રામાયણ (દક્ષિણી પાઠ) · અધ્યાય 2.92

રામાયણ, અયોધ્યાકાણ્ડ, 92
નિવેશ્ય સેનાં તુ વિભુઃ પદ્ભ્યાં પાદવતાં વરઃ ।
અભિગન્તું સ કાકુત્સ્થમ્ ઇયેષ ગુરુવર્તકમ્

નિવિષ્ટમાત્રે સૈન્યે તુ યથોદ્દેશં વિનીતવત્ ।
ભરતો ભ્રાતરં વાક્યં શત્રુઘ્નમ્ ઇદમ્ અબ્રવીત્

ક્ષિપ્રં વનમ્ ઇદં સૌમ્ય નરસંઘૈઃ સમન્તતઃ ।
લુબ્ધૈશ્ ચ સહિતૈર્ એભિસ્ ત્વમ્ અન્વેષિતુમ્ અર્હસિ

યાવન્ ન રામં દ્રક્ષ્યામિ લક્ષ્મણં વા મહાબલમ્ ।
વૈદેહીં વા મહાભાગાં ન મે શાન્તિર્ ભવિષ્યતિ

યાવન્ ન ચન્દ્રસંકાશં દ્રક્ષ્યામિ શુભમ્ આનનમ્ ।
ભ્રાતુઃ પદ્મપલાશાક્ષં ન મે શાન્તિર્ ભવિષ્યતિ

યાવન્ ન ચરણૌ ભ્રાતુઃ પાર્થિવવ્યઞ્જનાન્વિતૌ ।
શિરસા ધારયિષ્યામિ ન મે શાન્તિર્ ભવિષ્યતિ

યાવન્ ન રાજ્યે રાજ્યાર્હઃ પિતૃપૈતામહે સ્થિતઃ ।
અભિષેકજલક્લિન્નો ન મે શાન્તિર્ ભવિષ્યતિ

કૃતકૃત્યા મહાભાગા વૈદેહી જનકાત્મજા ।
ભર્તારં સાગરાન્તાયાઃ પૃથિવ્યા યાનુગચ્છતિ

સુભગશ્ ચિત્રકૂટો ઽસૌ ગિરિરાજોપમો ગિરિઃ ।
યસ્મિન્ વસતિ કાકુત્સ્થઃ કુબેર ઇવ નન્દને

કૃતકાર્યમ્ ઇદં દુર્ગં વનં વ્યાલનિષેવિતમ્ ।
યદ્ અધ્યાસ્તે મહાતેજા રામઃ શસ્ત્રભૃતાં વરઃ

એવમ્ ઉક્ત્વા મહાતેજા ભરતઃ પુરુષર્ષભઃ ।
પદ્ભ્યામ્ એવ મહાતેજાઃ પ્રવિવેશ મહદ્ વનમ્

સ તાનિ દ્રુમજાલાનિ જાતાનિ ગિરિસાનુષુ ।
પુષ્પિતાગ્રાણિ મધ્યેન જગામ વદતાં વરઃ

સ ગિરેશ્ ચિત્રકૂટસ્ય સાલમ્ આસાદ્ય પુષ્પિતમ્ ।
રામાશ્રમગતસ્યાગ્નેર્ દદર્શ ધ્વજમ્ ઉચ્છ્રિતમ્

તં દૃષ્ટ્વા ભરતઃ શ્રીમાન્ મુમોદ સહબાન્ધવઃ ।
અત્ર રામ ઇતિ જ્ઞાત્વા ગતઃ પારમ્ ઇવામ્ભસઃ

સ ચિત્રકૂટે તુ ગિરૌ નિશામ્ય રામાશ્રમં પુણ્યજનોપપન્નમ્ ।
ગુહેન સાર્ધં ત્વરિતો જગામ પુનર્ નિવેશ્યૈવ ચમૂં મહાત્મા