભગવઞ્ શ્રોતુમ્ ઇચ્છાવો યસ્મિન્ કાલે નિશાચરૌ
સંરક્ષણીયૌ તૌ બ્રહ્મન્ નાતિવર્તેત તત્ક્ષણમ્

એવં બ્રુવાણૌ કાકુત્સ્થૌ ત્વરમાણૌ યુયુત્સયા
સર્વે તે મુનયઃ પ્રીતાઃ પ્રશશંસુર્ નૃપાત્મજૌ

અદ્ય પ્રભૃતિ ષડ્રાત્રં રક્ષતં રાઘવૌ યુવામ્
દીક્ષાં ગતો હ્ય્ એષ મુનિર્ મૌનિત્વં ચ ગમિષ્યતિ

તૌ તુ તદ્ વચનં શ્રુત્વા રાજપુત્રૌ યશસ્વિનૌ
અનિદ્રૌ ષડહોરાત્રં તપોવનમ્ અરક્ષતામ્

ઉપાસાં ચક્રતુર્ વીરૌ યત્તૌ પરમધન્વિનૌ
રરક્ષતુર્ મુનિવરં વિશ્વામિત્રમ્ અરિંદમૌ

અથ કાલે ગતે તસ્મિન્ ષષ્ઠે ઽહનિ સમાગતે
સૌમિત્રમ્ અબ્રવીદ્ રામો યત્તો ભવ સમાહિતઃ

રામસ્યૈવં બ્રુવાણસ્ય ત્વરિતસ્ય યુયુત્સયા
પ્રજજ્વાલ તતો વેદિઃ સોપાધ્યાયપુરોહિતા

મન્ત્રવચ્ ચ યથાન્યાયં યજ્ઞો ઽસૌ સંપ્રવર્તતે
આકાશે ચ મહાઞ્ શબ્દઃ પ્રાદુર્ આસીદ્ ભયાનકઃ

આવાર્ય ગગનં મેઘો યથા પ્રાવૃષિ નિર્ગતઃ
તથા માયાં વિકુર્વાણૌ રાક્ષસાવ્ અભ્યધાવતામ્

મારીચશ્ ચ સુબાહુશ્ ચ તયોર્ અનુચરાસ્ તથા
આગમ્ય ભીમસંકાશા રુધિરૌઘાન્ અવાસૃજન્

તાવ્ આપતન્તૌ સહસા દૃષ્ટ્વા રાજીવલોચનઃ
લક્ષ્મણં ત્વ્ અભિસંપ્રેક્ષ્ય રામો વચનમ્ અબ્રવીત્

પશ્ય લક્ષ્મણ દુર્વૃત્તાન્ રાક્ષસાન્ પિશિતાશનાન્
માનવાસ્ત્રસમાધૂતાન્ અનિલેન યથાઘનાન્

માનવં પરમોદારમ્ અસ્ત્રં પરમભાસ્વરમ્
ચિક્ષેપ પરમક્રુદ્ધો મારીચોર્ અસિ રાઘવઃ

સ તેન પરમાસ્ત્રેણ માનવેન સમાહિતઃ
સંપૂર્ણં યોજનશતં ક્ષિપ્તઃ સાગરસંપ્લવે

વિચેતનં વિઘૂર્ણન્તં શીતેષુબલપીડિતમ્
નિરસ્તં દૃશ્ય મારીચં રામો લક્ષ્મણમ્ અબ્રવીત્

પશ્ય લક્ષ્મણ શીતેષું માનવં ધર્મસંહિતમ્
મોહયિત્વા નયત્ય્ એનં ન ચ પ્રાણૈર્ વિયુજ્યતે

ઇમાન્ અપિ વધિષ્યામિ નિર્ઘૃણાન્ દુષ્ટચારિણઃ
રાક્ષસાન્ પાપકર્મસ્થાન્ યજ્ઞઘ્નાન્ રુધિરાશનાન્

વિગૃહ્ય સુમહચ્ ચાસ્ત્રમ્ આગ્નેયં રઘુનન્દનઃ
સુબાહુર્ અસિ ચિક્ષેપ સ વિદ્ધઃ પ્રાપતદ્ ભુવિ

શેષાન્ વાયવ્યમ્ આદાય નિજઘાન મહાયશાઃ
રાઘવઃ પરમોદારો મુનીનાં મુદમ્ આવહન્

સ હત્વા રાક્ષસાન્ સર્વાન્ યજ્ઞઘ્નાન્ રઘુનન્દનઃ
ઋષિભિઃ પૂજિતસ્ તત્ર યથેન્દ્રો વિજયે પુરા

અથ યજ્ઞે સમાપ્તે તુ વિશ્વામિત્રો મહામુનિઃ
નિરીતિકા દિશો દૃષ્ટ્વા કાકુત્સ્થમ્ ઇદમ્ અબ્રવીત્

કૃતાર્થો ઽસ્મિ મહાબાહો કૃતં ગુરુવચસ્ ત્વયા
સિદ્ધાશ્રમમ્ ઇદં સત્યં કૃતં રામ મહાયશઃ