રાધાકૃષ્ણાષ્ટકાલીયલીલાસ્મરણક્રમપદ્ધતિ · શ્લોક 21-40

શ્રી-વૃન્દા-દેવ્ય્ ઉવાચ--
રહસ્યં ત્વાં પ્રવક્ષ્યામિ કૃષ્ણ-ભક્તો ઽસિ નારદ ।
ન પ્રકાશ્યં ત્વયા હ્ય્ એતદ્ ગુહ્યાદ્ ગુહ્યતરં મહત્

અથ નિશાન્ત-સેવા--
મધ્યે વૃન્દાવને રમ્યે પઞ્ચાશત્-કુઞ્જ-મણ્ડિતે ।
કલ્પ-વૃક્ષ-નિકુઞ્જે તુ દિવ્ય-રત્ન-મયે ગૃહે

નિદ્રિતૌ તિષ્ઠતસ્ તલ્પે નિવિડાલિઙ્ગિતૌ મિથઃ ।
મદ્-આજ્ઞા-કારિભિઃ પશ્ચાત્ પક્ષિભિર્ બોધિતાવ્ અપિ

ગાઢાલિઙ્ગન-નિર્ભેદમ્ આપ્તૌ તદ્-ભઙ્ગ-કાતરૌ ।
ન મનસ્ કુરુતસ્ તલ્પાત્ સમુત્થાતું મનાગ્ અપિ

તતશ્ ચ શારિકા-સંઘૈઃ શુકાદ્યૈર્ અપિ તૌ મુહુઃ ।
બોધિતૌ વિવિધૈઃ પદ્યૈઃ સ્વ-તલ્પાદ્ ઉદતિષ્ઠતામ્

ઉપવિષ્ટૌ તતો દૃષ્ટ્વા સખ્યસ્ તલ્પે મુદાન્વિતૌ ।
પ્રવિશ્ય ચક્રિરે સેવાં તત્-કાલસ્યોચિતાં તયોઃ

પુનશ્ ચ શારિકા-વાક્યૈર્ ઉત્થાય તૌ સ્વ-તલ્પતઃ ।
ગચ્છતઃ સ્વ-સ્વ-ભવનં ભીત્ય્-ઉત્કણ્ઠાકુલૌ મિથઃ

ઇતિ નિશાન્ત-સેવા
અથ પ્રાતઃ-સેવા--
પ્રાતશ્ ચ બોધિતો માત્રા તલ્પાદ્ ઉત્થાય સત્વરમ્ ।
કૃત્વા કૃષ્ણો દન્ત-કાષ્ઠં બલદેવ-સમન્વિતઃ

માત્રાનુમોદિતો યાતિ ગોશાલાં દોહનોત્સુકઃ ।
રાધાપિ બોધિતા વૃદ્ધ-વયસ્યાભિઃ સ્વ-તલ્પતઃ

ઉત્થાય દન્ત-કાષ્ઠાદિ કૃત્વાભ્યઙ્ગ સમાચરેત્ ।
સ્નાન-વેદીં તતો ગત્વા સ્નાપિતા લલિતાદિભિઃ

ભૂષા-ગૃહં વ્રજેત્ તત્ર વયસ્યા ભૂષયન્ત્ય્ અપિ ।
ભૂષણૈર્ વિવિધૈર્ દિવ્યૈર્ ગન્ધ-માલ્યાનુલેપનૈઃ

તતશ્ ચ સ્વ-જનૈસ્ તસ્યાઃ શ્વશ્રૂં સમ્પ્રાર્થ્ય યત્નતઃ ।
પક્તુમ્ આહૂયતે તૂર્ણં સ-સખી સા યશોદયા

શ્રી-નારદ ઉવાચ--
કથમ્ આહૂયતે દેવિ પાકાર્થં સા યશોદયા ।
સતીષુ પાક-કર્ત્રીષુ રોહિણી-પ્રમુખાષ્વ્ અપિ

શ્રી-વૃન્દોવાચ--
દુર્વાસસા સ્વયં દત્તો વરસ્ તસ્યૈ મહર્ષિણા ।
ઇતિ કાત્યાયની-વક્ત્રાચ્ છ્રુતમ્ આસીન્ મયા પુરા

ત્વયા યત્ પચ્યતે દેવિ તદ્-અન્નં મદ્-અનુગ્રહાત્ ।
મિષ્ટં સ્વાદ્વ્-અમૃત-સ્પર્દ્ધિ ભોક્તુર્ આયુષ્કરં તથા

ઇત્ય્ આહ્વયતિ તાં નિત્યં યશોદા પુત્ર-વત્સલા ।
આયુષ્માન્ મે ભવેત્ પુત્રઃ સ્વાદુ-લોભાત્ તથા સતી

શ્વશ્ર્વાનુમોદિતા સાપિ હૃષ્ટા નન્દાલયં વ્રજેત્ ।
સ-સખી-પ્રકરા તત્ર ગત્વા પાકં કરોતિ ચ

કૃષ્ણો ઽપિ દુગ્ધ્વા ગાઃ કાશ્ચિદ્ દોહયિત્વા જનૈઃ પરાઃ ।
આગચ્છતિ પિતુર્ વાક્યાત્ સ્વ-ગૃહં સખિભિર્ વૃતઃ

અભ્યઙ્ગ-મર્દનં કૃત્વા દાસૈઃ સંસ્નાપિતો મુદા ।
ધૌત-વસ્ત્ર-ધરઃ સ્રગ્વી ચન્દનાક્ત-કલેવરઃ

દ્વિ-ફાલ-બદ્ધ-કેશૈશ્ ચ ગ્રીવા-ભાલોપરિ સ્ફુરન્ ।
ચન્દ્રાકાર-સ્ફુરદ્-ભાલ-તિલકાલક-રઞ્જિતઃ