રામાયણ · અધ્યાય 1.022

પ્રભાતાયાં તુ શર્વર્યાં વિશ્વામિત્રો મહામુનિઃ
અભ્યભાષત કાકુત્સ્થં શયાનં પર્ણસંસ્તરે

કૌસલ્યા સુપ્રજા રામ પૂર્વા સંધ્યા પ્રવર્તતે
ઉત્તિષ્ઠ નરશાર્દૂલ કર્તવ્યં દૈવમ્ આહ્નિકમ્

તસ્યર્ષેઃ પરમોદારં વચઃ શ્રુત્વા નૃપાત્મજૌ
સ્નાત્વા કૃતોદકૌ વીરૌ જેપતુઃ પરમં જપમ્

કૃતાહ્નિકૌ મહાવીર્યૌ વિશ્વામિત્રં તપોધનમ્
અભિવાદ્યાભિસંહૃષ્ટૌ ગમનાયોપતસ્થતુઃ

તૌ પ્રયાતે મહાવીર્યૌ દિવ્યં ત્રિપથગાં નદીમ્
દદૃશાતે તતસ્ તત્ર સરય્વાઃ સંગમે શુભે

તત્રાશ્રમપદં પુણ્યમ્ ઋષીણામ્ ઉગ્રતેજસામ્
બહુવર્ષસહસ્રાણિ તપ્યતાં પરમં તપઃ

તં દૃષ્ટ્વા પરમપ્રીતૌ રાઘવૌ પુણ્યમ્ આશ્રમમ્
ઊચતુસ્ તં મહાત્માનં વિશ્વામિત્રમ્ ઇદં વચઃ

કસ્યાયમ્ આશ્રમઃ પુણ્યઃ કો ન્વ્ અસ્મિન્ વસતે પુમાન્
ભગવઞ્ શ્રોતુમ્ ઇચ્છાવઃ પરં કૌતૂહલં હિ નૌ

તયોસ્ તદ્ વચનં શ્રુત્વા પ્રહસ્ય મુનિપુંગવઃ
અબ્રવીચ્ છ્રૂયતાં રામ યસ્યાયં પૂર્વ આશ્રમઃ

કન્દર્પો મૂર્તિમાન્ આસીત્ કામ ઇત્ય્ ઉચ્યતે બુધૈઃ

તપસ્યન્તમ્ ઇહ સ્થાણું નિયમેન સમાહિતમ્
કૃતોદ્વાહં તુ દેવેશં ગચ્છન્તં સમરુદ્ગણમ્
ધર્ષયામ્ આસ દુર્મેધા હુંકૃતશ્ ચ મહાત્મના

દગ્ધસ્ય તસ્ય રૌદ્રેણ ચક્ષુષા રઘુનન્દન
વ્યશીર્યન્ત શરીરાત્ સ્વાત્ સર્વગાત્રાણિ દુર્મતેઃ

તસ્ય ગાત્રં હતં તત્ર નિર્દગ્ધસ્ય મહાત્મના
અશરીરઃ કૃતઃ કામઃ ક્રોધાદ્ દેવેશ્વરેણ હ

અનઙ્ગ ઇતિ વિખ્યાતસ્ તદા પ્રભૃતિ રાઘવ
સ ચાઙ્ગવિષયઃ શ્રીમાન્ યત્રાઙ્ગં સ મુમોચ હ

તસ્યાયમ્ આશ્રમઃ પુણ્યસ્ તસ્યેમે મુનયઃ પુરા
શિષ્યા ધર્મપરા વીર તેષાં પાપં ન વિદ્યતે

ઇહાદ્ય રજનીં રામ વસેમ શુભદર્શન
પુણ્યયોઃ સરિતોર્ મધ્યે શ્વસ્ તરિષ્યામહે વયમ્

તેષાં સંવદતાં તત્ર તપો દીર્ઘેણ ચક્ષુષા
વિજ્ઞાય પરમપ્રીતા મુનયો હર્ષમ્ આગમન્

અર્ઘ્યં પાદ્યં તથાતિથ્યં નિવેદ્યકુશિકાત્મજે
રામલક્ષ્મણયોઃ પશ્ચાદ્ અકુર્વન્ન્ અતિથિક્રિયામ્

સત્કારં સમનુપ્રાપ્ય કથાભિર્ અભિરઞ્જયન્
ન્યવસન્ સુસુખં તત્ર કામાશ્રમપદે તદા