રામાયણ (દક્ષિણી પાઠ) · અધ્યાય 2.24

રામાયણ, અયોધ્યાકાણ્ડ, 24
એવમ્ ઉક્તા તુ વૈદેહી પ્રિયાર્હા પ્રિયવાદિની ।
પ્રણયાદ્ એવ સંક્રુદ્ધા ભર્તારમ્ ઇદમ્ અબ્રવીત્

આર્યપુત્ર પિતા માતા ભ્રાતા પુત્રસ્ તથા સ્નુષા ।
સ્વાનિ પુણ્યાનિ ભુઞ્જાનાઃ સ્વં સ્વં ભાગ્યમ્ ઉપાસતે

ભર્તુર્ ભાગ્યં તુ ભાર્યૈકા પ્રાપ્નોતિ પુરુષર્ષભ ।
અતશ્ ચૈવાહમ્ આદિષ્ટા વને વસ્તવ્યમ્ ઇત્ય્ અપિ

ન પિતા નાત્મજો નાત્મા ન માતા ન સખીજનઃ ।
ઇહ પ્રેત્ય ચ નારીણાં પતિર્ એકો ગતિઃ સદા

યદિ ત્વં પ્રસ્થિતો દુર્ગં વનમ્ અદ્યૈવ રાઘવ ।
અગ્રતસ્ તે ગમિષ્યામિ મૃદ્નન્તી કુશકણ્ટકાન્

ઈર્ષ્યારોષૌ બહિષ્કૃત્ય ભુક્તશેષમ્ ઇવોદકમ્ ।
નય માં વીર વિશ્રબ્ધઃ પાપં મયિ ન વિદ્યતે

પ્રાસાદાગ્રૈર્ વિમાનૈર્ વા વૈહાયસગતેન વા ।
સર્વાવસ્થાગતા ભર્તુઃ પાદચ્છાયા વિશિષ્યતે

અનુશિષ્ટાસ્મિ માત્રા ચ પિત્રા ચ વિવિધાશ્રયમ્ ।
નાસ્મિ સમ્પ્રતિ વક્તવ્યા વર્તિતવ્યં યથા મયા

સુખં વને નિવત્સ્યામિ યથૈવ ભવને પિતુઃ ।
અચિન્તયન્તી ત્રીંલ્ લોકાંશ્ ચિન્તયન્તી પતિવ્રતમ્

શુશ્રૂષમાણા તે નિત્યં નિયતા બ્રહ્મચારિણી ।
સહ રંસ્યે ત્વયા વીર વનેષુ મધુગન્ધિષુ

ત્વં હિ કર્તું વને શક્તો રામ સમ્પરિપાલનમ્ ।
અન્યસ્યાપિ જનસ્યેહ કિં પુનર્ મમ માનદ

ફલમૂલાશના નિત્યં ભવિષ્યામિ ન સંશયઃ ।
ન તે દુઃખં કરિષ્યામિ નિવસન્તી સહ ત્વયા

ઇચ્છામિ સરિતઃ શૈલાન્ પલ્વલાનિ વનાનિ ચ ।
દ્રષ્ટું સર્વત્ર નિર્ભીતા ત્વયા નાથેન ધીમતા

હંસકારણ્ડવાકીર્ણાઃ પદ્મિનીઃ સાધુપુષ્પિતાઃ ।
ઇચ્છેયં સુખિની દ્રષ્ટું ત્વયા વીરેણ સંગતા

સહ ત્વયા વિશાલાક્ષ રંસ્યે પરમનન્દિની ।
એવં વર્ષસહસ્રાણાં શતં વાહં ત્વયા સહ

સ્વર્ગે ઽપિ ચ વિના વાસો ભવિતા યદિ રાઘવ ।
ત્વયા મમ નરવ્યાઘ્ર નાહં તમ્ અપિ રોચયે

અહં ગમિષ્યામિ વનં સુદુર્ગમં મૃગાયુતં વાનરવારણૈર્ યુતમ્ ।
વને નિવત્સ્યામિ યથા પિતુર્ ગૃહે તવૈવ પાદાવ્ ઉપગૃહ્ય સંમતા

અનન્યભાવામ્ અનુરક્તચેતસં ત્વયા વિયુક્તાં મરણાય નિશ્ચિતામ્ ।
નયસ્વ માં સાધુ કુરુષ્વ યાચનાં ન તે મયાતો ગુરુતા ભવિષ્યતિ

તથા બ્રુવાણામ્ અપિ ધર્મવત્સલો ન ચ સ્મ સીતાં નૃવરો નિનીષતિ ।
ઉવાચ ચૈનાં બહુ સંનિવર્તને વને નિવાસસ્ય ચ દુઃખિતાં પ્રતિ