રામાયણ (સંશોધિત પાઠ) · અધ્યાય 3.24

અવષ્ટબ્ધધનું રામં ક્રુદ્ધં ચ રિપુઘાતિનમ્
દદર્શાશ્રમમ્ આગમ્ય ખરઃ સહ પુરઃસરૈઃ ॥

તં દૃષ્ટ્વા સગુણં ચાપમ્ ઉદ્યમ્ય ખરનિઃસ્વનમ્
રામસ્યાભિમુખં સૂતં ચોદ્યતામ્ ઇત્ય્ અચોદયત્ ॥

સ ખરસ્યાજ્ઞયા સૂતસ્ તુરગાન્ સમચોદયત્
યત્ર રામો મહાબાહુર્ એકો ધુન્વન્ ધનુઃ સ્થિતઃ ॥

તં તુ નિષ્પતિતં દૃષ્ટ્વા સર્વે તે રજનીચરાઃ
નર્દમાના મહાનાદં સચિવાઃ પર્યવારયન્ ॥

સ તેષાં યાતુધાનાનાં મધ્યે રતો ગતઃ ખરઃ
બભૂવ મધ્યે તારાણાં લોહિતાઙ્ગ ઇવોદિતઃ ॥

તતસ્ તં ભીમધન્વાનં ક્રુદ્ધાઃ સર્વે નિશાચરાઃ
રામં નાનાવિધૈઃ શસ્ત્રૈર્ અભ્યવર્ષન્ત દુર્જયમ્ ॥

મુદ્ગરૈર્ આયસૈઃ શૂલૈઃ પ્રાસૈઃ ખડ્ગૈઃ પરશ્વધૈઃ
રાક્ષસાઃ સમરે રામં નિજઘ્નૂ રોષતત્પરાઃ ॥

તે બલાહકસંકાશા મહાનાદા મહાબલાઃ
અભ્યધાવન્ત કાકુત્સ્થં રામં યુદ્ધે જિઘાંસવઃ ॥

તે રામે શરવર્ષાણિ વ્યસૃજન્ રક્ષસાં ગુણાઃ
શૈલેન્દ્રમ્ ઇવ ધારાભિર્ વર્ષમાણા બલાહકાઃ ॥

સ તૈઃ પરિવૃતો ઘોરૈ રાઘવો રક્ષસાં ગણૈઃ
તિથિષ્વ્ ઇવ મહાદેવો વૃતઃ પારિષદાં ગણૈઃ ॥

તાનિ મુક્તાનિ શસ્ત્રાણિ યાતુધાનૈઃ સ રાઘવઃ
પ્રતિજગ્રાહ વિશિખૈર્ નદ્યોઘાન્ ઇવ સાગરઃ ॥

સ તૈઃ પ્રહરણૈર્ ઘોરૈર્ ભિન્નગાત્રો ન વિવ્યથે
રામઃ પ્રદીપ્તૈર્ બહુભિર્ વજ્રૈર્ ઇવ મહાચલઃ ॥

સ વિદ્ધઃ ક્ષતજાદિગ્ધઃ સર્વગાત્રેષુ રાઘવઃ
બભૂવ રામઃ સંધ્યાભ્રૈર્ દિવાકર ઇવાવૃતઃ ॥

વિષેદુર્ દેવગન્ધર્વાઃ સિદ્ધાશ્ ચ પરમર્ષયઃ
એકં સહસ્રૈર્ બહુભિસ્ તદા દૃષ્ટ્વા સમાવૃતમ્ ॥

તતો રામઃ સુસંક્રુદ્ધો મણ્ડલીકૃતકાર્મુકઃ
સસર્જ નિશિતાન્ બાણાઞ્ શતશો ઽથ સહસ્રશઃ ॥

દુરાવારાન્ દુર્વિષહાન્ કાલપાશોપમાન્ રણે
મુમોચ લીલયા રામઃ કઙ્કપત્ત્રાન્ અજિહ્મગાન્ ॥

તે શરાઃ શત્રુસૈન્યેષુ મુક્તા રામેણ લીલયા
આદદૂ રક્ષસાં પ્રાણાન્ પાશાઃ કાલકૃતા ઇવ ॥

ભિત્ત્વા રાક્ષસદેહાંસ્ તાંસ્ તે શરા રુધિરાપ્લુતાઃ
અન્તરિક્ષગતા રેજુર્ દીપ્તાગ્નિસમતેજસઃ ॥

અસંખ્યેયાસ્ તુ રામસ્ય સાયકાશ્ ચાપમણ્ડલાત્
વિનિષ્પેતુર્ અતીવોગ્રા રક્ષઃપ્રાણાપહારિણઃ ॥

તૈર્ ધનૂંષિ ધ્વજાગ્રાણિ વર્માણિ ચ શિરાંસિ ચ
બહૂન્ સહસ્તાભરણાન્ ઊરૂન્ કરિકરોપમાન્ ॥

તતો નાલીકનારાચૈસ્ તીક્ષ્ણાગ્રૈશ્ ચ વિકર્ણિભિઃ
ભીમમ્ આર્તસ્વરં ચક્રુર્ ભિદ્યમાના નિશાચરાઃ ॥

તત્ સૈન્યં નિશિતૈર્ બાણૈર્ અર્દિતં મર્મભેદિભિઃ
રામેણ ન સુખં લેભે શુષ્કં વનમ્ ઇવાગ્નિના ॥

કેચિદ્ ભીમબલાઃ શૂરાઃ શૂલાન્ ખડ્ગાન્ પરશ્વધાન્
ચિક્ષિપુઃ પરમક્રુદ્ધા રામાય રજનીચરાઃ ॥

તાનિ બાણૈર્ મહાબાહુઃ શસ્ત્રાણ્ય્ આવાર્ય રાઘવઃ
જહાર સમરે પ્રાણાંશ્ ચિછેદ ચ શિરોધરાન્ ॥

અવશિષ્ટાશ્ ચ યે તત્ર વિષણ્ણાશ્ ચ નિશાચરાઃ
ખરમ્ એવાભ્યધાવન્ત શરણાર્થં શરાર્દિતાઃ ॥

તાન્ સર્વાન્ પુનર્ આદાય સમાશ્વાસ્ય ચ દૂષણઃ
અભ્યધાવત કાકુત્સ્થં ક્રુદ્ધો રુદ્રમ્ ઇવાન્તકઃ ॥

નિવૃત્તાસ્ તુ પુનઃ સર્વે દૂષણાશ્રયનિર્ભયાઃ
રામમ્ એવાભ્યધાવન્ત સાલતાલશિલાયુધાઃ ॥

તદ્ બભૂવાદ્ભુતં યુદ્ધં તુમુલં રોમહર્ષણમ્
રામસ્યાસ્ય મહાઘોરં પુનસ્ તેષાં ચ રક્ષસામ્ ॥