રામાયણ (સંશોધિત પાઠ) · અધ્યાય 3.32

તતઃ શૂર્પણખાં ક્રુદ્ધાં બ્રુવતીં પરુષં વચઃ
અમાત્યમધ્યે સંક્રુદ્ધઃ પરિપપ્રચ્છ રાવણઃ ॥

કશ્ ચ રામઃ કથંવીર્યઃ કિંરૂપઃ કિંપરાક્રમઃ
કિમર્થં દણ્ડકારણ્યં પ્રવિષ્ટશ્ ચ સુદુશ્ચરમ્ ॥

આયુધં કિં ચ રામસ્ય નિહતા યેન રાક્ષસાઃ
ખરશ્ ચ નિહતઃ સંખ્યે દૂષણસ્ ત્રિશિરાસ્ તથા ॥

ઇત્ય્ ઉક્તા રાક્ષસેન્દ્રેણ રાક્ષસી ક્રોધમૂર્છિતા
તતો રામં યથાન્યાયમ્ આખ્યાતુમ્ ઉપચક્રમે ॥

દીર્ઘબાહુર્ વિશાલાક્ષશ્ ચીરકૃષ્ણાજિનામ્બરઃ
કન્દર્પસમરૂપશ્ ચ રામો દશરથાત્મજઃ ॥

શક્રચાપનિભં ચાપં વિકૃષ્ય કનકાઙ્ગદમ્
દીપ્તાન્ ક્ષિપતિ નારાચાન્ સર્પાન્ ઇવ મહાવિષાન્ ॥

નાદદાનં શરાન્ ઘોરાન્ ન મુઞ્ચન્તં મહાબલમ્
ન કાર્મુકં વિકર્ષન્તં રામં પશ્યામિ સંયુગે ॥

હન્યમાનં તુ તત્ સૈન્યં પશ્યામિ શરવૃષ્ટિભિઃ
ઇન્દ્રેણેવોત્તમં સસ્યમ્ આહતં ત્વ્ અશ્મવૃષ્ટિભિઃ ॥

રક્ષસાં ભીમવીર્યાણાં સહસ્રાણિ ચતુર્દશ
નિહતાનિ શરૈસ્ તીક્ષ્ણૈસ્ તેનૈકેન પદાતિના ॥

અર્ધાધિકમુહૂર્તેન ખરશ્ ચ સહદૂષણઃ
ઋષીણામ્ અભયં દત્તં કૃતક્ષેમાશ્ ચ દણ્ડકાઃ ॥

એકા કથંચિન્ મુક્તાહં પરિભૂય મહાત્મના
સ્ત્રીવધં શઙ્કમાનેન રામેણ વિદિતાત્મના ॥

ભ્રાતા ચાસ્ય મહાતેજા ગુણતસ્ તુલ્યવિક્રમઃ
અનુરક્તશ્ ચ ભક્તશ્ ચ લક્ષ્મણો નામ વીર્યવાન્ ॥

અમર્ષી દુર્જયો જેતા વિક્રાન્તો બુદ્ધિમાન્ બલી
રામસ્ય દક્ષિણો બાહુર્ નિત્યં પ્રાણો બહિશ્ચરઃ ॥

રામસ્ય તુ વિશાલાક્ષી ધર્મપત્ની યશસ્વિની
સીતા નામ વરારોહા વૈદેહી તનુમધ્યમા ॥

નૈવ દેવી ન ગન્ધર્વી ન યક્ષી ન ચ કિંનરી
તથારૂપા મયા નારી દૃષ્ટપૂર્વા મહીતલે ॥

યસ્ય સીતા ભવેદ્ ભાર્યા યં ચ હૃષ્ટા પરિષ્વજેત્
અતિજીવેત્ સ સર્વેષુ લોકેષ્વ્ અપિ પુરંદરાત્ ॥

સા સુશીલા વપુઃશ્લાઘ્યા રૂપેણાપ્રતિમા ભુવિ
તવાનુરૂપા ભાર્યા સા ત્વં ચ તસ્યાસ્ તથા પતિઃ ॥

તાં તુ વિસ્તીર્ણજઘનાં પીનોત્તુઙ્ગપયોધરામ્
ભાર્યાર્થે તુ તવાનેતુમ્ ઉદ્યતાહં વરાનનામ્ ॥

તાં તુ દૃષ્ટ્વાદ્ય વૈદેહીં પૂર્ણચન્દ્રનિભાનનામ્
મન્મથસ્ય શરાણાં ચ ત્વં વિધેયો ભવિષ્યસિ ॥

યદિ તસ્યામ્ અભિપ્રાયો ભાર્યાર્થે તવ જાયતે
શીઘ્રમ્ ઉદ્ધ્રિયતાં પાદો જયાર્થમ્ ઇહ દક્ષિણઃ ॥

કુરુ પ્રિયં તથા તેષાં રક્ષસાં રાક્ષસેશ્વર
વધાત્ તસ્ય નૃશંસસ્ય રામસ્યાશ્રમવાસિનઃ ॥

તં શરૈર્ નિશિતૈર્ હત્વા લક્ષ્મણં ચ મહારથમ્
હતનાથાં સુખં સીતાં યથાવદ્ ઉપભોક્ષ્યસે ॥

રોચતે યદિ તે વાક્યં મમૈતદ્ રાક્ષસેશ્વર
ક્રિયતાં નિર્વિશઙ્કેન વચનં મમ રાઘવ ॥

નિશમ્ય રામેણ શરૈર્ અજિહ્મગૈર્ હતાઞ્ જનસ્થાનગતાન્ નિશાચરાન્
ખરં ચ બુદ્ધ્વા નિહતં ચ દૂષણં ત્વમ્ અદ્ય કૃત્યં પ્રતિપત્તુમ્ અર્હસિ ॥