રામાયણ · અધ્યાય 1.016

પુત્રત્વં તુ ગતે વિષ્ણૌ રાજ્ઞસ્ તસ્ય મહાત્મનઃ
ઉવાચ દેવતાઃ સર્વાઃ સ્વયમ્ભૂર્ ભગવાન્ ઇદમ્

સત્યસંધસ્ય વીરસ્ય સર્વેષાં નો હિતૈષિણઃ
વિષ્ણોઃ સહાયાન્ બલિનઃ સૃજધ્વં કામરૂપિણઃ

માયાવિદશ્ ચ શૂરાંશ્ ચ વાયુવેગસમાઞ્જવે
નયજ્ઞાન્ બુદ્ધિસંપન્નાન્ વિષ્ણુતુલ્યપરાક્રમાન્

અસંહાર્યાન્ ઉપાયજ્ઞાન્ દિવ્યસંહનનાન્વિતાન્
સર્વાસ્ત્રગુણસંપન્નાન્ અમૃતપ્રાશનાન્ ઇવ

અપ્સરઃસુ ચ મુખ્યાસુ ગન્ધર્વીણાં તનૂષુ ચ
યક્ષપન્નગકન્યાસુ ઋષ્કવિદ્યાધરીષુ ચ

કિંનરીણાં ચ ગાત્રેષુ વાનરીણાં તનૂષુ ચ
સૃજધ્વં હરિરૂપેણ પુત્રાંસ્ તુલ્યપરાક્રમાન્

તે તથોક્તા ભગવતા તત્ પ્રતિશ્રુત્ય શાસનમ્
જનયામ્ આસુર્ એવં તે પુત્રાન્ વાનરરૂપિણઃ

ઋષયશ્ ચ મહાત્માનઃ સિદ્ધવિદ્યાધરોરગાઃ
ચારણાશ્ ચ સુતાન્ વીરાન્ સસૃજુર્ વનચારિણઃ

તે સૃષ્ટા બહુસાહસ્રા દશગ્રીવવધોદ્યતાઃ
અપ્રમેયબલા વીરા વિક્રાન્તાઃ કામરૂપિણઃ

તે ગજાચલસંકાશા વપુષ્મન્તો મહાબલાઃ
ઋક્ષવાનરગોપુચ્છાઃ ક્ષિપ્રમ્ એવાભિજજ્ઞિરે

યસ્ય દેવસ્ય યદ્ રૂપં વેષો યશ્ ચ પરાક્રમઃ
અજાયત સમસ્તેન તસ્ય તસ્ય સુતઃ પૃથક્

ગોલાઙ્ગૂલીષુ ચોત્પન્નાઃ કે ચિત્ સંમતવિક્રમાઃ
ઋક્ષીષુ ચ તથા જાતા વાનરાઃ કિંનરીષુ ચ

શિલાપ્રહરણાઃ સર્વે સર્વે પાદપયોધિનઃ
નખદંષ્ટ્રાયુધાઃ સર્વે સર્વે સર્વાસ્ત્રકોવિદાઃ

વિચાલયેયુઃ શૈલેન્દ્રાન્ ભેદયેયુઃ સ્થિરાન્ દ્રુમાન્
ક્ષોભયેયુશ્ ચ વેગેન સમુદ્રં સરિતાં પતિમ્

દારયેયુઃ ક્ષિતિં પદ્ભ્યામ્ આપ્લવેયુર્ મહાર્ણવમ્
નભસ્તલં વિશેયુશ્ ચ ગૃહ્ણીયુર્ અપિ તોયદાન્

ગૃહ્ણીયુર્ અપિ માતઙ્ગાન્ મત્તાન્ પ્રવ્રજતો વને
નર્દમાનાંશ્ ચ નાદેન પાતયેયુર્ વિહંગમાન્

ઈદૃશાનાં પ્રસૂતાનિ હરીણાં કામરૂપિણામ્
શતં શતસહસ્રાણિ યૂથપાનાં મહાત્મનામ્
બભૂવુર્ યૂથપશ્રેષ્ઠા વીરાંશ્ ચાજનયન્ હરીન્

અન્યે ઋક્ષવતઃ પ્રસ્થાન્ ઉપતસ્થુઃ સહસ્રશઃ
અન્યે નાનાવિધાઞ્ શૈલાન્ કાનનાનિ ચ ભેજિરે

સૂર્યપુત્રં ચ સુગ્રીવં શક્રપુત્રં ચ વાલિનમ્
ભ્રાતરાવ્ ઉપતસ્થુસ્ તે સર્વ એવ હરીશ્વરાઃ

તૈર્ મેઘવૃન્દાચલકૂટકલ્પૈર્ મહાબલૈર્ વાનરયૂથપાલૈઃ
બભૂવ ભૂર્ ભીમશરીરરૂપૈઃ સમાવૃતા રામસહાયહેતોઃ