Prasannapada · અધ્યાય 14

ઇત્યાચાર્યચન્દ્રકીર્તિપાદોપરચિતાયાં પ્રસન્નપદાયાં મધ્યમકવૃત્તૌ ધાતુપરીક્ષા નામ પઞ્ચમં પ્રકરણમ્ ॥
6
રાગરક્તપરીક્ષા ષષ્ઠં પ્રકરણમ્ ।
અત્રાહ- વિદ્યન્ત એવ સ્કન્ધાયતનધાતવઃ । કુતઃ? તદાશ્રયસંક્લેશોપલબ્ધેઃ । ઇહ યન્નાસ્તિ, ન તદાશ્રયસંક્લેશોપલબ્ધિરસ્તિ બન્ધ્યાદુહિતુરિવ વન્ધ્યાસૂનોઃ । સન્તિ ચ રાગાદયઃ ક્લેશાઃ સંક્લેશનિબન્ધનમ્ । યથોક્તં ભગવતા- બાલો ભિક્ષવે અશ્રુતવાન્ પૃથગ્જનઃ પ્રજ્ઞપ્તિમનુપતિતઃ ચક્ષુષા રૂપાણિ દૃષ્ટ્વા સૌમનસ્યસ્થાનીયાન્યભિનિવિશતે । સો ઽભિનિવિષ્ટઃ સન્ રાગમુત્પાદયતિ । રક્તઃ સન્ રાગજં દ્વેષજં મોહજં કર્માભિસંસ્કરોતિ કાયેન વાચા મનસેતિ વિસ્તરઃ । ઉચ્યતે । સ્યુઃ સ્કન્ધાયતનધાતવો યદિ રાગાદય એવ ક્લેશાઃ સ્યુઃ । ઇહાયં રાગઃ પરિકલ્પ્યમાનો બાલપૃથગ્જનૈઃ સતિ રક્તે નરે પરિકલ્પ્યેત અસતિ વા? ઉભયથા ચ ન યુજ્યત ઇત્યાહ-
રાગાદ્યદિ ભવેત્પૂર્વં રક્તો રાગતિરસ્કૃતઃ ।
તં પ્રતીત્ય ભવેદ્રાગો રક્તે રાગો ભવેત્સતિ