રામાયણ (સંશોધિત પાઠ) · અધ્યાય 3.18

તાં તથા પતિતાં દૃષ્ટ્વા વિરૂપાં શોણિતોક્ષિતામ્
ભગિનીં ક્રોધસંતપ્તઃ ખરઃ પપ્રચ્છ રાક્ષસઃ ॥

બલવિક્રમસમ્પન્ના કામગા કામરૂપિણી
ઇમામ્ અવસ્થાં નીતા ત્વં કેનાન્તકસમા ગતા ॥

દેવગન્ધર્વભૂતાનામ્ ઋષીણાં ચ મહાત્મનામ્
કો ઽયમ્ એવં મહાવીર્યસ્ ત્વાં વિરૂપાં ચકાર હ ॥

ન હિ પશ્યામ્ય્ અહં લોકે યઃ કુર્યાન્ મમ વિપ્રિયમ્
અન્તરેન સહસ્રાક્ષં મહેન્દ્રં પાકશાસનમ્ ॥

અદ્યાહં માર્ગણૈઃ પ્રાણાન્ આદાસ્યે જીવિતાન્તકૈઃ
સલિલે ક્ષીરમ્ આસક્તં નિષ્પિબન્ન્ ઇવ સારસઃ ॥

નિહતસ્ય મયા સંખ્યે શરસંકૃત્તમર્મણઃ
સફેનં રુધિરં રક્તં મેદિની કસ્ય પાસ્યતિ ॥

કસ્ય પત્ત્રરથાઃ કાયાન્ માંસમ્ ઉત્કૃત્ય સંગતાઃ
પ્રહૃષ્ટા ભક્ષયિષ્યન્તિ નિહતસ્ય મયા રણે ॥

તં ન દેવા ન ગન્ધર્વા ન પિશાચા ન રાક્ષસાઃ
મયાપકૃષ્ટં કૃપણં શક્તાસ્ ત્રાતું મહાહવે ॥

ઉપલભ્ય શનૈઃ સંજ્ઞાં તં મે શંસિતુમ્ અર્હસિ
યેન ત્વં દુર્વિનીતેન વને વિક્રમ્ય નિર્જિતા ॥

ઇતિ ભ્રાતુર્ વચઃ શ્રુત્વા ક્રુદ્ધસ્ય ચ વિશેષતઃ
તતઃ શૂર્પણખા વાક્યં સબાષ્પમ્ ઇદમ્ અબ્રવીત્ ॥

તરુણૌ રૂપસમ્પન્નૌ સુકુમારૌ મહાબલૌ
પુણ્ડરીકવિશાલાક્ષૌ ચીરકૃષ્ણાજિનામ્બરૌ ॥

ગન્ધર્વરાજપ્રતિમૌ પાર્થિવવ્યઞ્જનાન્વિતૌ
દેવૌ વા માનુષૌ વા તૌ ન તર્કયિતુમ્ ઉત્સહે ॥

તરુણી રૂપસમ્પન્ના સર્વાભરણભૂષિતા
દૃષ્ટા તત્ર મયા નારી તયોર્ મધ્યે સુમધ્યમા ॥

તાભ્યામ્ ઉભાભ્યાં સમ્ભૂય પ્રમદામ્ અધિકૃત્ય તામ્
ઇમામ્ અવસ્થાં નીતાહં યથાનાથાસતી તથા ॥

તસ્યાશ્ ચાનૃજુવૃત્તાયાસ્ તયોશ્ ચ હતયોર્ અહમ્
સફેનં પાતુમ્ ઇચ્છામિ રુધિરં રણમૂર્ધનિ ॥

એષ મે પ્રથમઃ કામઃ કૃતસ્ તાત ત્વયા ભવેત્
તસ્યાસ્ તયોશ્ ચ રુધિરં પિબેયમ્ અહમ્ આહવે ॥

ઇતિ તસ્યાં બ્રુવાણાયાં ચતુર્દશ મહાબલાન્
વ્યાદિદેશ ખરઃ ક્રુદ્ધો રાક્ષસાન્ અન્તકોપમાન્ ॥

માનુષૌ શસ્ત્રસમ્પન્નૌ ચીરકૃષ્ણાજિનામ્બરૌ
પ્રવિષ્ટૌ દણ્ડકારણ્યં ઘોરં પ્રમદયા સહ ॥

તૌ હત્વા તાં ચ દુર્વૃત્તામ્ ઉપાવર્તિતુમ્ અર્હથ
ઇયં ચ રુધિરં તેષાં ભગિની મમ પાસ્યતિ ॥

મનોરથો ઽયમ્ ઇષ્ટો ઽસ્યા ભગિન્યા મમ રાક્ષસાઃ
શીઘ્રં સંપદ્યતાં ગત્વા તૌ પ્રમથ્ય સ્વતેજસા ॥

ઇતિ પ્રતિસમાદિષ્ટા રાક્ષસાસ્ તે ચતુર્દશ
તત્ર જગ્મુસ્ તયા સાર્ધં ઘના વાતેરિતા યથા ॥