રામાયણ (સંશોધિત પાઠ) · અધ્યાય 2.73

તતઃ પ્રભાતસમયે દિવસે ઽથ ચતુર્દશે
સમેત્ય રાજકર્તારો ભરતં વાક્યમ્ અબ્રુવન્ ॥

ગતો દશરથઃ સ્વર્ગં યો નો ગુરુતરો ગુરુઃ
રામં પ્રવ્રાજ્ય વૈ જ્યેષ્ઠં લક્ષ્મણં ચ મહાબલમ્ ॥

ત્વમ્ અદ્ય ભવ નો રાજા રાજપુત્ર મહાયશઃ
સંગત્યા નાપરાધ્નોતિ રાજ્યમ્ એતદ્ અનાયકમ્ ॥

આભિષેચનિકં સર્વમ્ ઇદમ્ આદાય રાઘવ
પ્રતીક્ષતે ત્વાં સ્વજનઃ શ્રેણયશ્ ચ નૃપાત્મજ ॥

રાજ્યં ગૃહાણ ભરત પિતૃપૈતામહં મહત્
અભિષેચય ચાત્માનં પાહિ ચાસ્માન્ નરર્ષભ ॥

આભિષેચનિકં ભાણ્ડં કૃત્વા સર્વં પ્રદક્ષિણમ્
ભરતસ્ તં જનં સર્વં પ્રત્યુવાચ ધૃતવ્રતઃ ॥

જ્યેષ્ઠસ્ય રાજતા નિત્યમ્ ઉચિતા હિ કુલસ્ય નઃ
નૈવં ભવન્તો માં વક્તુમ્ અર્હન્તિ કુશલા જનાઃ ॥

રામઃ પૂર્વો હિ નો ભ્રાતા ભવિષ્યતિ મહીપતિઃ
અહં ત્વ્ અરણ્યે વત્સ્યામિ વર્ષાણિ નવ પઞ્ચ ચ ॥

યુજ્યતાં મહતી સેના ચતુરઙ્ગમહાબલા
આનયિષ્યામ્ય્ અહં જ્યેષ્ઠં ભ્રાતરં રાઘવં વનાત્ ॥

આભિષેચનિકં ચૈવ સર્વમ્ એતદ્ ઉપસ્કૃતમ્
પુરસ્કૃત્ય ગમિષ્યામિ રામહેતોર્ વનં પ્રતિ ॥

તત્રૈવ તં નરવ્યાઘ્રમ્ અભિષિચ્ય પુરસ્કૃતમ્
આનેષ્યામિ તુ વૈ રામં હવ્યવાહમ્ ઇવાધ્વરાત્ ॥

ન સકામાં કરિષ્યામિ સ્વામ્ ઇમાં માતૃગન્ધિનીમ્
વને વત્સ્યામ્ય્ અહં દુર્ગે રામો રાજા ભવિષ્યતિ ॥

ક્રિયતાં શિલ્પિભિઃ પન્થાઃ સમાનિ વિષમાણિ ચ
રક્ષિણશ્ ચાનુસંયાન્તુ પથિ દુર્ગવિચારકાઃ ॥

એવં સમ્ભાષમાણં તં રામહેતોર્ નૃપાત્મજમ્
પ્રત્યુવાચ જનઃ સર્વઃ શ્રીમદ્વાક્યમ્ અનુત્તમમ્ ॥

એવં તે ભાષમાણસ્ય પદ્મા શ્રીર્ ઉપતિષ્ઠતામ્
યસ્ ત્વં જ્યેષ્ઠે નૃપસુતે પૃથિવીં દાતુમ્ ઇચ્છસિ ॥

અનુત્તમં તદ્ વચનં નૃપાત્મજ પ્રભાષિતં સંશ્રવણે નિશમ્ય ચ
પ્રહર્ષજાસ્ તં પ્રતિ બાષ્પબિન્દવો નિપેતુર્ આર્યાનનનેત્રસમ્ભવાઃ ॥

ઊચુસ્ તે વચનમ્ ઇદં નિશમ્ય હૃષ્ટાઃ સામાત્યાઃ સપરિષદો વિયાતશોકાઃ
પન્થાનં નરવરભક્તિમાઞ્ જનશ્ ચ વ્યાદિષ્ટસ્ તવ વચનાચ્ ચ શિલ્પિવર્ગઃ ॥