રામાયણ (સંશોધિત પાઠ) · અધ્યાય 3.68

એવમ્ ઉક્તૌ તુ તૌ વીરૌ કબન્ધેન નરેશ્વરૌ
ગિરિપ્રદરમ્ આસાદ્ય પાવકં વિસસર્જતુઃ ॥

લક્ષ્મણસ્ તુ મહોલ્કાભિર્ જ્વલિતાભિઃ સમન્તતઃ
ચિતામ્ આદીપયામાસ સા પ્રજજ્વાલ સર્વતઃ ॥

તચ્ છરીરં કબન્ધસ્ય ઘૃતપિણ્ડોપમં મહત્
મેદસા પચ્યમાનસ્ય મન્દં દહતિ પાવકઃ ॥

સ વિધૂય ચિતામ્ આશુ વિધૂમો ઽગ્નિર્ ઇવોત્થિતઃ
અરજે વાસસી બિભ્રન્ માલાં દિવ્યાં મહાબલઃ ॥

તતશ્ ચિતાયા વેગેન ભાસ્વરો વિરજામ્બરઃ
ઉત્પપાતાશુ સંહૃષ્ટઃ સર્વપ્રત્યઙ્ગભૂષણઃ ॥

વિમાને ભાસ્વરે તિષ્ઠન્ હંસયુક્તે યશસ્કરે
પ્રભયા ચ મહાતેજા દિશો દશ વિરાજયન્ ॥

સો ઽન્તરિક્ષગતો રામં કબન્ધો વાક્યમ્ અબ્રવીત્
શૃણુ રાઘવ તત્ત્વેન યથા સીમામ્ અવાપ્સ્યસિ ॥

રામ ષડ્ યુક્તયો લોકે યાભિઃ સર્વં વિમૃશ્યતે
પરિમૃષ્ટો દશાન્તેન દશાભાગેન સેવ્યતે ॥

દશાભાગગતો હીનસ્ ત્વં રામ સહલક્ષ્મણઃ
યત્ કૃતે વ્યસનં પ્રાપ્તં ત્વયા દારપ્રધર્ષણમ્ ॥

તદ્ અવશ્યં ત્વયા કાર્યઃ સ સુહૃત્ સુહૃદાં વર
અકૃત્વા ન હિ તે સિદ્ધિમ્ અહં પશ્યામિ ચિન્તયન્ ॥

શ્રૂયતાં રામ વક્ષ્યામિ સુગ્રીવો નામ વાનરઃ
ભ્રાત્રા નિરસ્તઃ ક્રુદ્ધેન વાલિના શક્રસૂનુના ॥

ઋષ્યમૂકે ગિરિવરે પમ્પાપર્યન્તશોભિતે
નિવસત્ય્ આત્મવાન્ વીરશ્ ચતુર્ભિઃ સહ વાનરૈઃ ॥

વયસ્યં તં કુરુ ક્ષિપ્રમ્ ઇતો ગત્વાદ્ય રાઘવ
અદ્રોહાય સમાગમ્ય દીપ્યમાને વિભાવસૌ ॥

ન ચ તે સો ઽવમન્તવ્યઃ સુગ્રીવો વાનરાધિપઃ
કૃતજ્ઞઃ કામરૂપી ચ સહાયાર્થી ચ વીર્યવાન્ ॥

શક્તૌ હ્ય્ અદ્ય યુવાં કર્તું કાર્યં તસ્ય ચિકીર્ષિતમ્
કૃતાર્થો વાકૃતાર્થો વા કૃત્યં તવ કરિષ્યતિ ॥

સ ઋક્ષરજસઃ પુત્રઃ પમ્પામ્ અટતિ શઙ્કિતઃ
ભાસ્કરસ્યૌરસઃ પુત્રો વાલિના કૃતકિલ્બિષઃ ॥

સંનિધાયાયુધં ક્ષિપ્રમ્ ઋષ્યમૂકાલયં કપિમ્
કુરુ રાઘવ સત્યેન વયસ્યં વનચારિણમ્ ॥

સ હિ સ્થાનાનિ સર્વાણિ કાર્ત્સ્ન્યેન કપિકુઞ્જરઃ
નરમાંસાશિનાં લોકે નૈપુણ્યાદ્ અધિગચ્છતિ ॥

ન તસ્યાવિદિતં લોકે કિંચિદ્ અસ્તિ હિ રાઘવ
યાવત્ સૂર્યઃ પ્રતપતિ સહસ્રાંશુર્ અરિંદમ ॥

સ નદીર્ વિપુલાઞ્ શૈલાન્ ગિરિદુર્ગાણિ કન્દરાન્
અન્વિષ્ય વાનરૈઃ સાર્ધં પત્નીં તે ઽધિગમિષ્યતિ ॥

વાનરાંશ્ ચ મહાકાયાન્ પ્રેષયિષ્યતિ રાઘવ
દિશો વિચેતું તાં સીતાં ત્વદ્વિયોગેન શોચતીમ્ ॥

સ મેરુશૃઙ્ગાગ્રગતામ્ અનિન્દિતાં પ્રવિશ્ય પાતાલતલે ઽપિ વાશ્રિતામ્
પ્લવંગમાનાં પ્રવરસ્ તવ પ્રિયાં નિહત્ય રક્ષાંસિ પુનઃ પ્રદાસ્યતિ ॥