રામાયણ · અધ્યાય 1.028

અથ તસ્યાપ્રમેયસ્ય તદ્ વનં પરિપૃચ્છતઃ
વિશ્વામિત્રો મહાતેજા વ્યાખ્યાતુમ્ ઉપચક્રમે

એષ પૂર્વાશ્રમો રામ વામનસ્ય મહાત્મનઃ
સિદ્ધાશ્રમ ઇતિ ખ્યાતઃ સિદ્ધો હ્ય્ અત્ર મહાતપાઃ

એતસ્મિન્ન્ એવ કાલે તુ રાજા વૈરોચનિર્ બલિઃ
નિર્જિત્ય દૈવતગણાન્ સેન્દ્રાંશ્ ચ સમરુદ્ગણાન્
કારયામ્ આસ તદ્ રાજ્યં ત્રિષુ લોકેષુ વિશ્રુતઃ

બલેસ્ તુ યજમાનસ્ય દેવાઃ સાગ્નિપુરોગમાઃ
સમાગમ્ય સ્વયં ચૈવ વિષ્ણુમ્ ઊચુર્ ઇહાશ્રમે

બલિર્ વૈરોચનિર્ વિષ્ણો યજતે યજ્ઞમ્ ઉત્તમમ્
અસમાપ્તે ક્રતૌ તસ્મિન્ સ્વકાર્યમ્ અભિપદ્યતામ્

યે ચૈનમ્ અભિવર્તન્તે યાચિતાર ઇતસ્ તતઃ
યચ્ ચ યત્ર યથાવચ્ ચ સર્વં તેભ્યઃ પ્રયચ્છતિ

સ ત્વં સુરહિતાર્થાય માયાયોગમ્ ઉપાશ્રિતઃ
વામનત્વં ગતો વિષ્ણો કુરુ કલ્યાણમ્ ઉત્તમમ્

અયં સિદ્ધાશ્રમો નામ પ્રસાદાત્ તે ભવિષ્યતિ
સિદ્ધે કર્મણિ દેવેશ ઉત્તિષ્ઠ ભગવન્ન્ ઇતઃ

અથ વિષ્ણુર્ મહાતેજા અદિત્યાં સમજાયત
વામનં રૂપમ્ આસ્થાય વૈરોચનિમ્ ઉપાગમત્

ત્રીન્ ક્રમાન્ અથ ભિક્ષિત્વા પ્રતિગૃહ્ય ચ માનતઃ
આક્રમ્ય લોકાંલ્ લોકાત્મા સર્વભૂતહિતે રતઃ

મહેન્દ્રાય પુનઃ પ્રાદાન્ નિયમ્ય બલિમ્ ઓજસા
ત્રૈલોક્યં સ મહાતેજાશ્ ચક્રે શક્રવશં પુનઃ

તેનૈષ પૂર્વમ્ આક્રાન્ત આશ્રમઃ શ્રમનાશનઃ
મયાપિ ભક્ત્યા તસ્યૈષ વામનસ્યોપભુજ્યતે

એતમ્ આશ્રમમ્ આયાન્તિ રાક્ષસા વિઘ્નકારિણઃ
અત્ર તે પુરુષવ્યાઘ્ર હન્તવ્યા દુષ્ટચારિણઃ

અદ્ય ગચ્છામહે રામ સિદ્ધાશ્રમમ્ અનુત્તમમ્
તદ્ આશ્રમપદં તાત તવાપ્ય્ એતદ્ યથા મમ

તં દૃષ્ટ્વા મુનયઃ સર્વે સિદ્ધાશ્રમનિવાસિનઃ
ઉત્પત્યોત્પત્ય સહસા વિશ્વામિત્રમ્ અપૂજયન્

યથાર્હં ચક્રિરે પૂજાં વિશ્વામિત્રાય ધીમતે
તથૈવ રાજપુત્રાભ્યામ્ અકુર્વન્ન્ અતિથિક્રિયામ્

મુહૂર્તમ્ અથ વિશ્રાન્તૌ રાજપુત્રાવ્ અરિંદમૌ
પ્રાઞ્જલી મુનિશાર્દૂલમ્ ઊચતૂ રઘુનન્દનૌ

અદ્યૈવ દીક્ષાં પ્રવિશ ભદ્રં તે મુનિપુંગવ
સિદ્ધાશ્રમો ઽયં સિદ્ધઃ સ્યાત્ સત્યમ્ અસ્તુ વચસ્ તવ

એવમ્ ઉક્તો મહાતેજા વિશ્વામિત્રો મહામુનિઃ
પ્રવિવેશ તદા દીક્ષાં નિયતો નિયતેન્દ્રિયઃ

કુમારાવ્ અપિ તાં રાત્રિમ્ ઉષિત્વા સુસમાહિતૌ
પ્રભાતકાલે ચોત્થાય વિશ્વામિત્રમ્ અવન્દતામ્