રામાયણ (સંશોધિત પાઠ) · અધ્યાય 3.42

તથા તુ તં સમાદિશ્ય ભ્રાતરં રઘુનન્દનઃ
બબન્ધાસિં મહાતેજા જામ્બૂનદમયત્સરુમ્ ॥

તતસ્ ત્ર્યવનતં ચાપમ્ આદાયાત્મવિભૂષણમ્
આબધ્ય ચ કલાપૌ દ્વૌ જગામોદગ્રવિક્રમઃ ॥

તં વઞ્ચયાનો રાજેન્દ્રમ્ આપતન્તં નિરીક્ષ્ય વૈ
બભૂવાન્તર્હિતસ્ ત્રાસાત્ પુનઃ સંદર્શને ઽભવત્ ॥

બદ્ધાસિર્ ધનુર્ આદાય પ્રદુદ્રાવ યતો મૃગઃ
તં સ પશ્યતિ રૂપેણ દ્યોતમાનમ્ ઇવાગ્રતઃ ॥

અવેક્ષ્યાવેક્ષ્ય ધાવન્તં ધનુષ્પાણિર્ મહાવને
અતિવૃત્તમ્ ઇષોઃ પાતાલ્ લોભયાનં કદાચન ॥

શઙ્કિતં તુ સમુદ્ભ્રાન્તમ્ ઉત્પતન્તમ્ ઇવામ્બરે
દશ્યમાનમ્ અદૃશ્યં ચ નવોદ્દેશેષુ કેષુચિત્ ॥

છિન્નાભ્રૈર્ ઇવ સંવીતં શારદં ચન્દ્રમણ્ડલમ્
મુહૂર્તાદ્ એવ દદૃશે મુહુર્ દૂરાત્ પ્રકાશતે ॥

દર્શનાદર્શનેનૈવ સો ઽપાકર્ષત રાઘવમ્
આસીત્ ક્રુદ્ધસ્ તુ કાકુત્સ્થો વિવશસ્ તેન મોહિતઃ ॥

અથાવતસ્થે સુશ્રાન્તશ્ છાયામ્ આશ્રિત્ય શાદ્વલે
મૃગૈઃ પરિવૃતો વન્યૈર્ અદૂરાત્ પ્રત્યદૃશ્યત ॥

દૃષ્ટ્વા રામો મહાતેજાસ્ તં હન્તું કૃતનિશ્ચયઃ
સંધાય સુદૃઢે ચાપે વિકૃષ્ય બલવદ્ બલી ॥

તમ્ એવ મૃગમ્ ઉદ્દિશ્ય જ્વલન્તમ્ ઇવ પન્નગમ્
મુમોચ જ્વલિતં દીપ્તમ્ અસ્ત્રબ્રહ્મવિનિર્મિતમ્ ॥

સ ભૃશં મૃગરૂપસ્ય વિનિર્ભિદ્ય શરોત્તમઃ
મારીચસ્યૈવ હૃદયં વિભેદાશનિસંનિભઃ ॥

તાલમાત્રમ્ અથોત્પત્ય ન્યપતત્ સ શરાતુરઃ
વ્યનદદ્ ભૈરવં નાદં ધરણ્યામ્ અલ્પજીવિતઃ
મ્રિયમાણસ્ તુ મારીચો જહૌ તાં કૃત્રિમાં તનુમ્ ॥

સમ્પ્રાપ્તકાલમ્ આજ્ઞાય ચકાર ચ તતઃ સ્વરમ્
સદૃશં રાઘવસ્યૈવ હા સીતે લક્ષ્મણેતિ ચ ॥

તેન મર્મણિ નિર્વિદ્ધઃ શરેણાનુપમેન હિ
મૃગરૂપં તુ તત્ ત્યક્ત્વા રાક્ષસં રૂપમ્ આત્મનઃ
ચક્રે સ સુમહાકાયો મારીચો જીવિતં ત્યજન્ ॥

તતો વિચિત્રકેયૂરઃ સર્વાભરણભૂષિતઃ
હેમમાલી મહાદંષ્ટ્રો રાક્ષસો ઽભૂચ્ છરાહતઃ ॥

તં દૃષ્ટ્વા પતિતં ભૂમૌ રાક્ષસં ઘોરદર્શનમ્
જગામ મનસા સીતાં લક્ષ્મણસ્ય વચઃ સ્મરન્ ॥

હા સીતે લક્ષ્મણેત્ય્ એવમ્ આક્રુશ્ય તુ મહાસ્વરમ્
મમાર રાક્ષસઃ સો ઽયં શ્રુત્વા સીતા કથં ભવેત્ ॥

લક્ષ્મણશ્ ચ મહાબાહુઃ કામ્ અવસ્થાં ગમિષ્યતિ
ઇતિ સંચિન્ત્ય ધર્માત્મા રામો હૃષ્ટતનૂરુહઃ ॥

તત્ર રામં ભયં તીવ્રમ્ આવિવેશ વિષાદજમ્
રાક્ષસં મૃગરૂપં તં હત્વા શ્રુત્વા ચ તત્સ્વરમ્ ॥

નિહત્ય પૃષતં ચાન્યં માંસમ્ આદાય રાઘવઃ
ત્વરમાણો જનસ્થાનં સસારાભિમુખસ્ તદા ॥