પઞ્ચદશી · અધ્યાય p12

મહાવાક્યવિવેકોનામ - પઞ્ચમઃ પરિચ્છેદઃ ।
યેનેક્ષતે શૃણોતીદં જિઘ્રતિ વ્યાકરોતિ ચ ।
સ્વાદ્વસ્વાદૂ વિજાનાતિ તત્પ્રજ્ઞાનમુદીરિતમ્

ચતુર્મુખેન્દ્રદેવેષુ મનુષ્યાશ્વશ્વગવાદિષુ ।
ચૈતન્યમેકં બ્રહ્માતઃ પ્રજ્ઞાનં બ્રહ્મમય્યપિ

પરિપૂર્ણઃ પરાત્માસ્મિન્દેહે વિદ્યાધિકારિણિ ।
બુદ્ધેઃ સાક્ષિતયા સ્થિત્વા સ્ફુરન્નહમિતીર્યતે

સ્વતઃ પૂર્ણઃ પરાત્માત્ર બ્રહ્મશબ્દેન વર્ણિતઃ ।
અસ્મીત્યૈક્યપરામર્શસ્તેન બ્રહ્મ ભવામ્યહમ્

એકમેવાદ્વિતીયં સન્નામરૂપવિવર્જિતમ્ ।
સૃષ્ટેઃ પુરાધુનાપ્યસ્ય તાદૃક્ત્વં તદિતીર્યતે

શ્રોતુર્દેહેન્દ્રિયાતીતં વસ્ત્વત્ર ત્વં પદેરિતમ્ ।
એકતા ગૃહ્યતેઽસીતિ તદૈક્યમનુભૂયતામ્

સ્વપ્રકાશાપરોક્ષત્વમયમિત્યુક્તિતો મતમ્ ।
અહઙ્કારાદિદેહાન્તાત્પ્રત્યગાત્મેતિ ગીયતે

દૃશ્યમાનસ્ય સર્વસ્ય જગતસ્તત્ત્વમીર્યતે ।
બ્રહ્મશબ્દેન તદ્બ્રહ્મ સ્વપ્રકાશાત્મરૂપકમ્

ઇતિ મહાવાક્યવિવેકોનામ પઞ્ચમઃ પરિચ્છેદઃ