પૈપ્પલાદ-સંહિતા · અધ્યાય 9.4

સહૈવ વો હૃદયાનિ
સહ વિજ્ઞાનમ્ અસ્તુ વઃ ।
સહેન્દ્રો વૃત્રહા કરત્
સહ દેવો બૃહસ્પતિઃ ॥

સમાનમ્ અસ્તુ વો હૃદયં
સમાનમ્ ઉતો વો મનઃ ।
સમાનો અગ્નિર્ વો દેવઃ
સહ રાષ્ટ્રમ્ ઉપાધ્વમ્ ॥

સં જાનીધ્વં સહૃદયાઃ
સર્વે સંમનસ સ્થ ।
નષ્ટો વો મન્યુર્ જીર્ણેર્ષ્યા
સહ જીવાથ ભદ્રયા ॥

યથા પુત્રઃ પ્રવાવદઃ
પિતૃભ્યાં વદતિ પ્રિયમ્ ।
એવા યૂયમ્ અન્યો ઽન્યસ્મૈ
જિહ્વયા વદત પ્રિયમ્ ॥

સહૈવ વો ધાન્યાનિ
સમાનાઃ પશવશ્ ચ વઃ ।
સહ પૃથિવ્યાં વીરુધઃ
સહ વઃ સન્ત્વ્ ઓષધીઃ ॥

સહ દીક્ષા સહ યજ્ઞો
વિવાહો વઃ સહાસતિ ।
સહ પ્રફર્વા નૃત્યન્તુ
સહ વ સ્ત્રિય આસતામ્ ॥

સહૈવ વો વીર્યાણિ
સહાન્યાન્ રન્ધયાધ્વૈ ।
સહ પતત્રિણીમ્ ઇષુમ્
અન્યસ્મૈ હેતિમ્ અસ્યત ॥

સં વસ્યામિ સમિતિં
મધુના વાચમ્ આઞ્જિષમ્ ।
યુષ્માકમ્ અન્યે શૃણ્વન્તુ-
-ઉદિતં સઙ્ગતે જને ॥

યુષ્માન્ મિત્રા વૃણતાં
યુષ્માન્ પ્રતિજના ઉત ।
યુષ્માત્ જ્ઞાતિત્વં પ્રેપ્સન્ત્ય્
અમૃતં મર્ત્યા ઇવ ॥

સંસમ્ ઇદ્ યઃ સમ્ આકરં
સહ યૂથા ગવામ્ ઇવ ।
સમાનમ્ અસ્તુ વો મનો
જ્યેષ્ઠં વિજ્ઞાનમ્ અન્વ્ ઇત ॥

ઇદં યદ્ એષાં હૃદયં
તદ્ એષાં હૃદયે ભવત્ ।
અથો યદ્ એષાં હૃદયં
તદ્ વેષાં હૃદિ શ્રિતમ્ ।
સમાનમ્ અસ્તુ વો મનઃ
શ્રેષ્ઠં વિજ્ઞાનમ્ અન્વ્ ઇત ॥

ઇદં યદ્ એષાં મન
એષાં યાનિ મનાંસિ ચ ।
સધ્ર્યગ્ ઇન્દ્ર તત્ કૃણુ
રથે પાદાવ્ ઇવાહિતૌ ॥