રામાયણ (સંશોધિત પાઠ) · અધ્યાય 3.66

તૌ તુ તત્ર સ્થિતૌ દૃષ્ટ્વા ભ્રાતરૌ રામલક્ષ્મણૌ
બાહુપાશપરિક્ષિપ્તૌ કબન્ધો વાક્યમ્ અબ્રવીત્ ॥

તિષ્ઠતઃ કિં નુ માં દૃષ્ટ્વા ક્ષુધાર્તં ક્ષત્રિયર્ષભૌ
આહારાર્થં તુ સંદિષ્ટૌ દૈવેન ગતચેતસૌ ॥

તચ્ છ્રુત્વા લક્ષ્મણો વાક્યં પ્રાપ્તકાલં હિતં તદા
ઉવાચાર્તિસમાપન્નો વિક્રમે કૃતનિશ્ચયઃ ॥

ત્વાં ચ માં ચ પુરા તૂર્ણમ્ આદત્તે રાક્ષસાધમઃ
તસ્માદ્ અસિભ્યામ્ અસ્યાશુ બાહૂ છિન્દાવહૈ ગુરૂ ॥

તતસ્ તૌ દેશકાલજ્ઞૌ ખડ્ગાભ્યામ્ એવ રાઘવૌ
અછિન્દતાં સુસંહૃષ્ટૌ બાહૂ તસ્યાંસદેશયોઃ ॥

દક્ષિણો દક્ષિણં બાહુમ્ અસક્તમ્ અસિના તતઃ
ચિછેદ રામો વેગેન સવ્યં વીરસ્ તુ લક્ષ્મણઃ ॥

સ પપાત મહાબાહુશ્ છિન્નબાહુર્ મહાસ્વનઃ
ખં ચ ગાં ચ દિશશ્ ચૈવ નાદયઞ્ જલદો યથા ॥

સ નિકૃત્તૌ ભુજૌ દૃષ્ટ્વા શોણિતૌઘપરિપ્લુતઃ
દીનઃ પપ્રચ્છ તૌ વીરૌ કૌ યુવામ્ ઇતિ દાનવઃ ॥

ઇતિ તસ્ય બ્રુવાણસ્ય લક્ષ્મણઃ શુભલક્ષણઃ
શશંસ તસ્ય કાકુત્સ્થં કબન્ધસ્ય મહાબલઃ ॥

અયમ્ ઇક્ષ્વાકુદાયાદો રામો નામ જનૈઃ શ્રુતઃ
અસ્યૈવાવરજં વિદ્ધિ ભ્રાતરં માં ચ લક્ષ્મણમ્ ॥

અસ્ય દેવપ્રભાવસ્ય વસતો વિજને વને
રક્ષસાપહૃતા ભાર્યા યામ્ ઇચ્છન્તાવ્ ઇહાગતૌ ॥

ત્વં તુ કો વા કિમર્થં વા કબન્ધ સદૃશો વને
આસ્યેનોરસિ દીપ્તેન ભગ્નજઙ્ઘો વિચેષ્ટસે ॥

એવમ્ ઉક્તઃ કબન્ધસ્ તુ લક્ષ્મણેનોત્તરં વચઃ
ઉવાચ પરમપ્રીતસ્ તદ્ ઇન્દ્રવચનં સ્મરન્ ॥

સ્વાગતં વાં નરવ્યાઘ્રૌ દિષ્ટ્યા પશ્યામિ ચાપ્ય્ અહમ્
દિષ્ટ્યા ચેમૌ નિકૃત્તૌ મે યુવાભ્યાં બાહુબન્ધનૌ ॥

વિરૂપં યચ્ ચ મે રૂપં પ્રાપ્તં હ્ય્ અવિનયાદ્ યથા
તન્ મે શૃણુ નરવ્યાઘ્ર તત્ત્વતઃ શંસતસ્ તવ ॥