રામાયણ · અધ્યાય 1.006

પુર્યાં તસ્યામ્ અયોધ્યાયાં વેદવિત્ સર્વસંગ્રહઃ
દીર્ઘદર્શી મહાતેજાઃ પૌરજાનપદપ્રિયઃ

ઇક્ષ્વાકૂણામ્ અતિરથો યજ્વા ધર્મરતો વશી
મહર્ષિકલ્પો રાજર્ષિસ્ ત્રિષુ લોકૃષુ વિશ્રુતઃ

બલવાન્ નિહતામિત્રો મિત્રવાન્ વિજિતેન્દ્રિયઃ
ધનૈશ્ ચ સંચયૈશ્ ચાન્યૈઃ શક્રવૈશ્રવણોપમઃ

યથા મનુર્ મહાતેજા લોકસ્ય પરિરક્ષિતા
તથા દશરથો રાજા વસઞ્ જગદ્ અપાલયત્

તેન સત્યાભિસંધેન ત્રિવર્ગમ્ અનુતિષ્ઠતા
પાલિતા સા પુરી શ્રેષ્ઠેન્દ્રેણ ઇવામરાવતી

તસ્મિન્ પુરવરે હૃષ્ટા ધર્માત્મના બહુશ્રુતાઃ
નરાસ્ તુષ્ટાધનૈઃ સ્વૈઃ સ્વૈર્ અલુબ્ધાઃ સત્યવાદિનઃ

નાલ્પસંનિચયઃ કશ્ ચિદ્ આસીત્ તસ્મિન્ પુરોત્તમે
કુટુમ્બી યો હ્ય્ અસિદ્ધાર્થો ઽગવાશ્વધનધાન્યવાન્

કામી વા ન કદર્યો વા નૃશંસઃ પુરુષઃ ક્વ ચિત્
દ્રષ્ટું શક્યમ્ અયોધ્યાયાં નાવિદ્વાન્ ન ચ નાસ્તિકઃ

સર્વે નરાશ્ ચ નાર્યશ્ ચ ધર્મશીલાઃ સુસંયતાઃ
મુદિતાઃ શીલવૃત્તાભ્યાં મહર્ષય ઇવામલાઃ

નાકુણ્ડલી નામુકુટી નાસ્રગ્વી નાલ્પભોગવાન્
નામૃષ્ટો નાનુલિપ્તાઙ્ગો નાસુગન્ધશ્ ચ વિદ્યતે

નામૃષ્ટભોજી નાદાતા નાપ્ય્ અનઙ્ગદનિષ્કધૃક્
નાહસ્તાભરણો વાપિ દૃશ્યતે નાપ્ય્ અનાત્મવાન્

નાનાહિતાગ્નિર્ નાયજ્વા વિપ્રો નાપ્ય્ અસહસ્રદઃ
કશ્ ચિદ્ આસીદ્ અયોધ્યાયાં ન ચ નિર્વૃત્તસંકરઃ

સ્વકર્મનિરતા નિત્યં બ્રાહ્મણા વિજિતેન્દ્રિયાઃ
દાનાધ્યયનશીલાશ્ ચ સંયતાશ્ ચ પ્રતિગ્રહે

ન નાસ્તિકો નાનૃતકો ન કશ્ ચિદ્ અબહુશ્રુતઃ
નાસૂયકો ન ચાશક્તો નાવિદ્વાન્ વિદ્યતે તદા

ન દીનઃ ક્ષિપ્તચિત્તો વા વ્યથિતો વાપિ કશ્ ચન
કશ્ ચિન્ નરો વા નારી વા નાશ્રીમાન્ નાપ્ય્ અરૂપવાન્
દ્રષ્ટું શક્યમ્ અયોધ્યાયાં નાપિ રાજન્યભક્તિમાન્

વર્ણેષ્વ્ અગ્ર્યચતુર્થેષુ દેવતાતિથિપૂજકાઃ
દીર્ઘાયુષો નરાઃ સર્વે ધર્મં સત્યં ચ સંશ્રિતાઃ

ક્ષત્રં બ્રહ્મમુખં ચાસીદ્ વૈશ્યાઃ ક્ષત્રમ્ અનુવ્રતાઃ
શૂદ્રાઃ સ્વધર્મનિરતાસ્ ત્રીન્ વર્ણાન્ ઉપચારિણઃ

સા તેનેક્ષ્વાકુનાથેન પુરી સુપરિરક્ષિતા
યથા પુરસ્તાન્ મનુના માનવેન્દ્રેણ ધીમતા

યોધાનામ્ અગ્નિકલ્પાનાં પેશલાનામ્ અમર્ષિણામ્
સંપૂર્ણાકૃતવિદ્યાનાં ગુહાકેસરિણામ્ ઇવ

કામ્બોજવિષયે જાતૈર્ બાહ્લીકૈશ્ ચ હયોત્તમૈઃ
વનાયુજૈર્ નદીજૈશ્ ચ પૂર્ણાહરિહયોપમૈઃ

વિન્ધ્યપર્વતજૈર્ મત્તૈઃ પૂર્ણા હૈમવતૈર્ અપિ
મદાન્વિતૈર્ અતિબલૈર્ માતઙ્ગૈઃ પર્વતોપમૈઃ

અઞ્જનાદ્ અપિ નિષ્ક્રાન્તૈર્ વામનાદ્ અપિ ચ દ્વિપૈઃ
ભદ્રમન્દ્રૈર્ ભદ્રમૃગૈર્ મૃગમન્દ્રૈશ્ ચ સા પુરી

નિત્યમત્તૈઃ સદા પૂર્ણા નાગૈર્ અચલસંનિભૈઃ
સા યોજને ચ દ્વે ભૂયઃ સત્યનામા પ્રકાશતે

તાં સત્યનામાં દૃઢતોરણાર્ગલામ્ ગૃહૈર્ વિચિત્રૈર્ ઉપશોભિતાં શિવામ્
પુરીમ્ અયોધ્યાં નૃસહસ્રસંકુલાં શશાસ વૈ શક્રસમો મહીપતિઃ