રામાયણ (સંશોધિત પાઠ) · અધ્યાય 3.26

ખરં તુ રામાભિમુખં પ્રયાન્તં વાહિનીપતિઃ
રાક્ષસસ્ ત્રિશિરા નામ સંનિપત્યેદમ્ અબ્રવીત્ ॥

માં નિયોજય વિક્રાન્ત સંનિવર્તસ્વ સાહસાત્
પશ્ય રામં મહાબાહું સંયુગે વિનિપાતિતમ્ ॥

પ્રતિજાનામિ તે સત્યમ્ આયુધં ચાહમ્ આલભે
યથા રામં વધિષ્યામિ વધાર્હં સર્વરક્ષસામ્ ॥

અહં વાસ્ય રણે મૃત્યુર્ એષ વા સમરે મમ
વિનિવર્ત્ય રણોત્સાહં મુહૂર્તં પ્રાશ્નિકો ભવ ॥

પ્રહૃષ્ટો વા હતે રામે જનસ્થાનં પ્રયાસ્યસિ
મયિ વા નિહતે રામં સંયુગાયોપયાસ્યસિ ॥

ખરસ્ ત્રિશિરસા તેન મૃત્યુલોભાત્ પ્રસાદિતઃ
ગચ્છ યુધ્યેત્ય્ અનુજ્ઞાતો રાઘવાભિમુખો યયૌ ॥

ત્રિશિરાશ્ ચ રથેનૈવ વાજિયુક્તેન ભાસ્વતા
અભ્યદ્રવદ્ રણે રામં ત્રિશૃઙ્ગ ઇવ પર્વતઃ ॥

શરધારાસમૂહાન્ સ મહામેઘ ઇવોત્સૃજન્
વ્યસૃજત્ સદૃશં નાદં જલાર્દ્રસ્યેવ દુન્દુભેઃ ॥

આગચ્છન્તં ત્રિશિરસં રાક્ષસં પ્રેક્ષ્ય રાઘવઃ
ધનુષા પ્રતિજગ્રાહ વિધુન્વન્ સાયકાઞ્ શિતાન્ ॥

સ સમ્પ્રહારસ્ તુમુલો રામત્રિશિરસોર્ મહાન્
બભૂવાતીવ બલિનોઃ સિંહકુઞ્જરયોર્ ઇવ ॥

તતસ્ ત્રિશિરસા બાણૈર્ લલાટે તાડિતસ્ ત્રિભિઃ
અમર્ષી કુપિતો રામઃ સંરબ્ધમ્ ઇદમ્ અબ્રવીત્ ॥

અહો વિક્રમશૂરસ્ય રાક્ષસસ્યેદૃશં બલમ્
પુષ્પૈર્ ઇવ શરૈર્ યસ્ય લલાટે ઽસ્મિ પરિક્ષતઃ
મમાપિ પ્રતિગૃહ્ણીષ્વ શરાંશ્ ચાપગુણચ્યુતાન્ ॥

એવમ્ ઉક્ત્વા તુ સંરબ્ધઃ શરાન્ આશીવિષોપમાન્
ત્રિશિરોવક્ષસિ ક્રુદ્ધો નિજઘાન ચતુર્દશ ॥

ચતુર્ભિસ્ તુરગાન્ અસ્ય શરૈઃ સંનતપર્વભિઃ
ન્યપાતયત તેજસ્વી ચતુરસ્ તસ્ય વાજિનઃ ॥

અષ્ટભિઃ સાયકૈઃ સૂતં રથોપસ્થે ન્યપાતયત્
રામશ્ ચિછેદ બાણેન ધ્વજં ચાસ્ય સમુચ્છ્રિતમ્ ॥

તતો હતરથાત્ તસ્માદ્ ઉત્પતન્તં નિશાચરમ્
બિભેદ રામસ્ તં બાણૈર્ હૃદયે સો ઽભવજ્ જડઃ ॥

સાયકૈશ્ ચાપ્રમેયાત્મા સામર્ષસ્ તસ્ય રક્ષસઃ
શિરાંસ્ય્ અપાતયત્ ત્રીણિ વેગવદ્ભિસ્ ત્રિભિઃ શતૈઃ ॥

સ ભૂમૌ શોણિતોદ્ગારી રામબાણાભિપીડિતઃ
ન્યપતત્ પતિતૈઃ પૂર્વં સ્વશિરોભિર્ નિશાચરઃ ॥

હતશેષાસ્ તતો ભગ્ના રાક્ષસાઃ ખરસંશ્રયાઃ
દ્રવન્તિ સ્મ ન તિષ્ઠન્તિ વ્યાઘ્રત્રસ્તા મૃગા ઇવ ॥

તાન્ ખરો દ્રવતો દૃષ્ટ્વા નિવર્ત્ય રુષિતઃ સ્વયમ્
રામમ્ એવાભિદુદ્રાવ રાહુશ્ ચન્દ્રમસં યથા ॥