રામાયણ · અધ્યાય 1.026

અથ તાં રજનીમ્ ઉષ્ય વિશ્વામિરો મહાયશાઃ
પ્રહસ્ય રાઘવં વાક્યમ્ ઉવાચ મધુરાક્ષરમ્

પતિતુષ્ટો ઽસ્મિ ભદ્રં તે રાજપુત્ર મહાયશઃ
પ્રીત્યા પરમયા યુક્તો દદામ્ય્ અસ્ત્રાણિ સર્વશઃ

દેવાસુરગણાન્ વાપિ સગન્ધર્વોરગાન્ અપિ
યૈર્ અમિત્રાન્ પ્રસહ્યાજૌ વશીકૃત્ય જયિષ્યસિ

તાનિ દિવ્યાનિ ભદ્રં તે દદામ્ય્ અસ્ત્રાણિ સર્વશઃ
દણ્ડચક્રં મહદ્ દિવ્યં તવ દાસ્યામિ રાઘવ

ધર્મચક્રં તતો વીર કાલચક્રં તથૈવ ચ
વિષ્ણુચક્રં તથાત્યુગ્રમ્ ઐન્દ્રં ચક્રં તથૈવ ચ

વજ્રમ્ અસ્ત્રં નરશ્રેષ્ઠ શૈવં શૂલવરં તથા
અસ્ત્રં બ્રહ્મશિરશ્ ચૈવ ઐષીકમ્ અપિ રાઘવ
દદામિ તે મહાબાહો બ્રાહ્મમ્ અસ્ત્રમ્ અનુત્તમમ્

ગદે દ્વે ચૈવ કાકુત્સ્થ મોદકી શિખરી ઉભે
પ્રદીપ્તે નરશાર્દૂલ પ્રયચ્છામિ નૃપાત્મજ

ધર્મપાશમ્ અહં રામ કાલપાશં તથૈવ ચ
વારુણં પાશમ્ અસ્ત્રં ચ દદાન્ય્ અહમ્ અનુત્તમમ્

અશની દ્વે પ્રયચ્છામિ શુષ્કાર્દ્રે રઘુનન્દન

દદામિ ચાસ્ત્રં પૈનાકમ્ અસ્ત્રં નારાયણં તથા
આગ્નેયમ્ અસ્ત્ર દયિતં શિખરં નામ નામતઃ

વાયવ્યં પ્રથમં નામ દદામિ તવ રાઘવ
અસ્ત્રં હયશિરો નામ ક્રૌઞ્ચમ્ અસ્ત્રં તથૈવ ચ

શક્તિ દ્વયં ચ કાકુત્સ્થ દદામિ તવ ચાનઘ
કઙ્કાલં મુસલં ઘોરં કાપાલમ્ અથ કઙ્કણમ્

ધારયન્ત્ય્ અસુરા યાનિ દદામ્ય્ એતાનિ સર્વશઃ
વૈદ્યાધરં મહાસ્ત્રં ચ નન્દનં નામ નામતઃ

અસિરત્નં મહાબાહો દદામિ નૃવરાત્મજ
ગાન્ધર્વમ્ અસ્ત્રં દયિતં માનવં નામ નામતઃ

પ્રસ્વાપનપ્રશમને દદ્મિ સૌરં ચ રાઘવ
દર્પણં શોષણં ચૈવ સંતાપનવિલાપને

મદનં ચૈવ દુર્ધર્ષં કન્દર્પદયિતં તથા
પૈશાચમ્ અસ્ત્રં દયિતં મોહનં નામ નામતઃ
પ્રતીચ્છ નરશાર્દૂલ રાજપુત્ર મહાયશઃ

તામસં નરશાર્દૂલ સૌમનં ચ મહાબલમ્
સંવર્તં ચૈવ દુર્ધર્ષં મૌસલં ચ નૃપાત્મજ

સત્યમ્ અસ્ત્રં મહાબાહો તથા માયાધરં પરમ્
ઘોરં તેજઃપ્રભં નામ પરતેજોઽપકર્ષણમ્

સોમાસ્ત્રં શિશિરં નામ ત્વાષ્ટ્રમ્ અસ્ત્રં સુદામનમ્
દારુણં ચ ભગસ્યાપિ શીતેષુમ્ અથ માનવમ્

એતાન્ નામ મહાબાહો કામરૂપાન્ મહાબલાન્
ગૃહાણ પરમોદારાન્ ક્ષિપ્રમ્ એવ નૃપાત્મજ

સ્થિતસ્ તુ પ્રાઙ્મુખો ભૂત્વા શુચિર્ નિવરતસ્ તદા
દદૌ રામાય સુપ્રીતો મન્ત્રગ્રામમ્ અનુત્તમમ્

જપતસ્ તુ મુનેસ્ તસ્ય વિશ્વામિત્રસ્ય ધીમતઃ
ઉપતસ્થુર્ મહાર્હાણિ સર્વાણ્ય્ અસ્ત્રાણિ રાઘવમ્

ઊચુશ્ ચ મુદિતા રામં સર્વે પ્રાઞ્જલયસ્ તદા
ઇમે સ્મ પરમોદાર કિંકરાસ્ તવ રાઘવ

પ્રતિગૃહ્ય ચ કાકુત્સ્થઃ સમાલભ્ય ચ પાણિના
મનસા મે ભવિષ્યધ્વમ્ ઇતિ તાન્ય્ અભ્યચોદયત્

તતઃ પ્રીતમના રામો વિશ્વામિત્રં મહામુનિમ્
અભિવાદ્ય મહાતેજા ગમનાયોપચક્રમે