રામાયણ · અધ્યાય 1.018

તચ્ છ્રુત્વા રાજસિંહસ્ય વાક્યમ્ અદ્ભુતવિસ્તરમ્
હૃષ્ટરોમા મહાતેજા વિશ્વામિત્રો ઽભ્યભાષત

સદૃશં રાજશાર્દૂલ તવૈતદ્ ભુવિ નાન્યતઃ
મહાવંશપ્રસૂતસ્ય વસિષ્ઠવ્યપદેશિનઃ

યત્ તુ મે હૃદ્ગતં વાક્યં તસ્ય કાર્યસ્ય નિશ્ચયમ્
કુરુષ્વ રાજશાર્દૂલ ભવ સત્યપ્રતિશ્રવઃ

અહં નિયમમ્ આતિષ્ઠ સિદ્ધ્યર્થં પુરુષર્ષભ
તસ્ય વિઘ્નકરૌ દ્વૌ તુ રાક્ષસૌ કામરૂપિણૌ

વ્રતે મે બહુશશ્ ચીર્ણે સમાપ્ત્યાં રાક્ષસાવ્ ઇમૌ
મારીચશ્ ચ સુબાહુશ્ ચ વીર્યવન્તૌ સુશિક્ષિતૌ
તૌ માંસરુધિરૌઘેણ વેદિં તામ્ અભ્યવર્ષતામ્

અવધૂતે તથા ભૂતે તસ્મિન્ નિયમનિશ્ચયે
કૃતશ્રમો નિરુત્સાહસ્ તસ્માદ્ દેશાદ્ અપાક્રમે

ન ચ મે ક્રોધમ્ ઉત્સ્રષ્ટું બુદ્ધિર્ ભવતિ પાર્થિવ
તથાભૂતા હિ સા ચર્યા ન શાપસ્ તત્ર મુચ્યતે

સ્વપુત્રં રાજશાર્દૂલ રામં સત્યપરાક્રમમ્
કાકપક્ષધરં શૂરં જ્યેષ્ઠં મે દાતુમ્ અર્હસિ

શક્તો હ્ય્ એષ મયા ગુપ્તો દિવ્યેન સ્વેન તેજસા
રાક્ષસા યે વિકર્તારસ્ તેષામ્ અપિ વિનાશને

શ્રેયશ્ ચાસ્મૈ પ્રદાસ્યામિ બહુરૂપં ન સંશયઃ
ત્રયાણામ્ અપિ લોકાનાં યેન ખ્યાતિં ગમિષ્યતિ

ન ચ તૌ રામમ્ આસાદ્ય શક્તૌ સ્થાતું કથં ચન
ન ચ તૌ રાઘવાદ્ અન્યો હન્તુમ્ ઉત્સહતે પુમાન્

વીર્યોત્સિક્તૌ હિ તૌ પાપૌ કાલપાશવશં ગતૌ
રામસ્ય રાજશાર્દૂલ ન પર્યાપ્તૌ મહાત્મનઃ

ન ચ પુત્રકૃતં સ્નેહં કર્તુમ્ અર્હસિ પાર્થિવ
અહં તે પ્રતિજાનામિ હતૌ તૌ વિદ્ધિ રાક્ષસૌ

અહં વેદ્મિ મહાત્માનં રામં સત્યપરાક્રમમ્
વસિષ્ઠો ઽપિ મહાતેજા યે ચેમે તપસિ સ્થિતાઃ

યદિ તે ધર્મલાભં ચ યશશ્ ચ પરમં ભુવિ
સ્થિરમ્ ઇચ્છસિ રાજેન્દ્ર રામં મે દાતુમ્ અર્હસિ

યદ્ય્ અભ્યનુજ્ઞાં કાકુત્સ્થ દદતે તવ મન્ત્રિણઃ
વસિષ્ઠ પ્રમુખાઃ સર્વે તતો રામં વિસર્જય

અભિપ્રેતમ્ અસંસક્તમ્ આત્મજં દાતુમ્ અર્હસિ
દશરાત્રં હિ યજ્ઞસ્ય રામં રાજીવલોચનમ્

નાત્યેતિ કાલો યજ્ઞસ્ય યથાયં મમ રાઘવ
તથા કુરુષ્વ ભદ્રં તે મા ચ શોકે મનઃ કૃથાઃ

ઇત્ય્ એવમ્ ઉક્ત્વા ધર્માત્મા ધર્માર્થસહિતં વચઃ
વિરરામ મહાતેજા વિશ્વામિત્રો મહામુનિઃ

ઇતિ હૃદયમનોવિદારણં મુનિવચનં તદ્ અતીવ શુશ્રુવાન્
નરપતિર્ અગમદ્ ભયં મહદ્ વ્યથિતમનાઃ પ્રચચાલ ચાસનાત્